1-2  ✡ 3:1-2: JGuys 17:15You know, dat time wen we gotta go way from you guys, us guys wen feel real sad, cuz we wen like go back fo see you guys, but no can. Dass why we wen sen Timoty by you guys. But me an Silas, we figga mo betta we stay ova hea inside Athens town, ony me an Silas. Timoty, he oua braddah. He da guy dat work togedda wit God fo tell da peopo da Good Kine Stuff Bout Christ. We wen sen um fo help you guys stay strong an solid inside, an fo give you guys good kine words fo you guys trus God mo betta. 3 An we wen sen Timoty fo you guys no presha out wen peopo make you suffa. Cuz you guys know awready dat God let dat kine stuff happen to all us guys. 4 Befo time, wen we was wit you guys, we stay tell you guys ova an ova dat we all goin suffa fo shua. An you guys know dat eryting wen happen jalike we wen tell you guys. 5 Wen I wen feel real sad cuz I no can see you guys, I wen sen Timoty ova dea fo find out if you guys stay trus God still yet. Cuz I wen worry, an I stay figga, “Satan try fo make all us guys do bad kine stuff. An if my Tessalonika braddahs an sistahs lissen Satan, den dey goin do wat he like dem fo do. Den bumbye all da kine hard work us guys wen do was good fo notting.”

6  ✡ 3:6: JGuys 18:5But now, Timoty jus wen come back hea from see you guys, an he tell us guys all kine good stuff: dat you guys stay trus God, an you stay get love an aloha fo us guys. He tell dat you guys erytime no foget us an tink good bout us guys, an like see us guys, jalike we like see you guys too!

7 So, my braddahs an sistahs! No matta us guys get big kine presha an suffa plenny, da stuff Timoty tell us make us feel real good bout you guys. Cuz you guys stay trus God, dass why. 8 Cuz you guys stay solid wit Da One In Charge, now us guys feel good inside, jalike we stay live to da max fo real kine!

9 Da way you guys stay live now, us feel real good inside to da max! Now we tell God “Mahalo plenny” cuz a you guys. 10 Day time an nite time we stay pray real hard fo us see you guys one mo time, an we like give you guys da kine stuff you need still yet fo trus him to da max.

11 God Oua Faddah an Jesus Da One In Charge a us guys. I like dem do eryting fo us guys go see you guys. 12 An I like Da One In Charge help all you guys fo get love an aloha fo each odda mo plenny, an fo all da odda peopo too, jalike us guys get love an aloha fo you guys real plenny. 13 I like God make you guys stay strong an solid inside. Wen he do dat, den you guys goin stan in front God oua Faddah, an nobody goin poin finga you guys, cuz you guys stay good an spesho fo him! Dass how goin be wen Jesus, Da One In Charge, come back wit all his spesho peopo.