EBBALUWA OPAWULO EGIYAWANDIKIIRE
OFIRIMOONI
Enyanjula
Akabbaluwa kanu akampi, omutume oPawulo yawandikiire mwikirirya eyabbaire afuma eino omu kanisa yʼe Kolose ogubeetanga bati Firimooni (1:1). Yagiwandikiire Looma ngʼali mu mabbuusu, omu mwanka ooti gwa 60 nga bamalire okubyala oKurisito.
OFirimooni yabbaire nʼomugalama ogubeetanga bati Onesimo, eyabbaire amwirukireku. Okusinzirira oku mateeka ga Balooma, omugalama eyairukanga okumusengwawe, owebamukwatanga ni bamukanjayo, omusengwawe yaabbanga nʼobwezye okumuteeka ku kibonerezo kyokumwita. Ngʼairukire okumusengwawe Onesimo yaajiirye oPawulo omu mabbuusu, oPawulo nʼalaabba egyali aMawuliro aMasa era nʼagaikirirya nʼasuuka mwikirirya. Omu kabbaluwa kanu, oPawulo akolesya entumula yʼokusendasenda oFirimooni okusoniya Onesimo, era amwikirirye ngʼowoluganda (1:13-14).
Engeri egibyecaanamu
1. OPawulo asugirya oFirimooni 1:1-3.
2. OPawulo yeegairira oFirimooni okusoniya, era nʼokwirirya Onesimo ngʼowoluganda 1:4-21.
3. Ebibono ebisembayo 1:22.
1
1-2 Ninze oPawulo ogubasibire olwa kuweererya oKurisito oYesu.
Nkusugiirye iwe Firimooni, nʼomwonyoko waiswe omu Yesu, Afiya, nʼAlikipo alwanikanira aamo na iswe omu buweererya, nʼekanisa ekumbaanira omu nyumbayo. Era nʼoTemuseewo owoluganda omu Yesu, yena abasugiirye. 1:1-2 Bak 4:17 3 Tubatakirya enkabi nʼeidembe ebizwa eeri oKibbumba oItewaiswe, nʼoMusengwa oYesu Kurisito.
Nkuwandiikira iwe oFirimooni omutake, era omuweererya omunaiswe.
4 Buli owenkusabira, neebalya oKibbumba wange, 5 olwakubba bankobera ngʼoweweesiga eino oMusengwa oYesu, era ngʼowootaka eino nʼabatuukirirye bonabona. 6 Era nsaba oKibbumba nti, okukolera aamokwo nʼabaikirirya abandi omu kwikiriryakwo, kukwezyesye okumanyira nakimo ebisa byonabyona ebitusunira omu Kurisito. 7 Woluganda, nsiima ino okutakakwo, era ni nsangaala ino, olwakubba wairiryemu emyoyo gyʼabatuukirirye amaani.
Okwegairira Onesimo
8 Kale newankubbaire nze, ngʼomuweererya wa Kurisito, nandyezyerye okukulagira ekyosaaniire okukola, 9 neye okutaka okundi nakwo eeri iwe kugira ni nkwegairira-bwegairiri. Omu ngeri eyo, nze ngʼoPawulo, omutume wa Kurisito Yesu, era atyanu omusibe olwa kuweererya oKurisito Yesu, 10 nkwegairira olwa Onesimo eyasuukire mwana wange omu Kurisito nga ndi omu busibe. 1:10 Bak 4:9 11 Eira yabbaire takugasa, neye atyanu atugasa swenaswena, iwe na nze.
12 Mmusindika aire egyoli neye nga mmutaka ekibitiriire. 13 Nanditakire mbe naye aanu, ambeere omu kifookyo, omu busibe obundimu olwʼaMawuliro aMasa. 14 Neye tinatakire kukola kintu kadi kimo ngʼekyo, nga toikiriirye. Ntaka ekintu ekisa ekyokola okikolere mu kwetakirya, neye tinga nkukakire-bukaki. 15 Kyezya okubba ngʼekyagirire Onesimo nʼakwawukanaku akaseera akatono, kwabbaire kuleetawo ngeri egyoyezya okumweirirya abbe aamo na iwe emirembe nʼemirembe. 16 Era atyanu nga takaali mugalama-bugalama, wazira nga wʼebbeeyi okukiraku omugalama; nga woluganda omutake, eino eino eeri nze. Kaisi eeri iwe kikiraku nʼaawo, olwakubba yakugasa ngʼakuweererya, tete era nʼomu bya Mwoyo, atyanu mugandawo.
17 Kale, abba nga ndi mwinawo, oyanirize Onesimo ngʼowewandinjanirizire. 18 Abba ngʼaliku nʼekiyakusoberye, ooba ngʼoliku nʼekyomubanza, ebyo byonabyona obiteeke ku ninze. 19 Nze oPawulo mpandiikire nʼengalo eyange enanyerenyeere nti nze nalisasula, newankubbaire ngʼomaite oti wena nkubanza. Ekyo kityo olwakubba nakolere kinene okukubbeera okubba omu Yesu. 20 Kale woluganda, ntaka nkusunemu omugaso omu Musengwa oku nsonga eyo, era omwoyo gwange ogwiryemu amaani omu Kurisito. 21 Olwakubba mmaite ngʼompulira, nkuwandikiire nga nesiga nti wakola ekinkoba, nʼebindi ebikira kwekyo ekinkusabire.
22 Era ekindi, ontegekere awokugona, olwakubba nsuubira nti olwʼokusaba kwanywe, banteera ni njira egimuli.
23 Epafula, omusibe omunange olwa Kurisito oYesu, akusugiirye. 1:23 Bak 1:7; 4:12 24 Era oMaako, nʼEsitaluuko, nʼoDeema, era nʼoLuuka abaweererya abanange bona bakusugiirye. 1:24 Bik 12:12,25; 13:13; 15:37-39; 19:29; 27:2; Bak 4:10,14; 2Te 4:10,11
25 Enkabi gya Musengwa oYesu Kurisito gibbenge na inywe.