1 मति ओर्विना-ओर्वोग़ सेवा कीम्ह्‌टु, मावोरिर. बोग़ाय मीवा ऐंगेटोग़ विस्वसि पापमते एग़्कतदिन ऊळतेके, बोर पवित्र जीवाता पेग़्के ताकवालोरिर मह्‌निर, मीट ओनगा अनजि कुलुल बुदते ओनु सेतेमता अग़दे ताटु. मति तनेके, मीटवने अद्रमता पापमते एग़्कनदायो इनजि उसरते मन्ह्‌टु.

2 मीट ओर्विना-ओर्वोग़ तिपलतुन-मोतातुन कांजाटु, इदे रीतते किर्स्तु वेहतद अडोतुन माळकिर✡ 6:2 योहन 13:34. 3 बोग़ाय विस्वसि केनकेनेतोग़ मनजि, “नना दुस्रोर्काय बेरोनन,” इनजि दुस्रोरा सीता केवोग़ इतेके ओना विचर चुकिह्‌ता. 4 मति मीट ओर्वोग़-ओर्वोग़ दुस्रोनाङ कबस्किन जोकवा, आप-आपुनाङ कुदताङ कबस्किन जोकनदु. अस्के नीवाङे कबस्किन ऊळिसि नना बेद्रमतोनन इनजि पुनदकिन, मति दुस्रोर्काय बेरोनन इनदा वावो. 5 बाराह्‌क इतेके देवुळ नीके ईतद जबब्दरतुन निमा एतना गावले.

6 देवुळता पोल्‍लो केंजवालोर तमा सबे बेसता मालसोमता कोडि, पोल्‍लो काग़्हवालोरिह्‌क ईयिर.

7 ओसो मीट नाळेम आयमाटु. देवुळि मावाङ कबस्किन ऊळो, नेयम केवो, इनजि देवुळतुन बोग़े नाळेह कीया पग़वोग़. इतेके मीट बेव वीतिह्‌निर, अविने कोयकिर. 8 इतेके बोर तमा मन्कना बुद वेहतपु लाग्वाङ कबस्क वीतिह्‌तोर, ओरिह्‌क अदे मन्कना बुदतुह्‌कु बूळेम आयनद सिक्साता पंटा दोर्कग़ा. बोर बार देवुळता जीवा वेहतपु बेसताङ कबस्क वीतिह्‌तोर, ओरिह्‌क देवुळता जीवाये ईतदु अमेसाता पिसमुळता पंटा दोर्कग़ा. 9 अद्रमे माट बेसताङ कबस्क कीयलाह बेस्के लंडा आयनदायो. इद्रम माट आरेम आयवेके, देवुळ तासतद कगोते माक अव कबस्कना पाय्दा दोर्कग़ा. 10 अदिनेनाह्‌कु माक बह मोका दोर्किह्‌ता, अह माट सबेटोरेनाह्‌क बेसताङ कबस्क कीयिङ, कास कीसि मावोर विस्वसिरेनाह्‌कु. इद्रमलेह्‌का माट देवुळता जीवाता पेग़्के ताकना गावले.

11 इंजेके इव आक्रिताङ पोल्‍लोङ नना नावाय कुदता कयदे रासिह्‌नन, अदिह्‌क मीक इगा बेराङ-बेराङे अक्सर्क दिसिह्‌ताङ. 12 बोर यहुदिरा मान दोर्किह कीयलाह ऊळिह्‌तोर, ओरे मीकु डायना रिवज कीयलाह जबर्दस्त कीस्तोर. हव्कनागुटातगा किर्स्तु ईतद मोकतेनाह्‌के माट देवुळतगा सेतेमतोरल आय्ह्‌नल, इद्रम पोकुर कीतेके यहुदिर माक विरुद कीयनुर इनजिये, ओर मीकु इद्रम कीया वेहतह्‌तोर. 13 बह इतेके डायना रिवज नोमवालोर कुदि मोसानाङ अडोन माळोर आस्तोर. मीट ओराङ केंजिसि डायना रिवज कीतिर इतेके, ओर पोंगना इनजि ओरु मीकु डायलाह वेहतह्‌तोर. 14 नाक बार अद्रमता दुनियातोरा कदर मुर्तिय गावल आयो; मति नना हव्कनागुटातगा हातोग़ सामि येसु किर्स्तुन नमवानन इनजि पोंगिह्‌नन. अद हव्कनागुटातेनाह्‌के इद दुनियाताङ पोल्‍लोङ नाक पट अरवोङ, अहे नावा ताकमुळि दुनियातोरिह्‌कु पट अरवो. 15 नाक अद्रमता कदर गावल आयो बह इतेके डायना रिवज कीयनद वन बार आयो, केवद वन बार आयो; देवुळि मावा लोप्पा पूना जीवा पुटिह कीता, अदे मोदुल पोल्‍लो आंदु. 16 इद पोल्‍लोते बोर ताकनुर, ओर सबेटोरिह्‌कु देवुळि सुकम ईयि, ओसो किर्स्तुन नमवालोर इस्रयेलतोरा पोग़ोन इंका देवुळि दया कीयि. 17 ओसो इंजेटाहि मियग्डाहि बोग़े जोल काग़्हमुळतुन केंजिसि नाक तिपल कीयनदायो. बाराह्‌क इतेके येसुसामिना कबुरतुन पोकुर कीताह्‌कु विरुदतोरा देबाना सीना नावा मेंदुदगा मन्ह्‌ता.

18 मावोरिर, येसुसामि किर्स्तुना दया मियगा मनि. आमेन.