1 अद्रमे उंद दिया बाताल आता इतेके, पत्रु, योहन वेर इर्वुर बह्‌ट अरस मतस्के देवुळता मंदिरतगा अनजोर मतोर. (दिनम अद तूकने यहुदि लोकुर मंदिरतगा मोळ्किंदुर.) 2 मंदिरतगा एवतस्के ओर्वोग़ पुटिय ताक पग़वोग़ मन्कल ओरिह्‌क दिसतोग़. ओग़ मंदिरतगा अनवालोर वावालोरिन ताल्ह्‌किस तिनेग़, इनजि दिनम उय्तुर ओन मंदिरतगा एवनाह कांजिस तंदुर. तचि वेल्‍लाय सोबाता अग़ इनदनद अग़दगा उदिह कीस अंदुर.* 3:2 मंदिरताङ मंडानगा ओळियनद मुनेता अग़दुन सोबाता अग़ि इंदुर. 3 पत्रु, योहन मंदिरताङ मंडानगा ओळियनदिन ऊळिस ओग़ ओरिन बिचेम ताल्ह्‌कतोग़. 4 अस्के पत्रु, योहनि, इर्वुर आसि ओनेके बेट-बेट ऊळसोरेने पत्रु इतोग़ “मयेक ऊळा!” 5 इतस्के, बातालाय ईयनुर इनजोर आसा कीस ओग़ ओरेकेन ऊळलाह आतोग़. 6 अस्के पत्रु इतोग़, “नयग बंगर-वेंडिङ इतेक इलेङ, मति बाताल मन्ह्‌ता, अद नीक ईय्ह्‌नन: अले नासरेत नाटेनोग़ येसु किर्स्तुना अदिकरते तेदिसनेह्‌क ताका,” इतोग़. 7 इनजि कूटाना तिनळ कयदुन पोस तेहतोग़. अस्केन ओनाङ काल्किह्‌क, मेसबुटिह्‌क लाव वाता. 8 लाव वातस्के ओग़ु तेदिस दिग नितोग़, निचि ताक बोटटोग़. ताकसोर डेह्‌कसोर, देवुळतुन जोहर कीसोर ओराय संगे मंदिरते ओळियतोग़. 9 अगा मतोर सबे मन्कलोर ओग़ ताकनदिन ओसो देवुळतुन जोहर कीयनदिन ऊळतोर. 10 ऊळतस्के, मंदिरता सोबातद अग़दगा उदिस मनजि बिचेम ताल्ह्‌कवाल वेग़े आंदोग़, इनजोर पुतोर. पुतस्के कूटाल सव्रेम आतोग़ अयो, इनजि पका बामिस ओर एक्बेक आतोर.

11 सव्रेम आतोग़ मन्कल पत्रुन, योहनिन पोस मतोग़. मंदिरता बेद जागातुन साल्‍मोन राजाना मंडा इंदुर, अदे मंडातगा वेर निच मतोर.† 3:11 येसु पुटटदिह्‌काय अजर वर्साना मुने इस्रयेलतोग़ दविद राजाना पया वेग़ साल्मोन राजाल राजेम कीन्दोग़, वेग़े साल्मोन राजाल येरुसलेमता मुनेता मंदिरतुन दोहता वेहतोग़. अद मंडातगा सबेटोर वित वासि, ऊळिस बामतोर. 12 पत्रु ओर सबेटोरिन ऊळिस इतोग़, “ए मावा इस्रयेलतोरिर! बह आता, मीट इद्रम बाराह्‌क बामलाह आतिर? मावाय लावतुह्‌के, मावाय कोळ्वतुह्‌के वेग़ मन्कल ताकतोग़ इतपे, मयेकेन बेट-बेट बाराह्‌क ऊळिह्‌निर? 13  अब्रहम मुय्तोना, इसक मुय्तोना, याकुब मुय्तोना देवुळि, मावा तादोर-बाबोरा देवुळि, इदु तना सेवा केवाल येसुह्‌क मान ईता, मति मीट इतेके ओन पिलाति गुमसिना कयदगा पोस ईतिर. पिलाति ओन विळ्सकन इंदह्‌पा ‘वेग़ मावा राजाल आयोग़,’ इनजोर मीट पिलातिना मुनेह ओन पास्कतिर. 14 ‘देवुळता पवित्र, सेतेमते ताकवाल मग़ि येसुन पास्किसि, ओर्वोग़ हव्के मन्कन विळ्सिस ईम’ इनजोर पिलातिन इतिर. 15 अमेसाता पिसमुळ एवाल माल्कान मीट हव्कलाह ईतिर, तेला मति हामुरताहि देवुळि ओन जीवा अर्हता. इद पोल्‍लोता माट इर्वोम साक्सि मह्‌नोम. 16 मीवा मुनेह निच मनवाल मन्कन मीट पुतिरे. वेग़ बह बेस आतोग़ इतेके, माट येसुन विस्वस कीताह्‌के, ओना लाव वेनगा वाता. येसुनगा अदिकर मन्ह्‌ता इनजि विस्वस कीताह्‌के वेग़ पूरा सव्रेम आतोग़.

