15
Èbe ri roo Yesus la hedꞌapa Gubernur Pilatus
(Mateo 27:1-2, 11-14; Luka 23:1-5; Johani 18:28-38)
1 Rai jꞌami ae, harièle roo do era pa era hèpo kewèlu helaꞌu lii ta pemade Yesus. Ta ujꞌe ke ne ai Noo, jꞌe èbe la nga Gubernur Pilatus. 2 Ta dꞌai nga gubernur, ta kebꞌali ke pa Yesus, mihe ane, “Mi namii? Petuu tèra ke Èu ta duae do Jahudi?”
Ta bꞌale ke ri Yesus, “Tèra. Petuu ke ne lii pali Ama Gubernur.”
3 Ta pedae ke ri mone ketèu pa kètu agama he nga gubernur, mihe ane, “Adꞌo ke ta hudi we ne hala dèu na dꞌee!” Ta nèjꞌi ke ri roo harièle ne hala Yesus.
4 Ta kebꞌali wari ke gubernur pa Yesus, mihe ane, “Rènge dꞌo ri Èu ne lii pedai roo? Ae ke ne hala Èu, ne pika roo. Bꞌale ko ri Èu ta!”
5 Bꞌale dꞌo ri Yesus he ubꞌa he, tade madalae gubernur.
Hèpo ri Pilatus ta pemade Yesus
(Mateo 27:15-26; Luka 23:13-25; Johani 18:39—19:16)
6 Pa tima hewue tèu-hewue tèu, pa lodꞌo ngaꞌa-kewèhu Paska Jahudi, dèu lowe ami pa gubernur ta gole he dèu ti dꞌara èmu bꞌèdo, pedutu lii ami roo. 7 Pa awe do na ène, era he dèu do bꞌèdo, ne ngara Barabas. Ne kèpe noo do uru he, pelai ta pelawa nga do pereda Roma, nga pemade dèu. 8 Ri umu ke ne lodꞌo ngaꞌa-kewèhu Paska, ku ae ke ne dèu do kako nga gubernur, la pekaa, ane roo, “Ama gubernor! Dꞌai ke pa lodꞌo kewèhu Paska. Ki ie he, gole wie jꞌii he dèu ti dꞌara bꞌèdo, pedutu tima.”
9 Ta kebꞌali ke gubernur, “Naduu ke do ta gole ri yaa? Mi namii ki gole ri yaa ne duae do Jahudi dꞌee? Hèmi muu, we adꞌo?” 10 Pedai gubernur mi nahère, ne petuu he, do toi tèra ke ri noo, ta mone ketèu pa kètu agama he ne èbe Yesus nga noo, pelai ti rihi bubu dꞌara nga Yesus.
11 Ri mone ketèu pa kètu agama he, ubu made ne dèu lowe he, lii ta ami pa gubernur, mihe ane, “Wae dꞌo jꞌii nga Noo! Gole we Barabas!”
12 Ta kebꞌali rike gubernur, mihe ane, “Ki mi nahère, ta tao mi namii ke ri yaa pa Yesus, do pale ta ‘duae do Jahudi’ na dꞌee?”
13 Ta pekaa ke roo hari-hari, mihe ane, “Pemade we Noo! Raje Noo pa ajꞌu ketoe!”
14 Ta kebꞌali ke gubernur, “Nengaa ke ne hala Noo? Pereha ri yaa, bꞌule dꞌo Noo nga hala!”
Juu mèdu ne lii pekaa roo, “Pemade we Noo! Raje Noo pa ajꞌu ketoe!”
15 Mijꞌi mengèlu dꞌara dèu lowe, ta gole ke Barabas ri gubernur, pedutu lai dꞌèi roo. Ta pereda ke ri noo pa dèu jaga he, ta la wèbe Yesus ri gui.* Horodꞌadꞌu Roma he do pake gui do èpe ti kuri bꞌada. Patima èpi heo. Jꞌe èke ri rui do meriu, kiadꞌo ti temèru do meriu pa huu dari nee. Ki wèbe loro-loro ri gui nee, tala ne kuri dèu. Ta èla pewèbe, ta èbe ke Yesus ri horodꞌadꞌu, ta la raje mijꞌe ta made pa ajꞌu ketoe.
