11
Yesus maho la Yerusalem, lere ri dèu lowe nga hodꞌa-kejꞌeka mi lere he dèu duae
(Mateo 21:1-11; Luka 19:28-40; Johani 12:12-19)
1 Ta umu roo nga kota Yerusalem, ta dꞌai ke roo la rae Betfage nga Betania, pa keraha bꞌojo Saitun.* Ne pehune ne ngara noo ta bꞌojo ‘Saitun’, ri pa ène do era dꞌai ae ne dꞌoka saitun. Lema era ngapi wo saitun mita nara èi mènyi. Ne jꞌèu bꞌojo Saitun ngati Yerusalem, era ma hekilo he. Ta pengaha ke Yesus he, he melila pa ène. Ta pejuu uru ke ri Yesus do dꞌue ne ana ajꞌa Noo. 2 Nga lii, mihe ane, “Kako uru ko muu la rae na nii. Dꞌai muu ne maho la dꞌara rae nee, do tangède ri muu he ngiꞌu ana keledei do èke. Adꞌo dae do ngèdi ta menyaꞌe ri dèu. Maꞌe ri muu jꞌe peraꞌo ma dꞌee. 3 Kiri era dèu do kebꞌali pa muu, ‘Peraꞌo ta ngaa ri muu ana keledei nee?’ Pika ri muu, ‘Ta paraluu Muri dii. Kiri moko ne pake, ta pebꞌale dꞌènge ma.’ ”
4 Ta pekèdꞌèike roo dꞌue la nii. Era tèra ke, ne ana keledei ne do èke pa hedꞌapa èmu pa ngidi rujꞌara. Ta maꞌe ri roo, jꞌe peraꞌo. 5 Ta kebꞌali ke ne dèu do titu pa ène, mihe ane, “Ta ngaa! Ku peraꞌo ri muu ne ana keledei ne?”
6 Ta bꞌale ke ri roo, mihe ane, “Ta paraluu Muri dii. Kiri moko ne pake, do ta pebꞌale dꞌènge ma ri jꞌii ma dꞌee.” Ta hani ke ri dèu he, ta peraꞌo ri roo ne ana keledei nee. 7 Ta peraꞌo ke ri roo la wie pa Yesus. Ta wèle ke ri roo ri hijꞌi pa dèni ana keledei nee, jꞌe jꞌole pa Yesus ta menyaꞌe.
8 Ta dꞌai roo ta umu dꞌara kota, hèga ne dèu he la wèla ne bꞌara pake roo pa dꞌara rujꞌara. Era lema hadꞌe do la para ruajꞌu do mii runyiu he† Ne do bꞌuke ri Markus ‘kelai ajꞌu’. Tapulara pedutu nga do bꞌuke pa Johani 12:13, rèu palèm do mii runyiu. pa ngidi rujꞌara, jꞌe la wèla pa rujꞌara, do ta lake ri Yesus. Ne tao roo mi nahère, he èhi pekebꞌue Yesus ta mihe dèu duae. 9 Era hadꞌe do peꞌuru èni nga Yesus, era hadꞌe do lere Yesus. Ta hodꞌa-kejꞌeka ke roo, mihe ane,
“Hosana! Pekelode ne ngara Deo!‡ Pa dꞌara lii Aram, ‘Hosana’. Ne pedèbꞌo nee, ‘wie ri noo ne helama’. Do tima ri roo ne pake ta wue-waje Deo.
Ta wie ri Deo ne mèngi pa dèu do dèka nga ngara Deo,
ri Noo ke do pejue ri Deo.✡ Lii Wue-Waje 118:26
10 Hosana! Pekelode ne ngara Deo!
Ri Deo miha do tama pekèdꞌe wari kuaha pereda duae Dau!
Hosana! Pekelode ne ngara Deo!
Ri Deo ke do mejèdꞌèita pereda ti liru-bèla do ketutu!”
11 Ta dꞌai Yesus he la dꞌara kota, ta maho ke roo la kebꞌèla rae Èmu Kepue Hebꞌajꞌa pa Deo. Pereha ri Noo hari hewue ne dꞌara kebꞌèla rae Èmu Hebꞌajꞌa nee. Tapulara ri umu ke ta jèna lodꞌo, nara dꞌo ke roo tatao nengaa wari pa ène, ta bꞌale ke roo la rae Betania.
