21
Da Babylon Guys
Goin Take Ova Jerusalem
Goin Take Ova Jerusalem
1 Da One In Charge give one mo message fo Jeremiah. He give um, da time King Zedekiah sen da odda Pash-hur, Malkijah boy, an da pries guy Zefaniah, Maaseiah boy, by Jeremiah. 2 ✡ 21:2: 2Kings 25:1-11; 2Rec 36:17-21Dey tell um, “Try find out fo us guys from Da One In Charge, wass goin happen now. Cuz Nebukadnezzar, da king fo Babylon, stay make war wit us guys. Maybe Da One In Charge goin do someting fo help us guys, jalike da awesome kine stuff he wen do befo time. We like see Nebukadnezzar go home an no make trouble fo us guys!”
3 But Jeremiah tell dem, “Dis wat you guys gotta tell King Zedekiah: 4 ‘Dis wat Da One In Charge, da God fo da Israel peopo, tell: You know da swords an odda tings fo fight dat you guys carry, dat you guys use fo fight da king fo Babylon an da Babylon army guys? I goin take dose tings, an use um fo hurt you guys! Da Babylon army guys stay outside yoa wall all aroun yoa town, Jerusalem, but I goin bring um all inside da middo a dis town! 5 Goin be me dat use my strong powa fo fight you guys! Cuz I stay real huhu, an I no like wat you guys do. 6 I goin bus up da peopo dat live inside dis town, da peopo an da animals too. Dey goin mahke from one real bad kine sick. 7 An Da One In Charge tell wat goin happen afta dat—bout Zedekiah da king fo Judah, his palace guys, an da peopo dat live inside dis big town. He tell wat goin happen to da ones dat still stay alive afta da bad kine sick, an da fighting, an no mo food. Da One In Charge goin give dem to Nebukadnezzar, da king fo Babylon, an to da guys dat stay agains dem an like kill um. An Nebukadnezzar guys goin kill da Jerusalem peopo wit swords. Dey no goin feel pity fo dem o give dem chance.’
8 “Tell da peopo dis too: ‘Dis wat Da One In Charge tell: Lissen up! I give you guys two tings—you guys can pick fo stay alive o fo mahke! 9 Whoeva stay inside dis town goin get kill wit swords, o cuz no mo food, o cuz a da bad sick. But whoeva go out an tell da Babylon guys dat cut off yoa town, dat dey give up, dey goin get outa da war an stay alive. 10 I make up my mind awready dat fo shua da bad kine stuff, an not da good kine stuff, goin happen to dis big town. Da Babylon king goin take ova da town, an he goin wipe um out wit fire.’ Az wat Da One In Charge tell.
11 “An tell da Judah king an his ohana dis: ‘Lissen wat Da One In Charge tell. 12 You David ohana guys, dis wat me, da Boss, tell:
“ ‘Wen you guys judge da peopo,
Do wass right ery morning.
No let da guys dat rip off peopo
Put presha one mo time fo da ones dey wen steal from.
If you no do dat,
I goin come real huhu jalike fire,
Cuz you guys do bad kine stuff.
An no mo nobody goin pio dat fire!
13 Me, I stay agains you peopo
Dat live Jerusalem, on top da level place up da valley,
Jalike one big rock dat no can move.
You guys talk big, “Eh, no mo nobody can come attack us!
No mo nobody can come inside da place wea we stay hide!”
Dass wat me, Da One In Charge, tell.
14 I goin punish you guys
Cuz a da bad kine stuff you guys do.
I goin burn up da wood palace inside yoa town,
An all da odda stuff inside da town too!’ ”
Az wat Da One In Charge tell.