Yesus wuhe dꞌabe, jꞌe mare-dꞌole ri horodꞌadꞌu
(Mateo 27:27-31; Johani 19:2-3)
16 Pa awe do na ène, ta nune ke Yesus ri horodꞌadꞌu he la kebꞌèla kato roo.† Ne era pee horodꞌadꞌu he, patima ne pale pa dꞌara lii Latin, ne ngara noo, praetorium. Ne benteng roo pa dꞌara rae gubernur. Pedutu Alkitab lii Yunani, ne horodꞌadꞌu do pekupu he, he speira, era do èna ngahu dèu he, helaꞌu nga he batalion. Ta pedoa ke ne ihianga roo he batalion. 17 Ta pepake ke ri roo Yesus hewue bꞌajꞌu merai do wo kelere mea, do tima ta pake ri duae he. Jꞌe ènyo ri roo ne tèdꞌu ngati kelai ajꞌu do dudu. Petèdꞌo, jꞌe ènye pebꞌère pa kètu Yesus. Ne tao roo mi nahère, ta mare-dꞌole Yesus, ta mii dꞌede he dèu duae do wiu, pepake tèdꞌu duae.
18 Ta mare-dꞌole rike Yesus ri roo, ta petabꞌe nga Noo, mihe ane, “Helama pereda, Muri Mone, duae Jahudi!” 19 Hengaja roo ta peruꞌu èni pa hedꞌapa Yesus. Jꞌe hebue-hebue ri ilu roo pa tanga mada Yesus. Jꞌe wuhe dꞌabe ri ajꞌu pa kètu Yesus ri roo. 20 Ta bꞌenya roo ne tao pa Noo, ta boke ke ne bꞌajꞌu do womerai nee. Jꞌe pepake wari ri roo ne bꞌara pake Noo. Ta èbe ke Noo ri roo la tele kota Yerusalem, mijꞌe ta la raje ketoe Noo tade made.
Raje pebꞌarèpa ri roo Yesus pa ajꞌu ketoe
(Mateo 27:32-44; Luka 23:26-43; Johani 19:17-27)
21 Pa telora rujꞌara ti Yerusalem, pehapo roo nga he dèu do dèka ngati kota Kirene. Ne ngara noo, Himo, ama ri Aleksander nga Rufus. Ta maho kowe noo la kota Yerusalem, moko ta kèpe ri horodꞌadꞌu he, jꞌe pehèhe noo ta pehape ne ajꞌu ketoe Yesus.✡ Roma 16:13 22 Ta nune-hèpe ke ri roo Yesus, tade dꞌai la hewue era, ne ngara Golgota, ne helaꞌu mi ‘era rui kètu’. 23 Pa nii, do ta pengino ri roo nèbꞌo èi ago do menyilu do pehiwe ri ruajꞌu, mijꞌe ta dꞌo rihi noho pèda. Tapulara wae dꞌo Yesus ta ngino. 24-25 Ta èla pe mi nahère, ta raje ke Yesus pebꞌarèpa pa ajꞌu ketoe ri roo. Jꞌe petito ri roo ne ajꞌu ketoe nee, era wèba heo jꞌami ae he. Ta pepili ode ke ne horodꞌadꞌu he, mijꞌe ta toi ta nara naduu ne bꞌara pake Yesus.✡ Lii Wue-Waje 22:19 26 Ta bꞌuke ke roo pa bèla papa, jꞌe raje pa huu ajꞌu ketoe, pemira wukolo Yesus, mihe ane:
“Na dꞌee ke, Duae do Jahudi”
Na ène ke ne kepue hala ta wole Yesus. 27 Pa ène lema, ketoe pemade ri roo do dꞌue mone tao kenyaꞌu nga apa-kerewe. He dèu pa hebꞌèka kedꞌanga, nga he dèu pa hebꞌèka keriu Yesus. 28 [Nahère, do lore do hure do bꞌuke ke, “Ne tao roo pa Noo, mii pa dèu do tao apa-kerewe.”]‡ Pa dꞌara Alkitab lii Yunani do rai uru jꞌara, adꞌo do era ne ayat 28 na dꞌee. ✡ Yesaya 53:12
29 Harièle dèu do lake jꞌara ène, ngède Yesus do ketoe. Ta piku-piku kètu ke roo, jꞌe mare pemekae dꞌara Noo ri roo, mihe ane, “Eeh! Adꞌo Èu ke do lii, ta bꞌage pemenyèle ri Èu Èmu Kepue Hebꞌajꞌa pa Deo, jꞌe pekèdꞌe wari pa dꞌara tèlu lodꞌo, we adꞌo?✡ Lii Wue-Waje 22:8; 109:25; Maꞌu 14:58; Johani 2:19 30 Hèku ko Èu ta puru ti kolo ajꞌu ketoe nee, mijꞌe bèla kètu Èu. Ki mi nahère, jꞌeꞌitu parahajꞌa jꞌii ta Èu tèra ke ne Ana Deo.”
