1 Dat nite da king no can sleep. Az why he tell his guys bring da record book, da one wea dey write down eryting dat happen from da time he come king. He like fo somebody read um fo him. 2 Inside da book da guy read how Mordecai wen find out bout two a King Xerxes guys dat befo time guard da doors, Bigtana an Teresh. Dey wen make one plan fo murda da king. But cuz a Mordecai no mo notting wen happen. Dass wat stay write inside da book.

3 Afta da king hear dis, he aks, “How we wen show respeck to Mordecai fo do dis?”

Da king helpa guys tell him, “We neva do notting fo him.”

4 Da king tell, “Who stay outside, inside da palace open lanai right now?” Haman wen jus come inside da palace open lanai fo go tell da king fo tell his guys fo poke one long sharp pole thru Mordecai body. Az da pole Haman wen set up fo kill Mordecai.

5 Da king helpa guys tell him, “Haman stay stan outside dea.”

Da king tell dem, “Bring him inside hea.”

6 Wen Haman come inside, da king aks him, “Wat I goin do fo one guy, wen I fo real kine like show respeck fo him?”

Haman tink, “Fo shua, az me he talking bout, cuz no mo nobody da king get mo respeck fo den me!” 7 So he tell da king, “Da guy dat da king fo real kine like show respeck fo, 8 tell yoa guys fo bring one king kine robe fo him, an one horse da king wen awready ride, dat get one king mark on top da horse head. 9 Den give da robe an da horse to one a da king bestes alii fo put da robe on top da guy you fo real kine like show respeck fo, an fo lead da guy on top da horse thru da streets inside da big town, an yell in front him, ‘Dis da kine ting dat da king like do fo da guy he fo real kine like show respeck fo!’ ”

10 Den da king tell Haman, “Go right now. Get da robe an da horse, an do jalike you tell fo Mordecai da Jew, dat stay sit by da king gate. Make shua you do eryting jalike you wen tell!”

11 So Haman go get da robe an da horse. He put da robe on top Mordecai, an lead him thru da streets on top da horse, an yell in front him, “Dis da kine ting da king like do fo da guy he fo real kine like show respeck fo!” 12 Afta dat Mordecai go back by da king gate. But Haman run home quick. He put one cloth ova his head fo cova um, cuz he real shame. 13 He tell his wife Zeresh an his frenz eryting dat wen happen to him.

Da guys dat tell him wat fo do, an his wife Zeresh tell him, “You know, cuz Mordecai one Jew, az why you lose out awready! You no can stan agains him. Fo shua, no way you can win!” 14 An wen dey still yet talk wit him, da guys dat work fo da king come fo take Haman away real fas to da big dinna Esther wen make.