૧ જેનું ઉલ્લંઘન માફ થયું છે તથા જેનું પાપ ઢંકાઈ ગયું છે,

તે આશીર્વાદિત છે.

૨ જેને યહોવાહ દોષિત ગણતા નથી અને જેના આત્મામાં કંઈ કપટ નથી,

તે આશીર્વાદિત છે.

૩ જ્યારે હું છાનો રહ્યો, ત્યારે આખો દિવસ

છાના રુદનથી મારાં હાડકાં જીર્ણ થયાં.

૪ કેમ કે રાતદિવસ તમારો હાથ મારા પર ભારે હતો.

જેમ ઉનાળાની ગરમીમાં જળ સુકાઈ જાય છે, તેમ મારી શક્તિ હણાઈ ગઈ હતી.

૫ મેં મારાં પાપ તમારી સમક્ષ કબૂલ કર્યાં

અને મારો અન્યાય મેં સંતાડ્યો નથી.

મેં કહ્યું, “હું મારાં પાપો યહોવાહ સમક્ષ કબૂલ કરીશ.”

અને તમે મારાં પાપોની ક્ષમા આપી.

૬ તે માટે જ્યારે તમે મળો ત્યારે તે સમયે દરેક ભક્ત તમારી પ્રાર્થના કરે.

પછી જ્યારે ઘણા પાણીની રેલ ચઢે, ત્યારે તે તેને પહોંચશે નહિ.

૭ તમે મારી સંતાવાની જગ્યા છો; તમે મને મારા સંકટમાંથી ઉગારશો.

તમે મારી આસપાસ વિજયનાં ગીતો ગવડાવશો.

૮ ક્યે માર્ગે તારે ચાલવું તે હું તને શીખવીશ તથા બતાવીશ.

મારી નજર હું તારા પર રાખીને તને બોધ આપીશ.

૯ ઘોડા તથા ખચ્ચર જેને કંઈ સમજણ નથી,

જેને કાબૂમાં રાખવા માટે ચોકડા તથા લગામની જરૂર છે,

નહિ તો તું જ્યાં લઈ જવા ચાહે ત્યાં તેઓ આવી ન શકે, માટે તેઓના જેવો અણસમજુ ન થા.

૧૦ દુષ્ટોને ઘણી તકલીફો સહન કરવી પડે છે

પણ જેઓ યહોવાહ પર ભરોસો રાખે છે, તેઓ તો તેમની કૃપાથી ઘેરાશે.

૧૧ હે ન્યાયીઓ, યહોવાહમાં આનંદ કરો તથા હરખાઓ;

હે શુદ્ધ હૃદયના માણસો, તમે સર્વ હર્ષના પોકાર કરો.