Jeremiah
Talk Fo God
1
Da Start
(Galatia 1:15)
1 Dis wat Hilkiah boy Jeremiah tell. Hilkiah, he one a da pries guys dat live Anatot town, inside da Benjamin ohana land. 2 ✡ 1:2: 2Kings 22:3–23:27; 2Rec 34:8–35:19Wen Amon boy Josiah stay king fo da Judah peopo fo thirteen year, Da One In Charge give one message fo Jeremiah tell, firs time. 3 ✡ 1:3 a: 2Kings 23:36–24:7; 2Rec 36:5-8; b: 2Kings 24:18–25:21; 2Rec 36:11-21He give odda messages fo Jeremiah tell too, from da time Josiah boy Jehoiakim stay king fo da Judah peopo till da year numba eleven wen Josiah boy Zedekiah stay king. Dat year Setemba, da Babylon peopo make da Jerusalem peopo come dea prisonas, an take um outa dea land.
Da One In Charge Tell Jeremiah
Talk Fo Him
Talk Fo Him
4 Da One In Charge tell me fo tell da peopo,
5 “Eh Jeremiah! Befo time wen I put you togedda inside yoa muddah, I know you awready.
Befo you born, I make you spesho fo me.
I give you da spesho job
Fo come one guy dat talk fo me to all da diffren peopos.”
6 Me, Jeremiah, tell, “You Da One In Charge, you da Boss. But fo shua, I donno how fo talk good! I ony one young guy, you know!”
7 But Da One In Charge, he tell, “No talk lidat, ‘I ony one young guy!’ Cuz you gotta go talk to erybody I sen you fo talk to, an you gotta tell dem wateva I tell you fo tell um. 8 An no sked a dem wen you go in front dem! Cuz I stay tight wit you, an I goin get you outa trouble. I Da One In Charge, an dass wat I tell you!”
9 Den Da One In Charge touch my mout wit his hand. He tell, “Dea! I give you da words from me fo tell awready!
10 “So lissen up now! Today I give you one importan job,
Fo grumble bout da diffren peopos an dea govmens.
You goin tell um how
I goin pull um outa da groun jalike plants
An bus um up.
I goin wipe um out, an throw out dea kings.
Den I goin build up da diffren peopos one mo time, an make um come solid.”
11 I get anodda message from Da One In Charge. He tell, “Jeremiah, wat you see?”
I tell, “I see one branch from one almond tree.”
12 Da One In Charge tell me, “Az right on, wat you see! An da Hebrew word fo ‘almond’ soun almos jalike da Hebrew word fo ‘watch’. Dass fo you know dat I stay ‘watch’ fo make shua dat eryting I tell goin happen, goin happen!”
13 Den I get anodda message fo me from Da One In Charge. He tell, “Wat you see?”
I tell, “I see one pot. Get watta dat stay boil plenny. An da pot stay lean away from da north side.”
14 Da One In Charge tell me,
“From da north side,
Hard time goin come ova us guys
Fo erybody dat live inside dis land.
15 I stay ready fo call all da peopo fo come
From da kings inside da lands on da north side.”
Dass da message from Da One In Charge.
“Da north side kings goin come put dea thrones ova hea,
Outside da gates fo Jerusalem town.
Dey goin come attack all da walls aroun Jerusalem.
An all da odda towns inside Judah.
16 I goin tell wat I figga bout my peopo, cuz I da Judge.
Cuz a all da bad tings dey stay do—
Dey tell ‘Laytas!’ to me
An burn sacrifice fo odda gods
An go down in front da gods
dey wen make wit dea hands.
17 “Get ready fo work hard, Jeremiah!
Stan up fo tell dem eryting I tell you fo tell.
No sked dem!
Cuz if you sked dem,
Den I goin make you come real sked in front dem!
18 Today, I make you come strong,
Jalike one big town wit one strong wall,
Jalike one iron pos,
An jalike one bronze wall.
You goin stan face all da peopo
Inside da whole land!
You goin go agains da Judah kings an military guys,
Da pries guys an da peopo dat live dea.
19 Dey goin fight you,
But dey no goin win ova you.
Cuz I stay wit you,
An I goin get you outa trouble.”
Az da message from Da One In Charge.
✡1:2 1:2: 2Kings 22:3–23:27; 2Rec 34:8–35:19
✡1:3 1:3 a: 2Kings 23:36–24:7; 2Rec 36:5-8; b: 2Kings 24:18–25:21; 2Rec 36:11-21