Pereda ri Yesus pa he kepue ajꞌu lii ta bꞌole wue wari
(Mateo 21:18-19)
12 Ta jꞌèmi ae do bꞌèli rai nee, ta pekèdꞌèike roo ti Betania bꞌale la kota Yerusalem. Pa telora rujꞌara, ta menganga ke Yesus. 13 Ta ngède ke ri Noo he kepue ajꞌu pa ngidi rujꞌara. Do tima tangaꞌe ri dèu ne wue noo.§ Pa dꞌara lii Jꞌawa, mihe ane, ‘pohon ara’. Tapulara pa dꞌara lii rai Yunani, sukei. Pa dꞌara Buku Deo, do peke mii ajꞌu do tima ta ngaꞌe ne wue noo. Pa Indonesia bira dimu, ne wue ‘pohon ara’ ène, adꞌo do ngaꞌe ri dèu. Tapulara, piꞌadꞌo ajꞌu pa rai dii do helaꞌu nga ajꞌu sukei pa Israꞌel, mii do pedꞌèie pa Alkitab. Ta kako ke Yesus la peꞌumu-èni, la heleo ngee ta do era nga wue. Ta dꞌai Noo la kepue ajꞌu nee, heleo ri Noo bꞌule dꞌo nga wue, rèu ne we do bibu. Pa dꞌara awe do na ène, adꞌo tèra ma do awe wue. 14 Ta lii ke Yesus pa ajꞌu na ène, “Pelai ti dodꞌo bꞌule èu nga wue tu Yaa, jꞌari ngati awe na dꞌee, bꞌole era wari èu nga wue ta wie pa dèu do hewala!”
Rèngi lema ri ana ajꞌa Noo ne hekoto lii pedai Yesus pa ajꞌu nee.
Yesus maho la dꞌara Èmu Kepue Hebꞌajꞌa pa Deo. Bꞌagi pemenyèla ri Noo ne era pewie pa nii
(Mateo 21:12-17; Luka 19:45-48; Johani 2:13-22)
15 Ta èla pe mi nahère ta nèru ke roo teruu la Yerusalem. Maho ke Yesus la dꞌara Èmu Kepue Hebꞌajꞌa pa Deo. Pa kebꞌèla rae Èmu Hebꞌajꞌa na ène, do tao mi paha he ri dèu ta pewie koro jꞌawa, ta bꞌara jꞌola wie Deo. Ta ngèdi ri Noo mi nahère ta hudꞌèila tele ke ri Noo. Nyèka ri Noo pekebꞌèla ne meja-meja pehuru doi, lema bꞌagu-bꞌagu ihi dꞌaga koro jꞌawa he. 16 Lara ri Noo harièle dèu, ta bꞌole lake nga èba nengaa we, jꞌara dꞌara rae Èmu Hebꞌajꞌa ène. 17 Ajꞌa ri Noo dèu, ane Noo, “Do toi ke ri muu, nengaa ne do hure do bꞌuke, mihe ane, ‘Ne peꞌera ri Yaa ne Èmu na dꞌee, tuu harièle kejie dèu, ta maa hebꞌajꞌa pa dꞌee.’ Tapulara lare ri muu ne Èmu na ène, ta era pekupu do peraba dèu!”✡ Yesaya 56:7; Yermia 7:11
18 Ta rèngi ri mone ketèu pa kètu agama he nga guru agama he ne lii pedai jꞌara lua tao Yesus do mi nahère, bubu dꞌara tèra roo. Moko ke roo ta kale rujꞌara ta pemade Noo. Tapulara megꞌigꞌi roo, ri ae tèra ke ne dèu do dꞌèi nga lii ajꞌa Noo.
19 Ta umu ta jèna lodꞌo, ta pekèdꞌèike roo ti kota Yerusalem, la bèjꞌi la Betania.
Kiri ta parahajꞌa tèra dii pa Deo, do ta wie ri Noo nengaa we ne do ami dii
(Mateo 21:20-22)
20-21 Ta jꞌèmi ae do bꞌèli rai ène, ta bꞌale rike roo la Yerusalem. Dꞌai le telora rujꞌara, ta lake ke roo jꞌara ajꞌu do midꞌa nee, do pedai lii Yesus nga noo nee. Ta ngède ne ajꞌu na ène, ta madalae ke ne ana ajꞌa Noo he harièle, ri made ke hari nga amo nee, ne ajꞌu na ène. Ta henge ke ri Petu ne lii pedai Yesus pa ajꞌu na ène. Ta lii ke noo, “Ama! Heleo ko ri Ama ne ajꞌu do midꞌa nee, do wole ri Ama nee, made ke!”