17 “मावोरिर! मीटु, मीवा मुक्यालोर बार कलियिस येसुन हव्कनाह कीतिर, मति ओग़ बोग़ आंदोग़ इनजोर पुनवालेवा अह कीतिर, इद नाक एर्काये. 18 देवुळि तना सबे कबुरतोरा संगे, किर्स्तु राजाल मुनेह सिक्सा आयनोग़ इनजि मुनेन वेहच मता. देवुळि ओन अद्रमे कीसि अद पोल्‍लोतुन इद्रम करल कीता. 19 अदिह्‌क इंजेके मीट पापमता अग़दाहि मल्म्ह्‌टु, अस्के देवुळि मीवा पापमतुन एडिह कीयग़ा. ओसो किर्स्तुनेनाह देवुळतग्डाहि मीवा जीवातुह्‌क सितुर दोर्कग़ा. 20 ओसो देवुळि मयेनाह्‌के निल्पिह कीतोग़ किर्स्तुन (इतेके येसुन) ओसो वने लोहचीयग़ा. 21 ‘पूरा दुनियातुन पूना कीकन’ इनजि देवुळि वेल्‍लाय मुने तना पवित्र कबुरतोरा संगे वेहच मता. पूना कीयनद कालम एवनाह किर्स्तु पोग़ोन देवुळदीपते मनदनोग़.

22 “मोसा मुय्तोग़ मावा तादोर-बाबोरिन किर्स्तुना लोप्‍पा इद्रम वेहच मतोग़, ‘नावा लेह्‌काडोग़ ओर्वोग़ कबुरतोन देवुळि मीवा कूळतोरग्डाहि मियेनाह्‌क लोहचीयग़ा. ओग़ मीकु बाताङ वेहतनोग़, अव सबे पोल्‍लोन केंजाट.✡ 3:22 व्यवस्थाविवरण 18:15 23 ओना पोल्‍लो केंजवोरिन देवुळि तना मुडग्डाहि एग़िह कीसि ओरिन बूळे कीसीयग़ा,’✡ 3:23 व्यवस्थाविवरण 18:19 इतोग़. 24 अद्रमे सामुवेल मुय्तोनाहि ओना पयाडोर देवुळता कबुरतोर मुनेन इव दियाना लोप्पा पोकुर कीतोर. 25 इंजेके ‘नीवा कूळतोना मेटे इद बूमता सबे जातिनोरिह्‌क बर्कत दोर्कग़ा,’ इनजि देवुळि अब्रहम मुय्तोन वेहच मता,✡ 3:25 पुटमुळि 22:18 इद्रम मावा तादोर-बाबोरा संगे मुनेन इद पोल्‍लोतुन करल कीस मता. बेव पोल्‍लोङ कबुरतोर पोकुर कीस मतोर, बेद बर्कत देवुळि ईकन इनजि वेहच मता, अव सबे मियेनाह्‌के मन्ह्‌ताङ. 26 अदिह्‌क मीवा सबेटोरा मुर्तिय लाग्वा अग़दाहि मल्हचि मीकु बर्कत ईयलाह, देवुळि तना सेवक येसुन आचिसि मुनेन मावा जाततोरिह्‌क लोहचीस मता,” इनजोर पत्रु वेहतोग़.