31 Mi nahère lema, ne mone ketèu pa kètu agama he nga guru agama he, ne mare-dꞌole Yesus, mihe ane, “Pehelama ri Noo dèu do hewala, tapulara nara dꞌo ta pehelama ne ngiꞌu Noo miha! 32 Do pika wari èni Noo, ta Noo ke ne ‘Kristus’, dèu do jaje ri Deo rai uru. Lii dèu do hewala, Noo ne Duae do Israꞌel. Ki do petuu ke mi nahère, hèku ko Noo ta puru ti ajꞌu ketoe dꞌee, mijꞌe ngède ri dii. Ki mi nahère, parahajꞌa ke dii nga Noo.”
Hari do dꞌue dèu do ketoe helaꞌu nga Yesus he, pedutu lema ta mare-dꞌole Noo.
Lua made Yesus
(Mateo 27:45-56; Luka 23:44-49; Johani 19:28-30)
33 Pa awe do na ène, ta kerèba guru rai ke ne era na ène, rai nètu lodꞌo tade wèba tèlu mako lodꞌo. 34 Pa dꞌara wèba tèlu, ta pekaa ke Yesus pa dꞌara lii Aram, mihe ane, “Eloi! Eloi! Lama sabaktani?” (Ki pebꞌale pa dꞌara lii rai dii, “Wo Muri Yaa! Deo Yaa! Ta ngaa ke Ama ku naja kejꞌunga, jꞌe hane Yaa mi nahee?”)✡ Lii Wue-Waje 22:2
35 Era do pèri dèu do umu pa ène, do rènge ne lii pekaa Yesus. Ta lii ke roo, “Weh! Dꞌèno ko ri muu. Nèi ke ri Noo ta pedoe Elia, mone ubꞌa ngati Deo do uru ne!” 36 Mèri-mèriai he dèu la èba boroo la pehèbꞌo pa èi ago do menyilu. Tèbꞌo ri kèji ne boroo nee, jꞌe pejꞌole la kuri ubꞌa Yesus, mijꞌe ta hemuhe ri Noo, jꞌe lii, “Mata ko! Heleo ko ri dii! Ngita dèka tèra Elia ma pepure Noo ti ajꞌu ketoe dꞌee.”✡ Lii Wue-Waje 69:22
37 Moko ta pekaa wari ke Yesus, jꞌe made.
38 Pa dꞌara Èmu Kepue Hebꞌajꞌa pa Deo, era ne bꞌèla do perète ta pewate Kama do Mèu do Megala. Pa awe hèpo hengaa Yesus, ne bꞌèla mehèri pedꞌue rai ti dꞌèia, hape la dꞌaꞌi.✡ Do Israꞌel Mèhu èni ti Masir 26:31-33
39 Pa Golgota, era he dèu kètu horodꞌadꞌu do jaga, do titu peꞌumu nga ajꞌu ketoe Yesus. Ta ngède ri noo ne lua made Yesus, ta kebꞌèdi ke noo. Jꞌe lii, mihe ane, “Wii! Tèra-tèra, Dèu na dꞌee, Ana Deo!”
