1 धबै याहवेहजी मोशाने बिइ, “फारो ङाँर ह्‍यासि ‘ङए म्हिमैं ङए सेवा लबर ह्‍याल् पिंन् बिसि याहवेहजी बिइमुँ,’ बिद्। 2 ‘क्हिइ चमैंलाइ ह्‍याल् आपिंस्याँ ङइ क्हिए ताँन् ह्‍युलर प्हद्गोमैं कुलसि ह्रुगुदिल् पिंब्मुँ। 3 झाइले नील स्योंर प्हद्गोइ प्लिंसि च क्हिए दरबारर, क्हि रोबै कोठार, क्हिए खाटर, क्हिए के लब्मैंए धिं-धिंर, क्हिए म्हिमैंए फिर, क्हिए कोदाजरे नेरो प्रो चेंबै भाँडाजरे खब्मुँ। 4 च प्हद्गोमैं क्हिने, क्हिए म्हिमैंने, क्हिए के लब्मैं फिरै या खब्मुँ,’ बिसि चने बिद्।”

5 झाइले याहवेहजी मोशाने बिइ, “ ‘मिश्र तिगोंन् प्हद्गोमैं खरिगे बिसि हारूनइ प्हरे किंसि स्योंमैं, कुलोमैं नेरो ङ्‍ह्‍योमैं फिर यो स्योंन्,’ बिसि हारूनने बिद्।” 6 छबिमा हारूनइ मिश्रर्बै क्यु मुँबै क्ल्ह्‍योजरे ह्रोंसए यो स्योंमा प्हद्गोमैं त्होंसि मिश्र ह्‍युल हुवाइ। 7 छलेन जादु लब्मैंज्यै ह्रोंसए न्होंर्बै सिपउँइँले छान् लसि मिश्रर प्हद्गोमैं तेवाइ।

8 छतमा फारोइ मोशा नेरो हारूनलाइ हुइबर कुलसि बिइ, “याहवेहजी ङ नेरो ङए म्हिमैंउँइँले प्हद्गोमैं स्योमिंरिगे बिसि खीने बिन्ति लमिंन्। छलस्याँ खीए ल्हागिर ख्रो पिंबर क्हिए म्हिमैं ङइ ह्‍याल् पिंब्मुँ।”

9 मोशाइ फारोने बिइ, “प्हद्गोमैं क्हि नेरो क्हिए धिंउँइँले म्हह्‍यारिगे, नील स्योंर मत्‍त्रे तरिगे बिसि ङइ क्हि नेरो क्हिए के लब्मैं नेरो क्हिए म्हिमैंए ल्हागिर याहवेहने खोंयों बिन्ति लमिंल् त्हुम बिसि बिद्।”

10 फारोइ “प्हन्हाँग” बिइ।

मोशाइ बिइ, “क्हिइ बिब् धोंलेन् तब्मुँ, धै ङिए याहवेह परमेश्‍वर धोंब अरू खाबै आरे बिसि क्हिइ सेब्मुँ। 11 प्हद्गोमैं क्हि, क्हिए धिंउँइँले, क्हिए के लबै म्हिमैंउँइँले नेरो क्हिए म्हिमैंउँइँले एह्‍याब्मुँ, नील स्योंर मत्‍त्रे तब्मुँ।” 12 झाइले मोशा नेरो हारून फारोउँइँले त्होंइ ह्‍याइ। धै फारोए फिर कुल्मिंबै प्हद्गोमैं स्योवामिंन् बिसि मोशाइ याहवेहने प्राथना लइ। 13 छलमा याहवेहजी मोशाइ बिब् धोंलेन् लमिंसि धिंर, ह्‍युर नेरो म्रोंजरे मुँबै प्हद्गोमैं सियाइ। 14 म्हिमैंइ चमैं खुसि क्ल्ह्‍यो घ्रिर थेंमा, मिश्र ह्‍युल आछ्याँबै थाँ नाँबर प्लिंयाइ। 15 दिलेया फारोइ प्हद्गोमैं सियाब म्रोंलेया याहवेहजी बिब् धोंलेन् चइ ह्रोंसए सैं सारो लसि मोशा नेरो हारूनए ताँ आथे।

16 छतमा याहवेहजी धबै मोशाने बिइ, “त्हुलउँइँले मिश्र तिगोंन् मोसोमैं तयारिगे बिसि प्हरे किंसि त्हुलर प्रिंन् बिसि हारूनने बिद्।” 17 याहवेहजी मोशाने बिब् धोंले हारूनइ प्हरे किंसि स त्हुलर प्रिंमा मिश्र ह्‍युलर्बै ताँन् स त्हुला मोसो मोसोन् तयासि म्हिमैं नेरो खेदोमैंने कुयाइ। 18 धै जादु लब्मैंज्यै ह्रोंसए न्होंर्बै सिपउँइँले मोसो बनेल् म्हैइ, दिलेया बनेल् आखाँ। दिलेया म्हिमैं नेरो खेदोमैंने मोसो तरिइ। 19 छतमा जादु लब्मैंइ फारोने बिइ, “चु के परमेश्‍वरजीन् लब् ग।” छबिलेना याहवेहजी बिब् धोंलेन् फारोए सैं सारो तसि चमैंए ताँ आथे।✡ 8:19 लूक 11:20

