1 Mana puku ni sonisukaghi te huatia Stephen, “?E utuni na lei ghanaghana raini?”

2 Me ghaghua gaia, “Ighau na lei tamagu mana lei hoghogu kau varongohiu mai. E mua kabu mua kukuada Abraham i Haran, ma God te tatea vania tua na bubulo Mesopotamia. Vuivuni 12:1 3 Me bosa vania, ‘Ko sanira kulamu vure mana komumu, mo ko tona tana komu ku tughunia vanigho.’ 4 Ma gaia te rughuhoru sania na komuna, me va kabu Haran. Mi murina te mate tamana God te lavi rughuhorua olia tana komu eni tau ghahaghau iga itaeni. Vuivuni 11:31; 12:4 5 Ma God te mua tunuvaa Abraham nia siki bona ni pari ge ke loghoa heghena ke manana ge ke gonia iga na valena. Hauva God te baubahu vania, ge ke nia hevei vania gaia mana lei vavatana tana ngiha. Tana bona God te nia baubahu vania Abraham e mua dalegha mua. Vuivuni 12:7; 13:15; 15:18; 17:8; 48:4 6 Me vaghaa eni na hava God te bosa vania, ‘Na lei vinavahuhumu kara ghahara tana kema keha, ma kara kabu pipiti ma kara nira seka e vati hangalatu na niulu. Vuivuni 15:13-14 7 Mi nau ku talua nigua na dete vuvungana na kema keri, na taba ni vure kiri kara pongora iga. Vaho na lei vinavahuhumu kara rughuhoru keha mai itagua ma kara holohaba kikinimau inau tana komu eni.’ Buka Rughuhoru 3:12 8 Ma God te vahea Abraham na vaughilala ni pahevaughilala te tughunitatea iga nina baubahu. Me alu tua na bongi te padi tara vahua,* Alu na bongi te padi tara vahua te kaekage sakai na week i murina ge ra pahevaughilala na pukuna na vure Jew tara idumia na bongi tara vahua te kaekage sakai na bongi. Abraham te pahevaughilalaa Isaac, ma Isaac te pahevaughilalaa na dalena Jacob, ma Jacob te pahevaughilalara e hangavulu rua na dalena, rana puku ni kema. Vuivuni 17:10-14; 21:2-4; 25:26; 29:31—35:18

9 “Ma rana lei dalena Jacob tara nia ghaghana sule ngangata na hoghodira Joseph na pukuna na tamadira te ghanaghana mavaa, ge ra nia hunulu ge ke seka† Na seka na tinoni lutu pipiti mana vahaghitaili. ni Egypt. Ma God te kabu itatana Vuivuni 37:11, 28; 39:2, 21 10 me lavi rughuhorua tana lei nina vahola soko. Ma Joseph te tughuru tana matana na vunaghi haba ni Egypt,‡ Na lei vunaghi haba ni Egypt tara holora nia Pharaoh. ma God te liouto vania, me hea na manaha. Mana vunaghi haba te nea Joseph ge ke haba pungisia Egypt talighu mana lei lologho ni vunaghi soko.” Vuivuni 41:39-41

11 “Mana ngengere sule te kalea Egypt mana Canaan talighu ghua. Rana lei kukuamami tara mua logo ghadira na vanga. Vuivuni 42:1-2 12 Tana bona Jacob te rongovia te ghahaa na vanga i Egypt, gaia te nira vetena rana dalena, na lei kukuada, tana vuivuni ni tona. 13 Me ruani na tonadira vaho, gaia Joseph te tughunitate utoa heghena vanira na lei hoghona vaho ge ra ghilala. Mana vunaghi haba ni Egypt te ghilalaa gaira sughua na lei hoghona Joseph. Vuivuni 45:1, 16 14 Ma Joseph te nia vetena na rongorongo vania na tamana Jacob, gaia mana lei nina binaboli udolu, e vitu hangavulu lima gaira kara mai kabu Egypt. Vuivuni 45:9-10, 17-18; 46:27 15 Ma Jacob te horu Egypt, gaia mana lei dalena tara mate igaa. Vuivuni 46:1-7; 49:33 16 Mara holai na hulidira, mara hola pulohighi va i Shechem tara va tavughi udolu iga, tana vatuluma ni beku Abraham te pelua, nia na rongo sule tana kemana Hamor.” Vuivuni 23:3-16; 33:19; 50:7-13; Joshua 24:32

