1 अपोल्‍लस कोरिन्‍थ सहरर मुँमा पावल एशिया ह्‍युलउँइँले एफिसस सहरर खइ। चर्बै को-कोइ चेलामैंने त्होसि 2 चइ चमैंने “क्हेमैंइ प्रभुए फिर बिश्‍वास लइरि पबित्र प्ल्ह योंइ वा?” बिसि ङ्योएइ।

चमैंइ बिइ, “पबित्र प्ल्ह मुँ बिब ङिइ आथेइमुँ।”

3 “छ बिस्‍याँ क्हेमैंइ खैबै बप्‍तिस्मा किंइ?” बिसि पावलइ ङ्योएमा चमैंइ बिइ, “यूहन्‍नाए बप्‍तिस्मा किंइ।”

4 झाइले पावलइ बिइ, “यूहन्‍नाइ पिंबै बप्‍तिस्माम् पाप केमैं पिसि परमेश्‍वरउँइ सैं एरिगे बिब् मुँल। दिलेया तारे पिरु युबै येशूए फिर बिश्‍वास लल् त्हुम् बिसि चइ म्हिमैंने लोमिंमल।”✡ 19:4 मत्ती ३:११; मर्क १:४,७,८; लूक ३:४,१६; यूह १:२६,२७

5 चु ताँ थेसि चमैंइ प्रभु येशूए मिंर बप्‍तिस्‍मा किंइ। 6 झाइले पावलइ चमैंए फिर यो थेंमा पबित्र प्ल्ह चमैं फिर युइ, धै चमैं स्यो-स्योबै क्युइर पोंब नेरो अगमबाणि लबर होंइ। 7 च म्हिमैं च्युसे ङ्हिं दे मुँल।

8 पावल च्हों धिंर ह्‍यासि म्हैंन सोंल् समन् परमेश्‍वरए ग्याल्सए बारेर चमैंने आङ्हिंन्ले छलफल लसि म्हिंमैंइ क्होरिगे बिसि लोमिंरिइ। 9 दिलेया को-कोइ सैं सारो लसि क्वेंल् आङिं। धै झन् मुक्‍ति योंबै घ्याँए बिरोध लसि ताँनए उँइँर चमैं पोंबर होंइ। छतमा पावल चमैंउँइँले फ्रेसि चेलामैं बोसि टुरान्‍नस बिबै स्कूलर म्हिमैंने छलफल लसि परमेश्‍वरए ताँ त्हिंइ ह्रोंसे लोमिंमल। 10 ङ्हिंदि समन् चु के तरिइ, छतमा एशिया ह्‍युलर्बै ताँन् म्हिमैं, यहूदी नेरो ग्रिक ङ्हिंना-ङ्हिंनइ, प्रभुए ताँ थेइ।

11 परमेश्‍वरजी पावलए योउँइँले थे-थेबै औदिबै केमैं लइ। 12 नबै म्हिमैं सरिगे बिसि को-कोइ म्हिमैंइ ह्रुमल नेरो पछ्यउरमैं या पावलए ज्युर छुइसि नबै म्हिमैं ङ्हाँर बोमिंमल, धै चमैंए ज्युर्बै नब ससि मोंमैं या त्होंह्‍यामल। 13 छाब् म्रोंसि को-कोइ स्युरदै प्रबै यहूदी फा फुइ लब्मैंइ मोंइ स्याब्मैंने प्रभु येशूए मिं तेदै बिइ, “पावलइ बिप्रबै येशूए मिंउँइँले त्होंह्‍याद् बिसि ङ क्हिने बिम्।”

14 चर स्‍केवास मिं मुँबै यहूदी ख्रो पिंबै खेगि क्रथेए च्ह ङिउँलोज्यै या छाबन् के लमल।

15 दिलेया मोंइ चमैंने बिइ, “ङइ येशू सेमुँ, पावलै या सेम्, दिलेया क्हेमैं खाब्मैं जा?” 16 धै च मोंइ स्याबै म्हि चमैंए फिर उफर्दिदै ट्होवासि चमैं ताँन् प्योवाइ। छतमा चमैं नें-म्योंसि च धिंउँइँले क्लिउँनन् न्हेह्‍याइ।

17 एफिससर टिबै ताँन् यहूदीमैं नेरो ग्रिकमैंइ चु ताँ थेसि ङ्हिंयाँइ, धै प्रभु येशूए मिं क्वेइ। 18 बिश्‍वास लबै ल्हें म्हि खसि ह्रों-ह्रोंसइ लबै आछ्याँबै केमैं लइमु बिसि म्हिमैंए उँइँर बिइ। 19 झाइले चमैंए न्होंर्बै टुना लब्मैंज्यै या ह्रों-ह्रोंसए छ्वेमैं खागु लसि पखइ, धै ताँनए उँइँर ख्रोंवाइ। चमैंइ च छ्वेमैंए सै लमा ङच्यु हजार चाँदिए सिक्‍का* 19:19 चाँदिए सिक्‍का सिक्‍का घ्रि म्हि घ्रिए तिगैंर्बै नों सै तमल। फेइ। 20 छले प्रभुए ताँ खन्तोंदोंन् फेनेसि बडिदै ह्‍याइ।

21 चु ताँमैं तबै लिउँइ, पबित्र प्ल्हजी बिब् धोंले पावल माकेडोनिया नेरो अखैया ह्‍युलए घ्याँ तसि यरूशलेम ह्‍याबै सैं लइ। “धै चर फेबै लिउँइ ङ रोम सहरर खैलसेया ह्‍यालन् त्हुम्,” बिइ। 22 झाइले चइ ह्रोंसए सेवा लबै तिमोथी नेरो इरास्‍तस माकेडोनियार कुल्मिंइ, च बिस्याँ दे त्हिंइ एशिया ह्‍युलर्न टिइ।

