1 ኢቻሻንꬆ ኪታንቻይ ባ ዛዬዛ ፑኒዴስ። ታ ቃስ ሳሎፔ ካሴ ዱጌ ቢታ ቦላ ኩንዲዳ ፆሊንቴዛ ቤያዲስ። ኢዛስ ቃስ ጪማ ኦላ ዶዪዛ ቁልፔይ ኢሜቲዴስ። 2 ኢዚካ ሄ ጪማ ኦላዛ ዶዪዴስ። ሄ ጪማ ኦላፔ ዎልቃማ ታማ ጩዋ ማላ ጩዋይ ኬዚዴስ። ሄ ኦላፌ ኬዚዳ ጩዋዛ ጌዶን ኣዋ ኣርሼይኔ ሳሎይ ꬉሚዴስ። * ሜꬌ 19፡28

3 ሄ ጩዋፔ ቢታ ቦላ ቦሌይ ኬዚዴስ። ቢታ ቦላ ዲዛ ማስማሶታስ ዲዛ ዎልቃ ማላ ዎልቃይ ኢስታስ ኢሜቲዴስ። * ኬሳ 10፡12-15 4 ቢታ ቦላ ዲዛ ማታ ጊዲን ዎይኮ ኣይ ሚሺካ ሃራ ጪሊላ ሚሽ ሞንታ ማላ ዎይኮ ኣይ ሚꬂካ ቆሆንታ ማላ ኢስታስ ዮቴቲዴስ። ኢስቲ ቆሃና ቤሲዛይ ቃስ ሊጴ ቦላ ፆሳ ማታሜይ ባይንዳ ኣሳታ ፃላላ ጊዳና ማላ። * ሂዚ 9፡4 5 ሄ ኢስታካ ኢቻሹ ኣጊና ጋካናስ ዋዬ ፃላላ ዋዪሳና ኣቲን ዎꬎ ዎꬋና ማላ ፒቃዴይ ኢስታስ ኢሜቲቤና። ሄ ቦሌቲ ኣሳ ቦላ ጋꬂዛ ዋዬዚ ማሲማሶይ ኣስ ዱኪኮ ኣስ ሴሊዛ ሴላ ማላ። 6 ሄ ጋላሳታን ኣሳይ ሃይቃና ኮያና ሺን ሃይቆ ዴሜና። ሃይቃናስ ኣሞታና ሺን ሃይቆይ ኢስታፌ ባቃታና። * ኢዮ 3፡21፤ ኤር 8፡3

7 ቦሌቲ ቃስ ኦላስ ጊጌቲዳ ፓራታ ሚሳቴቴስ፤ ኢስታስ ሁዔ ቦላ ዎርቃ ኣክሊሌ ሚሳቲዛ ሚሺ ዴስ። ኢስታ ኣይፌሶይ ኣሳ ኣይፌሶ ሚሳቴስ። * ኢዩ 2፡4 8 ኢስታ ሁዔ ኢꬂኬይ ማጫሳ ሁዔ ኢሲኬ ሚሳቴስ፤ ኢስታ ኣቼይ ቃስ ጋሞ ኣቼ ሚሳቴስ። * ኢዩ 1፡6 9 ቢራታፔ ኦሴቲዳ ፁሩሬ ጌቴቲዛ ማይዖ ማላ ቲራ ቦላ ማይዒዛ ማይዖይ ኢስታስ ዴስ፤ ኢስታ ቄፌይ ጊሪዛ ጊሪሳይ ኦላስ ቶጌቲዛ ዳሮ ፓራኔ ፓራ-ጋሬታ ጊሪሳ ማላ ጊሬስ። * ኢዩ 2፡5 10 ኢስታስ ማሲማሶ ጎይና ማላይኔ ዱኪዛሶይ ዴስ። ኢስታስ ጎይና ጊዶን ኢቻሹ ኣጊና ጋካናስ ኣስ ቆሂዛ ዎልቃይ ዴስ። 11 ካዎይካ ኢስታስ ዴስ። ሄ ኢዚካ ጪማ ኦላ ኪታንቻዛ። ኢዛ ሱንꬃይካ ኢብራዌታ ቃላራ “ኣባዶኔ” ጌቴቴስ። ቃሴ ጊሪኬ ቃላራ “ኣጲሊዮኔ” ጌቴቴስ። ሄሳ ጉሲካ ፒቲ ꬋይሲዛይሳ ጉሳ። * ኣባዶኔ፥ ኣባዶኔይ ጊሪኬ ቃላራ “ኣጲሊዮኔ” ጌቴቴስ፤ ቢርሼꬃይካ “ፒቲ ꬋይሳ” ጉሳ

