3
Kə palee Yeesu ka Muusa
1 Ndzəkəŋushi'inəki ətsə 'wii Əntaŋfə tuunə noonə koona ndzaanə ka ənjaakii, buurətəmə tə Yeesu. Ma ca, masləkee əndə nə ci, kə shi ci ka ndzaanə ka maɗuunə *limanə ŋga gooŋgaanə caama baaba. 3.1 4.14. 2 Ma ca, kə ta'i Əntaŋfə tə ci kaa ca ɗa slənaakii. Kə luuvə ci əsə tə patənə ŋga sətə bii Əntaŋfə ka ci, makə sətə shi Muusa a luuvə patənə ŋga sətə bii Əntaŋfə ka ci, ca slənə ahada ənji *yi ŋga Əntaŋfə. 3.2 Ɓaan. 12.7. 3 Amma kə dəɓee ənjə a vii ɗuunuunə ka Yeesu palee ka Muusa, makə sətə ci ənjə a vii ɗuunuunə ka əndətə ghənyi ya palee ka yikii. 4 Taa ŋgutə yi patə, tə'i əndətə ghənyi. Amma Əntaŋfə ghənyi patənə ŋga uushi'inə.
5 Ma Muusa, əndətə slənyi də gooŋga asəkə yi ŋga Əntaŋfə nə ci. Slənaakii ɓaarii ka ənji tə sətə ci Əntaŋfə a ba aakəŋwa. 6 Amma ma Aləmasiihu, uuzətə yi ŋga Əntaŋfə nə ci, əndə luu aya əsə. Ci ca ɗa ŋwaŋuunə asəkə yi ŋga Əntaŋfə. Amə nə yaakii, amma see a kəŋaamə ndihə ndihə, ama ka naamə dəŋə ka muudinə. * 3.6 uuzətə yi: 5.8.
Əpisəkətə nə Əntaŋfə a vii ka ənjaakii
7 Acii ha'ə, makə sətə bii Malaaɓa Ma'yanə, 3.7-11 Jab. 95.7-11.
“Ma ənshinə, maɗa kə fii unə uurakii,
8 fatəmə tə ci, goona huurəgi ədzəmuunə, 3.8 Shig. 17.7; Ɓaan. 20.2-5.
makə sətə shi dzədzəshi'inuunə a huurəgi
saa'itə tii agi bilinə,
waatoo, saa'itə kaaree tii ka *ŋwaŋuunə ŋga Əntaŋfə,
təya təɓə tə ci əsə.
9 Əŋki Əntaŋfə, ‘Ma agi bilinə,
kə tiɓə dzədzəshi'inuunə tə nyi,
dagyanə tii kə nee ka slənaaki agi fəzə ənfwaɗə pu'unə.
10 Acii ha'ə, kə ɓəzhi səkəki aashi ənjita,
əŋki nyi, kə zii tii, kə təkuree tii ka shii rəgwaaki.
11 Də ha'ə, ɓəzhi səkəki aashitii, nya jiɗə, əŋki nyi, 3.11 Ɓaan. 14.21-23.
paa tii ka mbu'unə aanə hanyiitə vii nyi ka tii
kaa təya əpisəkə davə!’ ”
12 Ndzəkəŋushi'inəkya, nəhəmə noonə nə acii ga əndə'i əndə a shigi ahadoonə ətə ɗii rəgwaakii bwayakii, waatoo, paa ci gi'i tə Əntaŋfə, wata ca ŋusləgi a rəgwa Əntaŋfə Əndə vii əpinə. 13 Amma ma səndə ɗanuunə, tsakəməshinə uusəra patə, acii ga taa mi a kavə tuunə ka slənə 'waslyakəənə, ədzəmuunə a huurəgi. Dəmə aakəŋwa də tsakəshinə ha'ə, maɗa ma'ə saa'itə ci ənjə a 'wa ‘Ənshinə’! 14 Acii ma amə, maɗa kə ndzaa amə ndihə ndihə agi uushi'iitə 'watəgyaamə vii gooŋga agyanəkii daga ka 'watəginə ca'ə ka muudinə, kə ndzaa ci ətsa, uushi rəŋwə naamə da i Aləmasiihu. 3.14 3.6. 15 Kə ndzaa ci makə sətə bii malaaɓa ləkaləkatə oo'i,
“Ma ənshinə, maɗa kə fii unə uura ŋga Əntaŋfə,
fatəmə tə ci, goona huurəgi ədzəmuunə
makə sətə shi dzədzəshi'inuunə a huurəgi,
saa'itə kaaree tii ka ŋwaŋuunə ŋga Əntaŋfə.”
16 I wu saŋə sha fii uura ŋga Əntaŋfə, təya kaaree ka ŋwaŋuunaakəya? Əntaa patənə ŋga ənjitə ŋgiragi Muusa tə tii anə hanyinə ŋga Misəra kwa? 3.16-18 Ɓaan. 14.1-35. 17 Aashi i wu saŋə ɓəzhi səkə ŋga Əntaŋfə fəzə ənfwaɗə pu'una? Əntaa aashi ənjitə ɗii 'waslyakəənə, təya kwaalagi, təya məətəgi agi bilinə kwa? 3.17 Ɓaan. 14.29; 1 Koor. 10.5,10. 18 Ya saa'itə ji'i Əntaŋfə oo'i, paa tii ka mbu'unə aanə hanyiitə vii ci ka tii, paa tii ka əpi səkə davə əsə, agyanə i wu saŋə waɓi ci ha'a? Tii nə ənjitə pooshi tii fii waɓənaakii. 3.18 Ɓaan. 14.1-4. 19 Yoo, kə nee amə ɗii kə təkuree tii ka mbu'unə aanə hanyinəkii acii paa tii vii gooŋga ka Əntaŋfə.