23 च त्हेजरे एफिसस सहरर मुक्‍ति योंबै घ्‍याँए बारेर ल्हें म्हिइ खैला-बैला मचेरिल। 24 तलेबिस्याँ डेमेत्रियस मिं मुँबै चाँदिए के लबै म्हि घ्रिइ देबि आर्तेमिसए च्यों-च्योंबै चाँदिए कु धिंमैं बनेसि, बुट्ट झोंल् ह्रबै म्हिमैं के पिंसि ल्हें मुइ योंमल। 25 झाइले डेमेत्रियसइ ह्रोंसए के लब्मैं नेरो चमैंइ धोंबन् के लब्मैं खागु लसि बिइ, “ओ अलि-अङाँमैं, चु केउँइँलेन् ङ्योला ल्हें मुइ खइमुँ बिब क्हेमैंइ सेइमुँ। 26 दिलेया पावलइ एफिससर मत्‍त्रे आङिं, एशियार्बै ल्हें क्ल्ह्‍योर ‘योइ बनेबै देवतामैं तोइ सैइ आङिं’ बिसि ल्हें म्हिने लोमिंब क्हेमैंइ म्रोंरिइमुँ, थेरिइमुँ। 27 छतसि ङ्योए के मत्‍त्रे म्हयाब् आङिं, थेबै देबि आर्तेमिसए कु धिं या केर आत्हुब् तब्मुँ, धै एशिया नेरो ह्‍‍युल तिगोंबै म्हिमैंइ म्हाँदिइ खबै देबिला मिंन् म्हयाब्मुँ।”

28 चु ताँ क्होसि चमैं बेल्‍‍ले ह्रिस खइ। झाइले चमैंइ “एफिसीथेंमैंए आर्तेमिस बेल्‍ले थेब ग!” बिसि ओरबर होंइ। 29 छतमा च सहर तिगोंन् खैला-बैला तइ धै चमैं घ्रि तसि पावलने प्रबै माकेडोनियाथेंमैं ङ्हिं गायस नेरो अरिस्‍तार्खस क्हासि रङ्गशालए न्होंर चैंदै बोइ। 30 छाब् म्रोंसि पावल म्हिमैं हुलर ह्‍याल् म्हैइ, दिलेया चेलामैंइ ह्‍याल् आपिं। 31 एशियार्बै को-कोइ क्रथे मिंथेमैं पावलए थुमैं मुँल। चमैंइ पावललाइ “रङ्गशालए न्होंर आह्‍याद्!” बिसि यो छ्युँ लइ। 32 रङ्गशालर मुँबै म्हिमैं स्यो-स्योबै ताँ बिदै ओरबर होंइ। च म्हि हुलर खैला-बैला तरिल, धै चर्बै ल्हें म्हिइ “ङ्यो तले खागु तगे?” बिसि था आसेल। 33 च त्हेर यहूदीमैंइ अलेक्जेन्डर बिबै म्हि ओंसों पोंबर ल्हैदिइ। चर्बै म्हिमैं च्याँ तरिगे बिसि अलेक्जेन्डरइ म्हिमैंए उँइँर योइ हस्त लसि ह्रोंस बचेबै ल्हागिर “ङिइ तोइ गल्ति आलइमुँ!” बिसि पोंबै सैं लइ। 34 दिलेया चमैंइ “चम् यहूदी मुँना” बिब् सेसि ताँनइ कै घ्रिले घण्टा ङ्हिंदे समा “एफिससथेंमैंए आर्तेमिस बेल्‍ले थेब ग!” बिदै झन् ओररिइ।

35 बल्‍ल-बल्‍ल सहरर्बै क्रथेइ म्हिमैं च्याँ लसि बिइ, “ओ एफिससथेंमैं, थेबै आर्तेमिसए कु धिं नेरो मुउँइँले तयुबै चए कु थेंबै क्ल्ह्‍यो एफिसस सहर ग बिसि खाबइ आसेइमुँ रो? 36 चु ताँ क्रोंसेंन्बै ग बिसि ताँनइ सेइमुँ। छतसि क्हेमैं च्याँ तल् त्हुम्। च्हैंब-मैंब् आलल्‍ले उतउलो तसि जोस खइरि तोइ के लल् आत। 37 तलेबिस्याँ क्हेमैंइ क्हासि पखबै चु म्हिमैंइ कु धिंर्बै सैमैं तोइ आह्‍योइमुँ ङ्योए देबिला आछ्याँबै ताँमैं या आलइमुँ। 38 अदालतमैं चुर्न मुँ, निसाफ लब्मैं या मुँ। छतसि डेमेत्रियस नेरो चने मुँबै बुट्ट प्रिंल् ह्रब्मैंला खाब् मुँले म्हिने आक्ह्रिबै ताँ तोइ मुँस्याँ चमैंइ घ्रिइ घ्रिए बिरोधर मुद्दा नेरिगे। 39 चु बाहेक क्हेमैंइ अरू ताँ रेल् म्हैम् बिस्याँ ङ्योए सहरर्बै म्हि च्होंर्न च ताँ टोंल् खाँब्मुँ। 40 तलेबिस्याँ तिंयाँबै चु म्हिमैंइ लबै खैला-बैलाए छ्याब् ङ्योए फिर खलै खाँम्, तलेबिस्याँ चु फाक्‍कर्न तबै ताँए ज्वाफ ङ्योइ पिंल् आखाँ।” 41 च्हौ बिसि चइ म्हि च्हों प्हुँवाइ।