22 Ta bꞌale ke ri Yesus, “Do tèra! Hadꞌèita parahajꞌa lema muu pa Deo mi nahère. 23 Kiri parahajꞌa tèra muu, nara lema muu ta lii pa hewue lede, ta bꞌita èni jꞌe lari èni la dꞌara dahi ae. Do ta lare ma ri Deo ne lede na ène, ki parahajꞌa muu nga petuu. Parahajꞌa we muu nga ketèra pa Deo.✡ Mateo 17:20; 1 Korintu 13:2 24 Naa, bꞌole bèlu, oo! Hadꞌèita parahajꞌa tèra muu ta Deo do nara ta wie nengaa we ne do ami muu, do ta wie tèra ma ri Deo pa muu! 25 Tapulara ki hebꞌajꞌa muu, jꞌe era nga pengee do apa nga dèu do wala, la peꞌie uru ko nga dèu na ène. Mi nahère lema Ama muu pa liru-bèla do ta lonye-pemèu uru lema ne hala muu. 26 [Kiri era do petèka pengee do apa, nga dꞌo wae ta pehuba hala dèu do wala, tatu Ama muu pa liru-bèla bèlu le dꞌo maa ne hala-ludu muu.”]* Pa dꞌara Alkitab lii rai Yunani do rai uru he, adꞌo do bꞌuke ne ayat 26 na dꞌee. ✡ Mateo 6:14-15
Pekebꞌali jꞌara lua higa Yesus
(Mateo 21:23-27; Luka 20:1-8)
27 Ta nèru teruu ke roo. Ta dꞌai le Yerusalem, ta maho ke roo la dꞌara Èmu Kepue Hebꞌajꞌa pa Deo. Ta dꞌai roo la dꞌara rae nee, ta dèka ke ne mone ketèu pa kètu agama he nga guru agama he. 28 Ta kebꞌali ke roo pa Yesus, “Naduu do pepue Èu ma tao kenyaꞌu pa dꞌee midꞌa dꞌee? Naduu ne do wie higa pa Èu?”
29 Do toi ri Yesus ne lua pedèbꞌo roo ta kale rujꞌara ta pebue Noo. Ta bꞌale ri Yesus pa roo, “Ta kebꞌali lema Yaa pa muu. Bꞌale uru ri muu ne lii kebꞌali Yaa, jꞌeꞌitu wie muu ri Yaa ne lii bꞌale! 30 Ne lii kebꞌali Yaa mi nahee: tade ri muu Johani, mone peherani dèu. Naduu do pejue noo la peherani dèu? Deo, we dèu rai-wawa?”
31 Ta pengee bꞌale-bꞌale ke ri roo, jꞌe pelii roo, “Wee! Apa ke dii! Ki bꞌale ri dii, ‘ta pereda ri Deo’, lii Noo nèbꞌo, ‘kiri mi nahère ta ngaa muu ne dꞌo parahajꞌa pa Johani!’ 32 Jadꞌèidꞌo ke dii ta lii ‘ta ti dèu rai-wawa’. Ta kenyaꞌu ke dèu lowe he nga dii. Ri do parahajꞌa tèra ke roo, ta Johani, mone ubꞌa ngati Deo.”
33 Ta lii ke roo pa Yesus, mihe ane, “Toi do ri jꞌii!”
Moko ta lii ke Yesus pa roo, “Kiri mi nahère, wae ledꞌo ma Yaa ta bꞌale ne lii kebꞌali muu, ta naduu ne do wie higa pa Yaa.”
*11:1 Ne pehune ne ngara noo ta bꞌojo ‘Saitun’, ri pa ène do era dꞌai ae ne dꞌoka saitun. Lema era ngapi wo saitun mita nara èi mènyi. Ne jꞌèu bꞌojo Saitun ngati Yerusalem, era ma hekilo he.
†11:8 Ne do bꞌuke ri Markus ‘kelai ajꞌu’. Tapulara pedutu nga do bꞌuke pa Johani 12:13, rèu palèm do mii runyiu.
‡11:9 Pa dꞌara lii Aram, ‘Hosana’. Ne pedèbꞌo nee, ‘wie ri noo ne helama’. Do tima ri roo ne pake ta wue-waje Deo.
✡11:9 Lii Wue-Waje 118:26
§11:13 Pa dꞌara lii Jꞌawa, mihe ane, ‘pohon ara’. Tapulara pa dꞌara lii rai Yunani, sukei. Pa dꞌara Buku Deo, do peke mii ajꞌu do tima ta ngaꞌe ne wue noo. Pa Indonesia bira dimu, ne wue ‘pohon ara’ ène, adꞌo do ngaꞌe ri dèu. Tapulara, piꞌadꞌo ajꞌu pa rai dii do helaꞌu nga ajꞌu sukei pa Israꞌel, mii do pedꞌèie pa Alkitab.
✡11:17 Yesaya 56:7; Yermia 7:11
✡11:23 Mateo 17:20; 1 Korintu 13:2
*11:26 Pa dꞌara Alkitab lii rai Yunani do rai uru he, adꞌo do bꞌuke ne ayat 26 na dꞌee.
✡11:26 Mateo 6:14-15