40-41 Pa ène, era lema do pèri dèu mobèni, do titu ti jꞌèu, do ngède ne lua made Yesus. Mobèni nahère, do tima ta pemoke Yesus he pa Galilea. Ne ngara mobèni he, Salome, Maria ti rae Magdala, nga Maria do wala (ri ina ri Jꞌako do ngèru, nga Yoses),§ Pa dꞌara do bꞌuke pa lii Yunani, era hadꞌe do bꞌuke ta ‘ina ri Yoses’, era lema do bꞌuke ta ‘ina ri Yosef’. nga era ri ko mobèni do wala, do dèka pedutu Yesus hape la Yerusalem.✡ Luka 8:2-3
Lua pedane Yesus
(Mateo 27:57-61; Luka 23:50-56; Johani 19:38-42)
42-43 Èla pe na ène, era he dèu do kale pengee ta dꞌèi ta pepure ngiꞌu Yesus ti ajꞌu ketoe. Ne ngara noo Yusuf, ti rae Arimatea. Noo lema he dèu ti telora mone hèpo kewèlu pa dꞌara agama Jahudi. Noo he dèu, mone mola ngee. Noo lema pa dꞌara ta mata ne dèka lua pereda Deo.
Made Yesus, lèka pa hari lèmi. Bꞌèli rai nee, lodꞌo hebꞌajꞌa do Jahudi. Ri harièle mii ke, ku dꞌèi ke Yusuf ta la pepure mèriai ne ngiꞌu Yesus. Ta pebꞌani dꞌèlu ke noo, ta la ame ne ngiꞌu Yesus pa gubernur Pilatus. 44 Ta rènge ne lii ami Yusuf mi nahère, ta hengodo ke noo, jꞌe lii, “Weh! Made dꞌènge ke Noo? Ne pengee ri yaa, adꞌo mi nahère.”
Ta pejuu ke ri noo dèu la pedoe ne kètu horodꞌadꞌu do jaga. Jꞌe kebꞌali noo, “Mi namii we? Do made tèra ke Yesus, we adꞌo?”
45 Ta bꞌale ke ri kètu horodꞌadꞌu nee, mihe ane, “Made rai ngine heke, Ama, ee.” Ta rèngi ri gubernur ta do mi nahère, ta lii ke noo pa Yusuf, ta la èbe ne ngiꞌu Yesus.
46 Ta pekèdꞌe ke Yusuf la Golgota. La pepure ri noo ne ngꞌiu Yesus ti ajꞌu ketoe. Ta wute ke ri noo ne ngiꞌu Yesus pe woꞌie-ie, ri bꞌèla do wiu, do maha kebꞌue. Pa awe do na ène, ta èla kowe roo, pe kei hewue roꞌa naba ta tuu rae dare pa bꞌojo wowadu. Ta heroꞌe ke ri roo ne ngiꞌu Yesus la dꞌara roꞌa ène. Jꞌe riho ri roo hewue ne wowadu kebꞌèla do worena, la henèbꞌe ne ubꞌa roꞌa ène. Ta bꞌale ke Yusuf he.
47 Pa awe na ène lema, Maria ti rae Magdala, nga Maria do wala (do ina ri Yoses ne), do pedutu hape la nii. Do toi woie ke ri roo dꞌue, ne era pebꞌèjꞌe Yesus.
*15:15 Horodꞌadꞌu Roma he do pake gui do èpe ti kuri bꞌada. Patima èpi heo. Jꞌe èke ri rui do meriu, kiadꞌo ti temèru do meriu pa huu dari nee. Ki wèbe loro-loro ri gui nee, tala ne kuri dèu.
†15:16 Ne era pee horodꞌadꞌu he, patima ne pale pa dꞌara lii Latin, ne ngara noo, praetorium. Ne benteng roo pa dꞌara rae gubernur. Pedutu Alkitab lii Yunani, ne horodꞌadꞌu do pekupu he, he speira, era do èna ngahu dèu he, helaꞌu nga he batalion.
✡15:21 Roma 16:13
✡15:24-25 Lii Wue-Waje 22:19
‡15:28 Pa dꞌara Alkitab lii Yunani do rai uru jꞌara, adꞌo do era ne ayat 28 na dꞌee.
✡15:28 Yesaya 53:12
✡15:29 Lii Wue-Waje 22:8; 109:25; Maꞌu 14:58; Johani 2:19
✡15:34 Lii Wue-Waje 22:2
✡15:36 Lii Wue-Waje 69:22
✡15:38 Do Israꞌel Mèhu èni ti Masir 26:31-33
§15:40-41 Pa dꞌara do bꞌuke pa lii Yunani, era hadꞌe do bꞌuke ta ‘ina ri Yoses’, era lema do bꞌuke ta ‘ina ri Yosef’.
✡15:40-41 Luka 8:2-3