12 ኮይሮ ሂርጊሶ ዋሶይ ኣꬊዴስ። ሄሳፌ ቃስ ሃራ ናምዑ ዋሶይ ቡሮ ያና።

13 ኡሱፑንꬆ ኪታንቻይካ ባ ዛዬዛ ፑኒዴስ። ሄኮ! ፆሳ ሲንꬃን ዲዛ ዎርቃፌ ኦሴቲዳ ያርሾ ያርሺዛሶዛን ዲዛ ካጬታ ጊዶፌ ጊሪስ ሲያዲስ። * ኬሳ 30፡1-3 14 ሄ ጊሪሳይካ ዲንኬ ኦይኪዳ ኡሱፑንꬃ ኪታንቻዛꬆ “ዎጋ ሻፋን ኤፊራፂሴን ቃሼቲ ዲዛ ኦይዱ ኪታንቻታ ቢርሻ ዬዳ” ጊዴስ። 15 ሃይሳ ሃ ሳቴዛሲኔ ሃ ጋላሳስ፥ ሃ ኣጊናሲኔ ሃ ላይꬃስ ጊጌቲዳ ኦይዱ ኪታንቻቲ ኣሳ ዜሬꬃፌ ጪጎ ባጋ ዎꬋና ማላ ቢርሼቲዳ። 16 ሄ ፓራን ኦሊዛ ኣሳታ ጮራቴꬃይ ፄታታን ቆዴቲዛ ሚሎኔ ጊዲዳይሳ ታኒ ሲያዲስ።

17 ፓራቲኔ ሄ ፓራታ ቶጊዳ ኣሳታ ታኒ ኣጁታን ቤዪዳይቲ ሃይሳፌ ካሊዛይሳ ማላኮ! ኢስታስ ቲራ ቦላ ዲዛ ፁሩሬዚ ታማ ቦንቆ ማላ ዞዖ፤ ሳሎ ማላ ካሬꬂኔ ጋላልዖ ሚሳቴስ። ፓራታ ሁዔይ ጋሞ ሁዔ ሚሳቴስ። ኢስታ ዱናፔ ታማይኔ ጩዋይ ዲኔ ጌቴቲዛ ሚሼ ኬዜስ። 18 ኢስቲ ባ ዱናፔ ኬሲዳ ታማይ ጩዋይኔ ዲኔይ ሃ ሄꬑ ቦቻታን ኣሳ ዜሬꬃፌ ጪጎይ ሃይቂዴስ። 19 ሄ ፓራታ ዎልቃይ ኢስታስ ዱና ጊዶኒኔ ጎይና ቦላ ዴስ። ኢስታ ጎይናይ ሾሽ ሚሳቴስ። ኢዛስ ሾሻ ሁዔይካ ዴስ። ኢስቲ ኣሴ ሄሳን ቆሄቴስ።

20 ሃይታ ሃ ቦቻታን ሃይቆፔ ኣቲዳ ኣሳ ዜሬꬃቲ ካሴ ባ ኦꬂዳ ኢታ ኦሶፔ ሲሚዲ ማሮቴꬃን ጌሊቤይቴና። ዳይዳንꬃስ ዎርቃፌ፥ ቢራፔ፥ ፃርቂማላፔ፥ ሹቻፌ፥ ሚꬃፌ፥ ኦሴቲዳ ፄላናስ ዎይኮ ሃይꬃን ሲያናስ ዎይኮ ሃሙታናስ ዳንዳዮንታ ኤቃታስ ጎይኖ ኣጊቤይቴና። * ማዛ 115፡4-7፤ 135፡15-17፤ ዳኔ 5፡23 21 ሄሳꬆካ ሼምፖ ዎꬎፔ፥ ቢታፔ፥ ላይማፌኔ ካይሶቴꬃፌ ሲሚዲ ማሮቴꬃን ጌሊቤይቴና።