1 Den Amos tell: “One time, Da One In Charge a me wen show me dis. Was jalike one dream: God, he stay pick up uku pile a grasshoppa, same time! Was da time afta da peopo cut da grass fo da king horses, an plant new grass. Da small grass jus start fo come up. 2 I figga, ‘Wat goin happen wen dem grasshoppas eat up da green plants all ova da land?’

“Den I tell God, ‘Bummahs, God! Yeah, you da Boss! But I tell you, try hemo oua shame fo da bad kine stuff we wen do, an let us go. Cuz if you no like let us go, no way us Israel peopo goin stay alive. Oua Jacob ohana, no mo powa, you know!’

3 “So Da One In Charge change his mind bout da grasshoppas. He tell, ‘Da ting you see now no goin happen.’ ”

4 “Anodda time, dis wat Da One In Charge a me wen show me. Was jalike one dream: Da One In Charge a me stay make ready fo punish da peopo wit fire, da kine fire dat even dry up da big watta. Now, dat fire stay ready fo burn up all da fields too!

5 “Den I tell God, ‘Eh! You Da One In Charge a me! You da Boss fo me! But I stay tell you, try no make da fire! How us Israel peopo goin stay alive? Us no mo powa, you know!’

6 “So Da One In Charge a me, he change his mind bout da fire. He tell, ‘Jalike da firs time, wat you see, no goin happen.’ ”

7 Anodda time, dis wat Da One In Charge wen show me. Was jalike one dream: I see my boss. He stay stan dea nex to one wall. He stay pull string fo check out da wall an make shua da wall stay strait. 8 Da One In Charge tell me, “Eh Amos! Wat you see?”

I tell um, “One string jalike da house builda guys pull fo check out if da wall stay strait.”

My boss tell, “I tell you dis: My peopo, da Israel peopo, dey no stay strait inside! I wen check dem out awready, jalike da house builda guy pull string fo check out da wall. Dis time, cuz a da bad kine stuff dey stay do, no way I goin let dem go one mo time.”

9 Da One In Charge tell dis too:

10 One time, had one a da Main Pries guys dat live Bethel side, Amaziah. He wen sen somebody by Jeroboam Numba Two, da king fo da Israel peopo, fo tell um dis: “Amos, he live right hea wit us Israel peopo, but he stay make one plan fo throw you out. Eh! Da tings dis guy stay tell, no good fo da peopo inside oua land hear um! 11 Dis Amos guy, dis wat he stay tell peopo: ‘King Jeroboam, somebody goin kill him wit one sword, an fo shua, dose peopo goin take all da Israel peopo far away from dea land.’ ” Dass wat Amaziah tell Jeroboam.

12 Amaziah wen go talk to Amos too. He tell Amos: “Eh, guy dat talk fo God! Good you run away from hea. Go back Judah side. Be one guy dat talk fo God ova dea, an let da peopo dea pay you fo talk fo God. 13 But no stay talk mo fo God ova hea, Bethel side, cuz dis da spesho place wea King Jeroboam come fo pray, an get oua National Temple ova hea.”

14 Amos, he tell Amaziah: “You know, I not one regula kine guy dat talk fo God. My fadda neva talk fo God too. I not one a da guys talk fo God fo get money. I jus one guy dat take kea da sheeps, an take kea da sycamore kine fig trees too. 15 Was Da One In Charge dat wen tell me fo leave da sheeps. Was Da One In Charge dat tell me, ‘Go! Talk fo me. Tell my peopo, da Israel peopo, wat I tell.’

16 “Eh Amaziah! Now, you gotta lissen wat Da One In Charge tell. You tell me, ‘No talk fo God bout da Israel ohana! No stay teach agains da Isaac ohana!’ 17 But cuz you stay talk lidat, dis wat Da One In Charge tell: