8
गरिब विस्वसिरिह्क कोताङ दान ईयनद पोल्लो
1 मावोर विस्वसिरिर! मकिदुनिया पटटोर सबेटोर विस्वसिरा मुडुह्क देवुळि देय्वा ईताह्कु,* 8:1 बळयिर 16-17 ऊळतेके मकिदुनिया पटटे कमसेकम मूंड सहर्कनगा विस्वसिरा मुल मता इनजि माक तेळियिह्ता - पिलिपि, तिसलुनि, बिरिया. इद पटि कुरिंत सहर मनदनद अकाया पटटुह्क दल्गिस मता. ओर बह कीतोर अदिन मीक वेहतह्नन: 2 अद इद्रमि: ओर पकाय तिपलते मतोर. ओसो पकाय गरिब आस मतोर, तेला मति ओर पका गिर्दा आस मताह्कु, दुस्रोर गरिब विस्वसिरेनाह्क मुर्तिय चिव्टम आयवा कोताङ ईतोर. 3 ओर तमा बेचोक ईया पग़तोर, अचोक कोताङ ईतोर, तान्काय वीळिस वने तमाय कुसिते ईतोर. ओर ईतदिना ननाय साक्सि मह्नन. 4 “देवुळता मन्कलोरिन साय्ता कीयनद सेवातगा माक वने कलियलाह ईम्ह्ट, देय्वा ईम्ह्टु,” इनजोर ओर माक पकाय अर्जि कीतोर. 5 माट बेद्रम विचर कीस मतोम तान्काय एक्वा ओर कीतोर. इतेके माट सामिनेनाह्के पिसकोम इनजि मुनेन करल कीस मतोर. पया देवुळता विचर मतप मावा पोल्लो केंजलाह वने तयर आतोर.
6 इंजेके मीवा मुडगा अळ्न्दम दान ईया वेहतोग़ ओग़ तीतुसिये! अदिनेनाह्क अद कबळतुन मारिह कीयलाह वने मीक वेहेग़ इनजोर माट ओन अर्ज कीतोम. 7 मीट विस्वस कीयलाह, पोल्लोङ वळ्ह्कलाह, देवुळताङ विचर्किन पुनदलाहि, जिदते सेवा कीयलाहि, माट काग़्हतपु जीवा कीयलाहि बेस-नेह्ना कग़यतिर. इंजेके देवुळता मन्कलोरिह्क दान ईयनद कबळ वने बेस-नेह्ना कीम्ह्टु.
8 इद पोल्लोतुन उकुम ईयना लेह्का इनोन, मति दुस्राङ नाह्कनोर विस्वसिर इद कबळते मीक वीळतोर. ओरा अचोन मीट वने निटम जीवा कीय्ह्निरा बहु इनजोर पर्ह्किस ऊळलाह वेहतलाह आतन. 9 मावा येसुसामि किर्स्तु माक बेचोन गूनम तोहतोग़ इनजोर पुतिरे. इतेके ओग़ देवुळि मनजि ओनगा सबे मताङ, मति मीक देवुळता बेरा बर्कत दोर्कना इनजि, मियेनाह्क मन्कल आस गरिब आतोग़, इदिन सीता कीम्ह्टु.
10-11 अदिनेनाह्क इंजेके नावा विचरतुन मीक वेहतलाह आतन: मीट कोताङ अर्हतना इनजोर नीरेताहि विचर कीयलाह आतिर, कोताङ ईयलाह वने सुरु कीतिर, इंजेके अद कबळतुन मारिह कीम्ह्टु. इद मीक बेस आस्ता. कोताङ अर्हतना इनजोर मीवा विचर मता, अद्रमे बेचोक अर्हता पग़यह्निर अचोक अर्हाट. 12 कोताङ ईयना इनजोर विचर मतेके, मियगा लेवेक आयो, मति मियगा बेचोक मन्ह्ताङ, ताना इसबते ईयनद इनजि देवुळतुह्क विचर वास्ता.
