50
Bout Da Babylon Peopo
1 ✡ 50:1: Isa 13:1–14:23; 47:1-15Dis da message Da One In Charge give Jeremiah, da guy dat talk fo him, bout da Babylon peopo an dea land. He give um da message fo tell da Jerusalem guys:
2 “All you guys, tell dis to all da peopos!
Make shua dey hear um!
Put up one flag fo dem lissen!
Make shua dey hear da message!
No hold back notting, but tell um dis:
‘Anodda army goin take ova Babylon town!
Da Babylon god Bel goin come shame!
Dey call um Marduk too, an he goin come real sked.
Dea odda idol kine gods goin come shame too.
Da horraz kine idol gods dey pray to goin come real sked.
3 Goin get one peopo
Come from da north side
An attack Babylon town.
Dey goin wase da Babylon land.
So no mo nobody goin live ova dea.
Da peopo an da animals all goin run away from dea,
But dey not goin know wea dey going.’ ”
4 Da One In Charge tell, “Dass goin be da time
Wen da Israel peopo an da Judah peopo
Goin like fo come tight wit dea God, Da One In Charge.
Dey goin cry real hard
Cuz dey like come tight wit him.
5 Dey goin aks how fo go Mount Zion.
An dey goin go dea.
Dey goin go fo make one deal
Fo come tight wit Da One In Charge.
Dey no goin broke dis deal eva,
An dey no goin foget um.
6 “My peopo, dey jalike sheeps dat stay lost.
Dea leada guys, jalike sheep guys
Dat no give a rip wea dea sheeps go.
Wen da sheeps go inside da mountains,
Az cuz da sheep guys wen show um da wrong way fo go.
Da sheeps wen go from one mountain to anodda hill,
An foget wea dea res place stay.
7 Anybody dat find dose sheeps eat um up!
Da ones dat stay agains my peopo tell:
‘Poin finga dem, not us guys, fo us eat um lidat!
Cuz was dem, not us, dat wen do bad kine stuff agains Da One In Charge
An Da One In Charge, he jalike da fo real kine grass land,
He da fo real kine res place fo his sheeps.
Da One In Charge, he da One dea ancesta guys wen wait fo.’
8 ✡ 50:8: JShow 18:4“Dig out from Babylon!
Get out from dea land!
Jalike da goats dat run outa da pen
Befo da sheeps can come outside.
9 Cuz dis wat I goin do:
I goin make some peopos come huhu an come togedda
Fo make one plan fo attack Babylon town.
Da armies from da big countries goin come
From da north side.
Dey goin make ready fo fight.
Dey goin take ova Babylon from da north.
Dea arrows, jalike army guys dat no goin miss,
An erytime dey goin hit wat dey shoot.
10 Az how da army guys goin clean out
Eryting inside da Babylon land.
Dey goin rip off eryting dey like from ova dea.”
Az wat Da One In Charge tell.
11 “Cuz you Babylon guys
Stay real good inside,
An make jalike you da winnas,
Da time you wen rip off my property,
You guys wen feel good jalike one young girl kine cow
Dat jump aroun all ova da grass.
O jalike one strong boy kine horse
Dat stay yell cuz he stay real good inside!
12 Az why you Babylon guys,
Da town dass jalike da muddah fo you guys.
Goin come plenny shame.
Da place wea you wen born goin come plenny shame.
All da odda countries goin come mo importan den Babylon.
No mo nobody goin live dea,
Cuz too dry an notting grow dea.
13 Cuz Da One In Charge tell ‘Laytas’ to wat da Babylon peopo stay do,
No mo nobody goin live ova dea.
Erybody dat pass by Babylon goin make big noise
So da bad kine spirits no come nea,
Cuz da town stay all bus up.
14 “Erybody dat know how fo use da bow an arrow,
Make ready fo fight all aroun Babylon!
Shoot arrows at dem!
No hold back da arrows!
Cuz da Babylon peopo
Wen do bad kine stuff agains Da One In Charge.
15 Yell from ery side wen you start fo fight!
Da Babylon guys goin give up!