17 “Me sara tua na bona God te nia baubahu vania Abraham, gaira na Israel tara sepalaghi tana komu Egypt 18 polo ge dato mai sakai na vunaghi haba ni Egypt te mua ghilalaa Joseph. Buka Rughuhoru 1:7-8 19 Me pegopegora na lei kukuada me vahaghitailira me talukaura na lei meomeo ge kara matera. Buka Rughuhoru 1:10-11, 22 20 Tana bona eni tara vahua Moses, na meomeo matakage tana matana God. Mara righitaonia tana valena tamana e tolu na vula. Buka Rughuhoru 2:2 21 Tana bona tara holaa mara va polokehaa tana puku ni valena, na dalena na vunaghi haba na vaivine te lavipangotia me kutia te vaghaa na dalena. Buka Rughuhoru 2:3-10 22 Mara taraia nia na lei vata ni manamanaha soko ni Egypt ge ke mane sule tana bosa mana gehegehe.

23 “Me poso tua e vati hangavulu na niuluna Moses, e ghanaghana ge ke ghoi va keneolira ghua, ivei sughua tara nea na talugoniadira lei hoghona rana Israel. Buka Rughuhoru 2:11-15 24 Ma gaia te righia sakai te labu bughoroa na mane ni Egypt me sakeraghi me lavitughu me labumatea na mane ni Egypt. 25 Me ghanaghana gaia ke, sogea kulana na vure kara ghilala kalea ivei te nea na lutu God tana volana hauva mara taho didira. 26 Me roropo ghana ge ghoi righira so erua na mane ni Israel toro pepo, me bosa vanira ge koro beto me ghaghua, ‘?Iroghau ke na tamahoghoni, e ghua ge ro pepo te vaghaa eni?’

27 “Ma gaia te vahaghitailia na hoghona te tiba keha Moses, ‘?Ahei te talugho ighoe ge ko vunaghi pungisighai mo ko dete vanighai? 28 ?O liona na mateagu te vaghaa to matea tua na mane ni Egypt i bongi?’

29 “Tana bona Moses te rongovia ge mataghu me sogha me rughuhoru keha sania Egypt me va kabu tana bubulo Midian. Me vahura igaa erua na dalena na mane. Buka Rughuhoru 18:3-4

30 “Me padi tua e vati hangavulu na niulu, na angel te tate vania Moses tana ghai reserese te vavu tana bona mamaha te taho iga na beti mana ghai, lilighina na ghotu Sinai. Buka Rughuhoru 3:1-10 31 Ma Moses te nia hoghohare na liona te vaevanea me va sakutua dutuvia ge ke vaevane utoa. Me rongovia na mangana Lord te bosa vania, 32 ‘Inau God didira na lei kukuamu, nina God Abraham, Isaac ma Jacob.’ Tana bona Moses te rongovia vaa ge mataghu me ghebeghebe me mua liona ge ke righia vaa. 33 Ma Lord te bosa vania, ‘Ko lavikehai na hahara tana marevomu, na pukuna na bona to tughura iga ke, na bona tabu. 34 Inau tu righia didira na vahaghitaili nigua na vure i Egypt mu rongovia ghua didira na dikalio, mi nau tu horu mai ge ku mai volara. Mi taeni tua, inau ku nigho vetena tona i Egypt.’

35 “A Moses eni agaia sakai tara nia sika na vure ni Israel mara ghaghua, ‘?Ahei te talugho ighoe ge ko nimami tinoni huhuli mo ko mane dete vanighai?’ God eni gaia te vetenaa ge ke vunaghidira me ke huiolira nina vure nia nina hahanga na angel te tate vania tana ghai reserese te vavu. Buka Rughuhoru 2:14 36 Ma gaia te lavihorura mai na vure nia na lei butuli mana lei vaughilala i Egypt maia tana horara Sisi, maia tana bona mamaha vati hangavulu na niulu. Buka Rughuhoru 7:5; 14:21; Buka Iduidu 14:33 37 Moses gaia eni te bosa vanira na vure ni Israel, ‘God, tana ngiha, ke nia vetena vanighau mai na prophet te vaghau inau tara nia vetena mai, ma gaia ke sakai tadira kulamiu na vure.’ Eruani Vetena 18:15, 18 38 Moses te kabu vaukolu itadira tana bona mamaha taho iga na beti mana ghai, kolura rana tamada, maia na angel te bosa vania tua tana ghotu Sinai. Mi iga te holai nina rongorongo ni vola God, me lubati alaalai vanighita mai tua. Buka Rughuhoru 19:1—20:17; Eruani Vetena 5:1-33

