Hebrews
1
Vit'eegwijyąhchy'aa, Didinji' K'iighai' Diits'ą' Ginkhii
1 Vit'eegwijyąhchy'aa Eenjit Ginkhii nąįį k'iighai', yeenaa dąį' gwats'an Vit'eegwijyąhchy'aa gwinlęįį nihłehjuk diilak nąįį ts'ą' ginkhe'. 2 Gaa juk Khaiinkǫǫ Drin zhit Gwidinji' zhit diits'ą' ginkhe'. Ąįį Vit'eegwijyąhchy'aa vidinji' k'iighai' jii nankat ts'ą' zheekat datthak gwiłtsąįį, ndaagwąą'ąį' ji' jii jidii datthak vats'an yiheelyaa t'inchy'aa. 3 Ąįįt'ee Vit'eegwijyąhchy'aa vich'eegwąhndit haa nint'aii ts'ą' ch'ąhndit nilii ts'ą' Vit'eegwijyąhchy'aa haa nihłihk'it t'igiichy'aa, ts'ą' jidii datthak diginjik nint'aii haa khaihłan nihłoontą' gwiłtsąįį. Jidii nankat gwidinji' nąįį datthak gootr'agwaanduu oo'an gweheelyaa geenjit datthak gwinzii gwiłtsąįį ts'ą' zheekat gwizhit Vit'eegwijyąhchy'aa vishriits'ąįį dhidii ts'ą' nijuk datthak ts'ą' jidii datthak gwats'ą' k'eegwaadhat yiłtsąįį t'inchy'aa.
Vit'eegwijyąhchy'aa, Vidinji', Zheekat Gwich'in Andaa Jiintsii T'inchy'aa
4 Vit'eegwijyąhchy'aa Vidinji', ąįįt'ee zheekat gwich'in nąįį andaa veegoo'aii ts'ą' gwik'it Vit'eegwijyąhchy'aa ch'oozhri' goovandaa jiintsii ąįį yantł'eiin'ąįį.
5 “Shidinji' inlii t'oonchy'aa,
juk drin it'ee niti' dhiidlit.”
Vit'eegwijyąhchy'aa, jii deenyąą, ch'ihłok gaa zheekat gwich'in naii jyaa dahnyąą kwaa.
“Shįį t'ee viti' hihłyaa
ts'ą' shidinji' heelyaa, t'inchy'aa”
Ąįįts'ą' chan Vit'eegwijyąhchy'aa, jii deenyąą, ch'ihłok gaa zheekat gwich'in naii jyaa dahnyąą kwaa. 6 Gaa Vit'eegwijyąhchy'aa tr'ookit Didinji' dzaa nankat gwats'ą' nahahchįį dąį' jyaa nyąą,
“Vit'eegwijyąhchy'aa vizheekat gwich'in nąįį datthak giits'ą' khadigiheejyaa ts'ą' nikiigwagwahah'aa gwizhrįh,”
nyąą. 7 Gaa Vit'eegwijyąhchy'aa ąįį zheekat gwich'in nąįį eenjit jii jyaa nyąą,
“Vit'eegwijyąhchy'aa dizheekat gwich'in nąįį ahtr'aii nint'aii k'it t'igiinchy'aa gaviłtsąįį
ts'ą' ąįį nąįį chan kwankyaa k'it t'igiinchy'aa gaviłtsąįį.”
8 Googaa Didinji' eenjit, Vit'eegwijyąhchy'aa jii jyaa nyąą,
“Vit'eegwijyąhchy'aa, Neegwinii'ee gwizhit khit ts'ą' khit geenjit
łi'deegwidlii haa nigii nąįį ts'ą' k'eedeegwahaandhat t'oonchy'aa.
9 Jidii gwiizųų ąįį datthak gitr'iin'ee,
ts'ą' jidii gwinzii datthak chan geet'iindhan,
izhit geh'an Vit'eegwijyąhchy'aa, ąįį Nivit'eegwijyąhchy'aa ihłii gwitee tr'anąąhchįį,
ąįįts'ą' shoh gwanlii gwihil'ee jiintsii nantł'eegwiin'ąįį.
Ąįį juu naa neehiidal nąįį andaa gwihil'ee jiintsii nantł'eegwiinlii t'inchy'aa.”
10 Ąįįts'ą' chan jyaa yahnyąą,
“K'eegwaadhat, tr'ookit dąį' gwats'an nan jii nankat datthak goohtsąįį,
ąįįts'ą' nanli' haa zheekat datthak chan goohtsąįį.
11 Datthak gwihiljii nagwahaadhal, gaa nan ąįį nihk'it dzaa t'ihiinchy'aa,
gwach'aa ch'aa yit'eerahchy'aa kwaa k'it an gweheelyaa.
12 Ch'adak ik ch'aa k'it gwinzii łaadahaanchyaa
ąįįts'ą' gwach'aa k'eejit nanaazhii k'it jidii datthak k'eejit neehahtsyaa,
gaa nan ąįį duuyeh ch'ijuk t'iinjii,
gweedhaa datthak jyaa gwizhrįh t'ihiinchy'aa,
ts'ą' khit gwandaii hiinlyaa.”
13 Vit'eegwijyąhchy'aa, ch'ihłok gaa dizheekat gwich'in nąįį jyaa dahnyąą kwaa,
“Dahthee juu nitr'ii'ee nąįį,
diikwai' vakat diriłdlii,
ąįį k'įh nakwai' t'eh nagavahihłyaa gwats'ą' datthak
dzaa shishriits'ąįį gwihil'ee dhindii,”
jyaa nyąą.
14 Zheekat gwich'in nąįį juu t'igiinchy'aa? Zheekat ch'anky'aa ginlii ts'ą' Vit'eegwijyąhchy'aa deenyąą datthak gwik'eegwagwahthat t'igiinchy'aa ąįįts'ą' juu neeheezhii nąįį ts'igiheenjyaa goo'aii geh'an Vit'eegwijyąhchy'aa goots'ą' goohił'ee t'iginchy'aa.