Da mos strong part a dea wall goin fall down!
Da res a da wall goin come all bus up!
Dass how Da One In Charge goin pay um back,
So you army guys, pay um back good!
Make to dem jalike dey wen make to da odda peopo!
16 Kill erybody dat plant seed Babylon side!
Kill erybody ova dea dat harves da food wen da time come!
Cuz da army guys goin come wit swords
Fo wipe out da Babylon peopo.
Let all da peopos dat come from odda countries run back dea peopo!
Let um all go back dea land!
17 “Da Israel peopo, dey stay run all ova da place
Jalike sheeps an goats wen da lions chase um.
Da firs lion fo eat um was da Assyria king.
Da nex lion was Nebukadnezzar da Babylon king.
He grind da meat off dea bones.”
18 Az why Da One In Charge, da God Ova All Da Armies, da God fo da Israel peopo, tell dis:
“Me, I stay ready fo punish da Babylon king an his land,
Jalike I wen punish da Assyria king.
19 But I goin bring back da Israel peopo
Jalike dey sheeps dat get dea place fo eat grass.
An dey goin eat grass on top Mount Carmel
An up country Bashan side.
Dey goin eat plenny
On top da hills Efraim side an Gilead side,
Till dey come full.”
20 Da One In Charge tell: “Dat time,
Peopo goin try fo find stuff dat da Israel peopo get da blame fo,
An dey no goin find notting.
Dey goin look fo bad kine tings da Judah peopo do,
An dey no goin find notting.
Cuz I goin let go da peopo dat I let stay alive,
An hemo dea shame.”
How God Goin Punish Babylon
21 “Attack da Babylon peopo
Da ones dat live Meratayim side,
An da ones dat live Pekod side.
Kill dem, an wipe out eryting dey leave,
Jalike wen you kill one animal fo make sacrifice!
Do eryting I tell you fo do.”
Az wat Da One In Charge tell.
22 I hear big noise from da fighting inside da Babylon land.
Soun jalike dey stay bus up eryting big time!
23 Fo shua, befo time da Babylon army was jalike one sledge hamma
Dat wen bus up da whole earth.
But now, dat hamma stay all bus up
An da handle all broke.
Babylon stay da kine place
Dat make all da odda nations tink,
“Skery, wat happen hea?!”
24 You Babylon peopo, you wen go fight me, Da One In Charge!
Az how come I wen make one trap.
An da trap wen catch you guys,
An you neva know, had one trap!
25 Me, Da One In Charge, I wen open up my place
Wea I keep all my stuffs fo fight,
An bring out all da tings I use fo fight
Cuz I stay huhu.
An I Da One In Charge, da Boss, da God Ova All Da Armies.
I get plenny work fo do inside da Babylon land.
26 Go attack Babylon from ery side!
Broke down da storage places wea dey stash da wheat an barley!
Pile up da stuffs you rip off!
Wipe out eryting,
Jalike fo make um come one big sacrifice fo Da One In Charge!
No let nobody from Babylon stay alive.
27 Kill all da bull kine Babylon army guys! Take um down to da killing place!
Ho! Da time stay come fo punish dem.
28 Lissen! Dat noise you hear,
Dass da guys dat stay run away from da Babylon land!
Dey like tell da peopo Jerusalem side
How oua God, dass Da One In Charge a us, stay pay back da Babylon guys awready
Cuz dey wen bus up his Temple.
29 ✡ 50:29: JShow 18:6“Go tell all da guys dat shoot bow an arrow fo come,
Da guys dat know how fo make da bow ready fo shoot,
Fo dem go attack Babylon town.
Go camp all aroun Babylon.
No let nobody get outa dea.
Pay dem back fo wat dey wen do.
Make to dem jalike dey wen make to da odda peopos.
Cuz dey wen get big head an go agains Da One In Charge,
Da God Dat Stay Good An Spesho fo da Israel peopo.
30 Az why da young guys from Babylon
Goin mahke on top da streets.
All dea army guys goin mahke dat time,
An eryting goin come real quiet.”
Az wat Da One In Charge tell.
31 Dis wat Da One In Charge, da God Ova All Da Armies, tell:
“Eh! You get big head.
An me, I stay agains you.
Da time stay come fo me punish you now.
32 You peopo wit big head goin trip an fall down.
No goin get nobody fo help you guys stan up.
I goin make one fire inside yoa towns.
An dat fire goin burn up erybody dat stay aroun Babylon town.”
33 Dis wat Da One In Charge, da God Ova All Da Armies, tell:
“Da Israel peopo stay suffa plenny,
An da Judah peopo too.
All da Babylon guys dat wen make dem prisonas,
No like let um go.
34 But da One dat goin get da Israel peopo outa trouble, stay strong.
Dass Da One In Charge, da God Ova All Da Armies,
Az wat kine god him.
He goin stan up fo dem
Fo dem res real good inside dea land.
But he goin bring trouble
Fo da peopo dat live inside Babylon.”
35 Da One In Charge tell: “Goin get war
Agains da peopo dat live inside Babylon,
An agains dea leada guys
An dea guys dat know wat fo do erytime!
36 Goin get war
Agains da guys dat bulai
An tell, dey can find out stuff from dea gods.
Dey goin ack stupid cuz dey donno Da One In Charge!
Goin get war
Agains dea bestes army guys.
All dose guys goin come real sked.
37 Goin get war
Agains da Babylon guys horses an war wagons,
An agains all da army guys
From odda countries dat stay wit dem.
Dey goin come real sked an lose fight, jalike dey wahines.
Goin get war
Fo take away all dea rich kine stuff.
Da army guys from anodda place goin rip um off.
38 I goin make dea watta ditches come dry,
Cuz da Babylon peopo get plenny idol kine gods.
An dose idol kine gods goin get mad an ack all pupule
Cuz dey goin come real sked.
39 ✡ 50:39: JShow 18:2“Cuz a dat, ony bad kine spirits goin live ova dea,
An hyena kine wild dogs.
Da pueo goin live ova dea too.
But no mo peopo goin make house one mo time inside Babylon,
Fo dem an fo erybody dat goin come from dem bumbye.
40 ✡ 50:40: Start 19:24-25Jalike da time wen God wen wipe out
Da Sodom an Gomorrah peopo,
An da peopo from da odda towns aroun dea,
Az how goin come fo Babylon.
No mo nobody goin live ova dea
Not even fo short time.”
Az wat Da One In Charge tell.
41 “Eh look! Get army guys stay come from da north side!
One supa strong nation, an plenny odda kings wit dem,
Dey stay come from one real far place on top da earth.
42 Dey stay carry bow an arrow an short spear fo fight.
Dey mean, an dey like hurt peopo, an dey no give chance.
Wen dey ride dea horses,
Dey soun jalike big noise from da ocean.
Dey all line up ready fo fight,
An az you guys, da Babylon peopo, dey stay coming afta!”
43 Da Babylon king stay hear bout dis,
An he lose fight.
He no can handle!
He real sore, jalike one wahine dat ready fo born one bebe.
44 Wen dat odda army come, goin be
Jalike wen one lion come up
From da bushes nea da Jordan Riva,
An go one place wea get plenny grass an plenny sheeps.
I goin chase da Babylon peopo outa dea land real quick.
Who da guy I wen pick fo give um dat kuleana?
Who da same jalike me? Who can tell me wat fo do?
Da sheep guy no can handle dis lion,
An dis lion, az me!
45 So lissen up, wat Da One In Charge make plan fo do
Agains da Babylon peopo,
An agains dea land:
Jalike somebody goin drag away da young sheeps,
An Da One In Charge goin wipe out all dea land dat get good grass.
46 Wen da odda armies take ova Babylon town,
Da noise goin make da earth shake.
Da Babylon peopo goin yell loud fo help.
An all da diffren peopos goin hear dat.
✡50:1 50:1: Isa 13:1–14:23; 47:1-15
✡50:8 50:8: JShow 18:4
✡50:29 50:29: JShow 18:6
✡50:39 50:39: JShow 18:2
✡50:40 50:40: Start 19:24-25