1 “धुप म्रोबै ल्हागिर क्हिइ अर्को बबुल सिंए क्ल्ह्‍यो घ्रि बनेद्। 2 च तिउरु ह्रिंब, तिउरु प्ल्हाब, ङ्हिउरु नुब चार पाटे तल् त्हुम्। चए रुमैं या क्ल्ह्‍यो बनेबै सिंए टुक्राल तल् त्हुम्। 3 चए क्होइबै भाग, कारग्युबै भागमैं नेरो चए रुमैं या छ्याँबै माराइ म्होरसि चए कारग्युले माराए ङाँ सैद्। 4 माराए न्हमैं बनेसि क्ल्ह्‍योए हार ङ्हिंर प्ह्‍याद्। च क्ल्ह्‍यो नोबै ल्हागिर चए ङाँ न्होंर प्हरे क्युलबै क्ल्ह्‍यो तल् त्हमु। 5 च प्हरेमैं या बबुल सिंल बनेसि माराइ म्होरद्। 6 चु धुप म्रोबै क्ल्ह्‍यो ठिम थेंबै मुदुसए ओंसों च्योथेंबै पर्दाए ओंसों थेंन्, चर्न ङ क्हिने त्होब्मुँ।

7 “न्हाँग ह्रोंसे बत्ति तयार लबर खमा हारूनइ छ्याँब थाँ खबै धुप च क्ल्ह्‍योर म्रोरिगे। 8 ङेसरै या बत्ति म्रोमा हारूनइ छ्याँब थाँ खबै धुप च क्ल्ह्‍योर म्रोरिगे। छलेन खबै पुस्ता-पुस्ता समा खोंयोंन् बिलै याहवेहए उँइँर धुप म्रोरिल् त्हुम्। 9 चु क्ल्ह्‍योर क्हिइ अरू खालर्बै धुप, मिर ख्रोंसि पिंबै ख्रो, रा-रोए ख्रो नेरो प्हा या आचडेद्। 10 सालर तिला हारूनइ पाप ख्रुबर ख्रो पिंबै खेदोए को चए प्लिउलो रुर फोसि चु क्ल्ह्‍यो पबित्र लरिगे। चु पबित्र लबै के पुस्ता-पुस्ता समा सालर तिला लरिल् त्हुम्। ङ याहवेहए ल्हागिर चु क्ल्ह्‍यो बेल्‍ले पबित्र ग।”

11 याहवेहजी मोशाने बिइ, 12 “क्हिइ इस्राएलीमैं च्योमा चमैंए न्होंर्बै ताँनइ ह्रोंस सोल् योंरिगे बिसि याहवेहलाइ सै फोल् त्हुब्मुँ, छलमा चमैंए फिर दुःख खरिब् आरे। 13 च्योब्मैं ताँनइ तोक्दिबै मुइ फोल् त्हुब्मुँ। च तोक्दिबै मुइ भेटिए रुपर ताँनइ फोल् त्हुब्मुँ।✡ 30:13 प्रस ३८:२५-२६; मत्ती १७:२४ 14 ङ्हिस्यु बर्ष भन्दा क्होइबै म्हिमैंइ याहवेहए मिंर च मुइ पिंल् त्हुम्। 15 क्हेमैं पाप क्षमा तबै ल्हागिर याहवेहए मिंर भेटि पिंमा प्लब्मैंइ ल्हें ङ्हाँदुमैंइ च्युगुदे आपिंरिगे। 16 च भेटि क्हेमैं पाप क्षमा तबै ल्हागिर पिंब् ग बिसि याहवेहजी इस्राएलीमैं मैंरिगे बिसि इस्राएलीमैंउँइँले मुइ किंसि पबित्र तम्बुए ल्हागिर खर्ज लदु।”

17 याहवेहजी मोशाने बिइ, 18 “क्यु झोंबै ल्हागिर काँसाए प्हले मुँबै काँसाए बाटा बनेसि पबित्र तम्बु नेरो मिइ ख्रोंसि ख्रो पिंबै क्ल्ह्‍योए म्हाँजोर थेंसि चर क्यु झोंन्।✡ 30:18 प्रस ३८:८ 19 हारून नेरो चए च्हमैंइ च क्युइ यो प्हले ख्रुरिगे। 20 चमैं पबित्र तम्बुर होंस्याँ, धै याहवेहए मिंर ख्रो पिंबै क्ल्ह्‍योर ख्रो ख्रोंबर खस्याँ चमैंइ चु क्युइ यो-प्हले ख्रुल् त्हुम। आस्याँ चमैं सियाब्मुँ। 21 चमैं आसिरिगे बिसि चमैंइ चु क्युइ यो-प्हले ख्रुरिगे। हारून नेरो चए पुस्ता-पुस्ता समा छलेन् प्हले ख्रुल् त्हुब्मुँ।”

22 याहवेहजी मोशाने बिइ, 23 “क्हिइ ताँन् भन्दा छ्याँब मसला, लिटर घ्रि मूर्र, आधा किलो दालचिनि, आध किलो बोझो, 24 किलो घ्रि लेपो, चु ताँन् सैमैं पबित्र तम्बुर मुँबै पाराइ क्वेल् त्हुम्। लिटर प्लि जैतुनए छ्युगु चर कोंसि 25 अभिषेक लबै ल्हागिर पबित्र छ्युगु बनेद्। 26 झाइले ङ टिबै पबित्र तम्बु, ठिम थेंबै मुदुस, टेबल, टेबलर थेंबै सैमैं, पानस नेरो पानसर थेंबै सैमैं, धुप म्रोंबै ख्रो पिंबै क्ल्ह्‍यो, 27 टेबल नेरो चए ताँन् सैमैं, सामदान नेरो चए ताँन् सैमैं, धुप म्रोंबै ख्रो पिंबै क्ल्ह्‍यो, 28 मिर ख्रोंसि ख्रो पिंबै क्ल्ह्‍यो, चर्बै सैमैं, प्हले ख्रुबै बाटा नेरो चए प्हलेजरे या च छ्युगुइ अभिषेक लद्। 29 च सैमैं बेल्‍ले पबित्र तरिगे बिसि छले अभिषेक लसि पबित्र लद्। च सैमैं तो सैइ छुइलेया च पबित्र तब्मुँ।

30 “खेगि तसि ङए सेवा लरिगे बिसि हारून नेरो चए च्हमैं अभिषेक लसि पबित्र लदु। 31 ‘इस्राएलीमैंए पुस्ता-पुस्ता समा ङए सेवा लबै ल्हागिर अभिषेक लबै पबित्र छ्युगु चुन् तरिगे,’ बिसि चमैंने बिद्। 32 ‘चु छ्युगु अरू म्हिमैंए फिर आकुमिंन्, चु सैमैंन् कोंसि धबै छाबन् छ्युगु आबनेद्। चु छ्युगु पबित्र मुँ, चु छ्युगु क्हेमैंइ पबित्र मुँ ङ्हाँन्। 33 खाबइ चु सैमैं कोंसि अभिषेक लबै छ्युगु धोंन् बनेमुँ, धै खेगि बाहेक अरू अरू म्हिमैंए फिर चु छ्युगु फोमुँ, ङए म्हिमैं ङाँइँले च म्हि तेवाब्मुँ।’ ”

34 याहवेहजी धबै मोशाने बिइ, “लिंबै थाँ खबै मसलामैं खोटो, सेखलेट, हिङ धोंबै चोप नेरो लिंबै थाँ खबै धूपमैं बराबरले कोंसि 35 लिंब थाँ खबै छ्युगु बनेब् धोंले धुप बनेद्। च धुप पबित्र तरिगे बिसि चजै या कोंन्। 36 चु धुप क्हेमैंए ल्हागिर बेल्‍ले पबित्र तल् त्हुम्। छतसि चए तिबाँ त्हुल् तल्‍ले तोंसि च्हौदे ङ टिबै पबित्र तम्बुर ठिम थेंबै मुदुसए ओंसों थेंन्। 37 च धुप बनेब् धोंले क्हेमैंए ल्हागिर धुप आबनेद्। याहवेहए ल्हागिर च धुप पबित्र मुँ ङ्हाँन्। 38 च धुपए थाँ खोसि खाबज्यै या च धुप धोंले अरू धुप बनेइ बिस्याँ च ह्रोंसए म्हिमैंउँइँले तेवाल् त्हुम्।”✡ 30:32-38 प्रस ३७:२९