2
God Goin Punish Da Guys Dat Make Hard
To Da Peopo Dat No Mo Notting
To Da Peopo Dat No Mo Notting
1 “Bummahs, fo da guys dat make plan fo do bad kine stuff!
Dass wat dey tink bout wen dey res on top dea bed.
Den wen da sun come up dey go do um,
Cuz dey get da powa fo do um.
2 Dey fo real kine like grab odda peopo fields fo ony dem,
An steal dea houses.
Dey put presha on peopo an scam um,
Den dey take away dea house an dea property.”
3 Az why Da One In Charge tell dem,
“You guys know wat?! I stay make one plan
Fo punish you buggahs an yoa bad ohanas!
You guys no can get outa dis trouble,
Cuz goin be jalike one yoke stay tie aroun yoa neck
An no can take um off.
You guys goin get real plenny trouble.
Az why you guys no goin walk aroun wit big head!
4 Dat time, peopo goin sing one song bout you guys.
Dey goin make fun a you guys.
Dey goin ack jalike dey cry an make long face.
Dey goin sing dis sad song:
‘Da One In Charge split up oua property!
He take away da land from oua peopo!
Now us no mo notting!
He give oua fields to da guys dat wen make us prisonas!’ ”
5 Az why da peopo a Da One In Charge goin come togedda,
But you no goin get nobody dat can pull straw
Fo tell who goin get wat piece land.
Da Fake Guys Dat Tell Dey Talk Fo God
6 Da bulaia guys dat tell dey talk fo God, dey ack jalike dey da ones, an not me, stay talk fo God! Dey tell me,
“Eh! Micah! No talk bout all dat kine stuff
Jalike you da one stay talk fo God fo real kine!
Da bad kine troubles dat you talk bout,
No goin happen to us guys!
God no goin make us come shame!”
7 But you Jacob ohana peopo,
You guys tink az good you talk lidat, o wat?!
You tink da Spirit a Da One In Charge come huhu too fas?
You tink az how he do stuff, o wat?
Da One In Charge tell:
“Fo shua, wat I tell make good tings happen
Fo da peopo dat do right kine stuff.
8 But right now, my peopo go agains me.
You guys rip off da rich kine clotheses
From da peopo dat come by hea an no mo worry.
Jalike wen guys come home from fight one war.
9 You make da wahines from my peopo run away
From dea nice houses.
You make dea kids so dey no mo da right eva
Fo get all da awesome stuff I like do fo dem.
10 Stan up! Go way!
Cuz dis land not yoa place fo res!
Az cuz you guys wen make da land come all pilau.
Now, stay all jam up an no can fix um.
11 If one guy come bulai you guys an tell,
‘I goin tell you guys wat God tell me—
You guys goin get plenny wine an beer.’
Dat bulaia kine guy goin be da kine talka guy dat you guys like!”
But God Goin Bring Um Back Home
12 God tell:
“Fo shua I goin bring all you Jacob peopo togedda,
An bring togedda da Israel peopo dat stay still yet,
Goin be jalike plenny sheeps inside one fence,
Inside wea get green grass fo dem.
Goin get plenny peopo ova dea.
13 One guy goin bus open da way an go in front dem.
Dey goin bus thru da gate an go outside.
Dea king goin go firs befo dey go.
Da One In Charge goin lead dem.”