20 धबै याहवेहजी मोशाने बिइ, “प्हन्हाँग न्हाँकर्न ह्‍यासि फारो स्योंर ह्‍याबै त्हेर चने त्होसि बिद्, ‘ङए सेवा लबर ङए म्हिमैं ह्‍याल् पिंन् बिसि याहवेहजी बिइमुँ’ बिद्। 21 ‘ङए म्हिमैं ह्‍याल् आपिंस्याँ, ङ्‍ह्‍योद्, क्हि, क्हिए के लब्मैं फिर, क्हि म्हिमैं नेरो क्हिए धिंर ङइ बेल्‍ले ल्हें च्युमिंमैं कुल्मिंब्मुँ, छलेन मिश्रीमैंए धिं-धिंर नेरो चमैं टिबै क्ल्ह्‍योजरै या च्युमिंइ प्लिंब्मुँ। 22 दिलेया च त्हिंइर याहवेह चु ह्‍युलर मुँ बिब् क्हिइ सेरिगे बिसि ङए म्हिमैं टिबै गोशेन ह्‍युललाइ बिस्याँ ङइ जोगेमिंब्मुँ, चर च्युमिं तरिब् आरे। 23 छले ङए म्हिमैं नेरो क्हिए म्हिमैंए म्हाँजोर ङइ स्यो-स्योबै केमैं लब्मुँ। चु औदिबै चिनुमैं प्हन्हाँग तब्मुँ।’ ”

24 च्हमा याहवेहजी छान् लइ। फारोए दरबार नेरो चए के लब्मैंए धिं-धिंर बेल्‍ले ल्हें च्युमिंमैं खइ, धै च्युमिंमैंइ मिश्र ह्‍युलर बेल्‍ले ह्रुगुदिइ।

25 छतमा फारोइ मोशा नेरो हारून हुइसि बिइ, “क्हेमैं ह्‍यासि चु ह्‍युलए न्होंर्न ह्रोंसए परमेश्‍वरए ल्हागिर ख्रो पिंन्।”

26 दिलेया मोशाइ बिइ, “छ लब ठिक आत, तलेबिस्याँ ङिए याहवेह परमेश्‍वरए ल्हागिर ङिइ पिंबै ख्रो म्रोंसि मिश्रीमैं छेरम्। मिश्रीमैंइ आखोबै ख्रो चमैंए ओंसों पिंइ बिस्याँ चमैंइ ङिलाइ युँमाइ आप्रिं रो वा? 27 ङि सोंरोबै घ्याँ ह्‍यासि क्यु आयोंबै क्ल्ह्‍योर ह्रोंसए परमेश्‍वरजी बिब् धोंलेन् खीए ल्हागिर ङिइ ख्रो पिंल् त्हुम्।”

28 छबिमा फारोइ बिइ, “तम्, ङइ क्हेमैंलाइ क्यु आयोंबै क्ल्ह्‍योर क्हेमैंए याहवेह परमेश्‍वरए ल्हागिर ख्रो पिंबर ह्‍यालम् पिंम्, दिलेया ह्रेंगो बिस्याँ आह्‍याद्। ङए ल्हागिरै या प्राथना लमिंन्।”

29 मोशाइ बिइ, “ङ क्हि ङाँइले बैरु ह्‍याबै तोंदोंन् क्हि, क्हिए के लब्मैं नेरो क्हिए म्हिमैंउँइँले प्हन्हाँगन् च च्युमिंमैं स्योह्‍यारिगे बिसि याहवेहने प्राथना लब्मुँ। दिलेया याहवेहए ल्हागिर ख्रो पिंबर ह्‍याल् पिंम् बिसि धबै स्योर आतेद्।”

30 झाइले मोशा फारो ङाँइले बैरु ह्‍यासि याहवेहने प्राथना लइ। 31 छलमा याहवेहजी मोशाइ बिब् धोंलेन् लमिंइ, धै फारो, चए के लब्मैं नेरो चए म्हिमैंउँइँले च च्युमिंमैं घ्रि या आचैल्‍ले स्योह्‍याइ। 32 छ तलेना चु लारै या फारोइ धबै सैं सारो लसि म्हिमैं ह्‍याल् आपिं।