13 मीट दुस्रोरेनाह्क ईयनाह्कु ओरिह्क सुकम दोर्कलि, मति मीक इतेके गर्ज अर्वालि इनजि इनोन; इद्रम आयवा बोग़े एक्वा-तक्वा आयवालेवा सबेटोर बराबर मनदना इनजि मावा विचर मन्ह्ता. 14 इंजेके मियगा आलिस पिसनाह मन्ह्ता, अदिनेनाह्क गर्ज अरतोरिह्क ईयना. बेस्के उंद दिया मीक गर्ज अरतेके, अस्के ओरगा आलिस पिसनाह मतेके, ओर मीवा गर्जतुन निहतनुर बहे. इद्रम बोग़े एक्वा-तक्वा आयवालेवा सबेटोर बराबर मनदना. 15 इदे पोल्लो देवुळता सास्त्रमतगा रासतद मन्ह्ता:
“बोग़ वेल्लाङे जमा कीतोग़ ओन्क आलिस पिसोङ;
बोग़ उचुके जमा कीतोग़ ओन्क कमि आयोङ,”✡ 8:15 निर्गमन 16:18† 8:15 इस्रयेलतोर पेळ्ह्कल बूमते तिरियनेके ओर मना तिंडि तिंदुर, अस्के अद तिंडटुन पेह्कतस्के ओर्विह्क-ओर्विह्क तमा लोता मुडा इसबते बराबर आलनाह दोर्कता.
इनजोर रासतद मन्ह्ता.
तीतुस ओसो ओना तोळतोरु
16 माट मियेनाह्क बेचोन आलिह कीय्ह्नोम, अचोन तीतुस वने आलिह कीस्तोग़. अद आल्सुळतुन ओना जीवातगा वाटटद देवुळतुन जोहर कीय्ह्नोम. 17 माट ओन मियगा वायलाह अर्जि कीतस्के ओग़ केंजतोग़. केंजिसि तनाय विचरते, गिर्दा आसि, मियगा वायलाह आतोग़. 18 ओना संगे ओर्वोग़ ऐंगेटोग़ विस्वसिन वने लोहतह्नोम. बेसता कबुरतुन पोकुर कीयनद सेवाते सबेटोर विस्वसिरा मुडगा ओना पेदिर दास्ता. 19 ओसो विस्वसिरा मुडोर वने माट दान कोतान ओयनस्के, वेने मावा तोळ वायेग़ इनजोर निल्पिह कीतोर. माट इव दान कोताङ ओयनद दर्ममता सेवा कीयलाह आतोम, इदिन ऊळिसि मन्कलोर सामिन मान ईयिर इनजोर कीयलाह आतोम. ओसो देवुळता मन्कलोरिह्क तोळ ईयलाह मावा बेचोन जिद मन्ह्ता इनजोर तोहतलाह कीयलाह आतोम.
20 माट वेल्लाङे दान कोतान ओप्पे कीयलाह आतोम, इद कबळते माक बोग़े कसुर ओपना आयो इनजि उसरते मह्नोम. 21 सिरप देवुळता मुनेह मावाङ कबस्क ओप्पनव आयो, मति मन्कलोरा मुनेह वने माट कसुरलेवप दिसना इनजि सीता कीसोर मह्नोम.
22 तीतुसना ओसो ओना तोळतोना संगे ओसो ओर्वोग़ मावा ऐंगेटोग़ विस्वसिन लोहतलाह आतोम. ओग़ देवुळता सेवातगा गिर्दाते मनवाल इनजोर वेल्लाङे पोल्लोने, वेल्लाङे मल्काङ पर्ह्किस ऊळतोम. मियगा ओग़ पका आसा कीताह्कु इंजेके मियगा वायलाह ओना ओसोय जिद मन्ह्ता. 23 तीतुसना लोप्पा बोग़ाय ताल्ह्कतेक इद्रम वेहाट: ओग़ नावा तोळतोग़ आंदोग़; अहे नावा संगे मियगा सेवा कीयलाह आतोग़. ओना संगे वावालोर इर्वुर मन्कलोरा लोप्पा इद्रम वेहाट: ओर मावा ऐंगेटोर विस्वसिर आंदुर, विस्वसिरा मुडोर आचिस लोहतोरु. ओरा सेवातेनाह्क किर्स्तुह्कु मान दोर्किह्ता. 24 अदिह्क मीट ओरिन जीवा कीतिर इनजोर तोहचीम्ह्ट. इदिन ऊळिसि, माट बाराह्कु मीवा लोप्पा पोंगिह्नोम इनजि सबेटोर विस्वसिरा मुल पुनदनुर.
*8:1 8:1 बळयिर 16-17 ऊळतेके मकिदुनिया पटटे कमसेकम मूंड सहर्कनगा विस्वसिरा मुल मता इनजि माक तेळियिह्ता - पिलिपि, तिसलुनि, बिरिया. इद पटि कुरिंत सहर मनदनद अकाया पटटुह्क दल्गिस मता.
✡8:15 8:15 निर्गमन 16:18
†8:15 8:15 इस्रयेलतोर पेळ्ह्कल बूमते तिरियनेके ओर मना तिंडि तिंदुर, अस्के अद तिंडटुन पेह्कतस्के ओर्विह्क-ओर्विह्क तमा लोता मुडा इसबते बराबर आलनाह दोर्कता.