39 “Mara na lei tamada tara hove didira na taoniani, mara liliu keha vania, mara nia murilio mara ghanaghana ge kara ghoi pulohi so Egypt. 40 Mara ghaghua vania Aaron, ‘Ko gonighi vanighita na lei titinoni ge kara hulighita. A mua ghilalaa na hava te kalea na tinoni ia Moses, ge lavi rughuhorughita mai tana komu i Egypt.’ Buka Rughuhoru 32:1, 23 41 Ma gaira tara gonia na titinoni te vaghaa na reireina na buluka mara sukaghi mara holohaba kikinimai na lutu ni limadira. Buka Rughuhoru 32:2-6 42 Ma God te nira murilio, me soni rughu horu kehara ge kara holohaba kikinimara na lei veitughu tana parako, te vaghaa tara gerea tua ta didira na gegere na lei prophet rana Israel,

44 “Tana bona mamaha rana kukuada tara holaa na baebale tapole tabu ni vaughilalana God te nira udukolu. Mara goni taonia nia na reireina na hava God te bosa tatea tua vania Moses. Buka Rughuhoru 25:9, 40 45 Mi murina mai vaho, na lei kukuada tara lavihaghea mai na baebale tapole tabu tana bona Joshua te idevira mara sagukehaa na bona ni pari eni itadira na lei kema te vaghaa God te ghurukehara tua. Me ghaha igaa polo e sara na bongina na vunaghi haba David. Joshua 3:14-17

46 “Ma God te liouto vania, ma David te nongia ge ke kisua vania na Valetabu na vure ni Israel kara holohabaa iga. 2 Samuel 7:1-16; 1 Vavata 17:1-14 47 Ma dalena na vunaghi haba Solomon vaho ge kisua na Valetabu. 1 Vunaghi Haba 6:1-38; 2 Vavata 3:1-17 48 Mana pukuna God puku ni haba ke mua tangomana na ghahaana ilokana na vale te gonia na tinoni, te vaghaa te bosaa tua na prophet,

51 “Ighau tau kutuvatu ngangata. Me pui ghua na tobamiu, maia na kulimiu ta nina rongorongo God! Ighau tau vaghara na lei kukuamiu, tau tughuru pungisia haia nina lutu na Tarunga Tabu! Isaiah 63:10 52 ?Siki prophet ghua igaa na lei kukuamiu tara mua vahaghitailia? Mara labumatera na lei tinoni hola rongorongo nina God, tara bosadilaa na maiana nina Tinoni Lutu Maemane. Mi ghau tau peroa mau labumatea. 53 Ma God te vaheghau mai lei nina vetena tana limadira na lei angel, tara lubati alaalai mai tua, hauvaa mi ghau tau hughui nimiu so!” e ghaghua Stephen.

54 Agaira na lei ovu ni dete tara varongohia Stephen, ge ra rutu mara ghala girigirighi na livodira. 55 Ma Stephen te vonughia na Tarunga Tabu ge rei dato i kokou, me righia na mararana God, ma Jesus te tughuru tana pala madolona. 56 Ge ghaghua vanira, “Inau tu vaevanea na parako te lovovoka mana Dale Tinoni te tughuru tana pala madolona God!”

57 Ma nia na manga sule, gaira na lei ovu ni dete tara pitoi na kulidira nia na limadira mara sama kolu vaa itatana. 58 Mara ghurukehaa tana komu, ma gaira tara vuha talukehai didira puku ni tivi tana tuana na gari mane na ahana Saul, vaho ge ra peta matea. 59 Mara petaa so Stephen ge bosa, “Lord Jesus, ko lavia gatu na tarungagu!” 60 Me tualaghi tuturu me nia ghaeghahe na manga te sule, “Lord, ko bei idumia na palu eni vanira na vure raini!” Me bosa soko te vaghaa eni ge mate.