૧ હે ઈશ્વર, મારી ફરિયાદનો પોકાર સાંભળો;

શત્રુના ભયથી મારા જીવનનો બચાવ કરજો.

૨ દુષ્ટોનાં કાવતરાંથી,

અન્યાય કરનારાઓનાં હુલ્લડથી મને સંતાડો.

૩ તેઓએ તરવારની જેમ તેમની જીભને તીક્ષ્ણ કરી છે;

તેઓનો ઉદ્દેશ્ય બાણ, એટલે કડવા શબ્દો છે,

૪ કે જેથી તેઓ એકાંતમાં નિર્દોષ માણસને મારે;

અચાનક તેઓ તેને મારે છે અને બીતા નથી.

૫ તેઓ પોતાની દુષ્ટ ધારણા દ્રઢ કરે છે;

તેઓ ગુપ્ત જાળ બિછાવવાને મસલત કરે છે;

તેઓ કહે છે કે, “અમને કોણ જોશે?”

૬ તેઓ પાપમય યોજનાઓ શોધે છે;

તેઓ કહે છે, “સાવધાનીપૂર્વકની યોજના, તે અમે પૂર્ણ કરી છે.”

માણસના આંતરિક વિચારો તથા હૃદયો ઊંડાં છે.

૭ પણ ઈશ્વર તેઓને તાકીને બાણ મારશે;

તેઓ એકાએક ઘાયલ થઈ જશે.

૮ એમ તેઓ ઠોકર ખાશે, તેમની જીભ તેઓને નડશે;

જેઓ તેમને જોશે તેઓ સર્વ માથાં ધુણાવશે.

૯ દરેક લોકો બીશે

અને ઈશ્વરનાં કાર્યો પ્રગટ કરશે.

તેઓ તેમનાં કામ વિષે સમજણથી વિચારશે.

૧૦ ન્યાયીઓ યહોવાહ વિષે આનંદ કરશે અને તેમના પર ભરોસો રાખશે;

હૃદયના સર્વ યથાર્થીઓ ગર્વ કરશે.