58
Judge Guys Dat No Do Da Right Ting
Fo da main music guy, wit da tune “No Wipe Um Out,” one David kine song fo sing wen get trouble.
1 Eh you leada guys! Az true, o wat?!
Wen you tell wat peopo gotta do,
You suppose to tell um wass right.
But you no do dat!
Wen you judge da peopo,
You suppose to make
Same kine to erybody,
But still yet you guys make
Diffren kine to diffren peopo!
2 Fo shua, inside yoa head,
You tink how fo do bad kine tings.
Dat make you guys ready
Fo bus up peopo all ova da world.
3 Da peopo dat stay do bad kine stuff,
From da time dey born
Dey go da wrong way.
From da time dea muddah
Was hapai wit dem,
Dey stay all jam up.
An wen dey talk, dey bulai.
4 Dey jalike poison,
Da poison from one snake,
Da cobra snake dat make deaf ear.
5 Az jalike wen da guys make music
Fo make da snakes dance.
No matta dey know how
Fo sing real good to da snakes,
Still yet, dat kine snake
No hear notting.
6 Eh God! Punch out da teet
Inside dese bad leada guys mout!
Eh! You Da One In Charge!
Dem guys, dey jalike young lions,
So go pull out dea big teet!
7 I like dem disappea jalike watta
Dat run away
An you no see um no moa.
Wen dey shoot dea arrows,
I like notting happen.
8 I like dem come jalike da snail
Dat leave one track
Dat bumbye disappea,
An I like dem come
Jalike one bebe dat mahke befo born,
Fo him no see da sun.
9 I like fo God wipe out dat kine peopo
Mo fas den can make
One pot come hot
Wen you burn kiawe wood wit thorns,
O burn da dry wood,
O even da wood you jus wen cut.
10 Da peopo dat stay do wass right,
Wen dey see dat God
Pay back da bad guys
Fo wat dey wen do,
Dey goin come real good inside.
Jalike God goin get his feets wet
Wit da blood from da bad guys.
11 Den peopo goin tell,
“Fo shua, God do good tings
Fo pay da peopo
Dat stay do wass right!
Fo shua, get one God dat judge
Da peopo inside da world!”