6
1 माट देवुळता संगे कबळ कीय्ह्नोम, अदिनेनाह्क मीक अर्जि कीस वेहतह्नोम. मीट देवुळता दयातुन दोर्किह कीतिर, ताना लेह्कान पिसाट. तान सीता केवालेवा मनमाट. 2 देवुळता सास्त्रमतगा अद तना वेहतद पोल्लो इद्रम रासतद मन्ह्ता:
“ओप्पनद कगोते नना मीवाङ केंजतन,
मीक पिसिह कीयनद दियाते नना साय्ता कीयलाह वातन,”✡ 6:2 यशायाह 49:8
इनजोर इता, इदिन सीता कीम्ह्टु. नना मीक वेहतलाह आतन, देवुळता ओप्पनद कगो इदे आंदु. अद पिसिह कीयनद दिया इदे आंदु.
3 मावा सेवातुन बोरे पास्कनद आयो इनजि, बेदे पोल्लोते, दुस्रोरिह्क एग़्कुळ आयमाकि इनजोर पिसिह्नोम. 4 मति सबे पोल्लोने माट देवुळता सेवातोरोम इनजोर तोहतह्नोम. रीतरीतिनाङ तिपल्कने, दोकाने, कंडिसतनमते, दीरा पोस मह्नोम. 5 मन्कलोर माक नल्हतह्तोर, जेलते वाटिह्तोर, लोकुरिन जमा कीसि मावा विरुद रोदा पोयह्तोर, बागिस-दोगिस कह्टेम कीय्ह्नोम, उस्कंडलेवा मह्नोम, कग़्वते मह्नोम. 6 इद्रम मन्जाय मति माट कसुरलेवा पिससोरे, देवुळता बुदतुन पुनजोरे, बेदे पोल्लोते मुयोग़ आयवा, दुस्रोरिन गूनम तोहचोरे, ओरिन जीवाताहि जीवा कीसोरे, देवुळता जीवा वेहतप ताकसोरे, 7 सेतेम पोल्लोतुन पोकुर कीसोरे, देवुळता लाव माक ताकिह कीसोरे, ईनाह-आनाह विरुद वातेक तेला देवुळ माक ईतद सेतेमि मावा कयदे तल्वरलेह्काडा, अहे माक राका कीयनद वने; 8 दुस्रोर माक मान ईतेकाय, पास्कतेकाय, माक लागोर इतेकाय, बेसतोर इतेकाय. उच्वुर माक नाळेह केवालोर इतेकाय, माट सेतेमतेन ताकिह्नोम. 9 उच्वुर माक अदिकरलेवोर इन्ह्तोर, वेल्लाटोर बार माक किर्स्तुना बळयिर इनजि बेस पुन्ह्तोर. डोललाह आतोर इनजोर मन्कलोर माक इन्ह्तोर, मति इदु! माट जीवातेन मह्नोम. देवुळि माक सुद्रे कीसोर मन्ह्ताये, मति मावा जीवातुन ओयो. 10 दुकम आतेक तेला बेस गिर्दा आस मह्नोम. माट कोताङ लेवोरोम मह्नोम, मति वेल्लाटोर मन्कलोर देवुळता बेरा बर्कततुन दोर्किह कीयनाह कीय्ह्नोम. मयगा बाताले इलवेक तेला किर्स्तुनग्डाह दोर्कनव सबेटव मयेनाह्के मन्ह्ताङ.
11 कुरिंत सहरतोरिर! मीक पकाय जीवा कीय्ह्नोम, मीक मकिह कीतद पोल्लो बेदे मावा जीवातगा इले. 12 माट मीक जेक तासोम, मीक बारा मावा एरे वाया वसो. 13 तपेना लेह्कान मीक वेहतलाह आतन: माट बेद्रम मीक जीवा कीय्ह्नोम, अद्रम माक वने कीम्ह्टु!
विस्वसिरा ओसो विस्वस केवोरा पोल्लो कलियो
14 विस्वस केवोरा संगे उंदिय जुवाते जोळ आस मनमाट. बेसता पोल्लो लाग्वा पोल्लोता संगे जोळेम आया पग़यह्ताया? वेह्च ओसो ईकळ गोत आया पग़यह्ताङा? 15 किर्स्तु ओसो देयह्कना मुक्याल* 6:15 देयह्कना मुक्यान “बलियाल” इनजोर वने इन्ह्तोर. बह गोत आस मन्ह्तोर? विस्वस कीतोना, विस्वस केवोना संगे बाताल कबळ मन्ह्ता? 16 देवुळ मनदनद मंदिरतगा बह बोमाङ मन्ह्ताङ? सास्त्रमतगा देवुळि वेहतद इद पोल्लो रासतद मन्ह्ता:
“नना नावा मन्कलोर मनदनगा जागा आयकन. ओरा संगे मनदकन.
नना ओरा देवुळ आयकन. ओर नावा मन्कलोर आयनुर,”✡ 6:15-16 लैव्यव्यवस्था 26:11-12; यहेजकेल 37:27
इनजोर रासतद मन्ह्ता. अद इसबते माटे जीवात मनदनद देवुळता मंदिर! 17 इद्रम वने रासतद मन्ह्ता:
“अदिनेनाह्क ओरग्डाहि पेसिस वाटु,
ओरग्डाह एग़िस मन्ह्टु.
कळ्वोग़ आतदिन इटमाट,
अस्के नना मीक एरे कीकन.”✡ 6:17 यशायाह 52:11
18 “नना मीवा बाबानन आयकन.
मीट नावाङ मग़्क-मयस्क आयकिर इनजोर बेरा लावता सामि देवुळि इन्ह्ता,”✡ 6:18 2 शमूएल 7:14; 1 इतिहास 17:13; यशायाह 43:6
इनजोर रासतद मन्ह्ता.