11
ፃማቂዛ ዮሃኒሲ ኪቲዳ ኣሳታ
(ሉቃ 7፡18-35)
1 ዬሱሲካ ባና ካሊዛ ታማኔ ናምዑ ኣሳታስ ኣዛዞ ኢሚ ዉርሲዳፔ ጉዬ ታማርሳናሲኔ ሳባካናስ ጋሊላን ዲዛ ካታማታ ቢዴስ።
2-3 ዮሃኒሲ ቃሾ ኬꬃን ዲሼ ኪርስቶሳስ ኦꬂዛ ሃኖታ ሲይዲ ባና ካሊዛይታ ኢዛኮ ዬዲዲ “ኣሲ ኣሺዛዴይ ያና ጌቴቲዳይ ኔኔዬ? ሃራ ናጊኖ?” ጊዲ ኦይቺዴስ።
4 ዬሱሲካ ዛሪዲ “ቢዲ ኢንቴ ሲዳይሳኔ ኢንቴ ቤዪዳይሳ ዮሃኒሳስ ዮቲቴ። 5 ቆቄቲ ፄሌቴስ፤ ዎቤቲ ሃሙቴቴስ፤ ኢንችራቻ ሃርጊዛይቲ ፓፄቴስ፤ ቱሌቲ ሲዬቴስ፤ ሃይቂዳይቲ ሃይቆፔ ፓፂ ዴንዴቴስ፤ ማንቆታስ ሚሺራቾ ቃላይ ዮቴቴስ። 6 ታናን ꬉጴቶንታዴይ ኣንጄቲዳዴ” ጊዴስ።
7 ዮሃኒሳ ካሊዛይቲ ቢዳፔ ጉዬ ዬሱሲካ ኣሳስ ዮሃኒሳ ጊሽ “ኣይ ቤያናስ ዱጌ ባዞ ቢዴቲ? ጫርኮይ ቃꬂዛ ሾምቦቆ ቤያናስ ዪዴቲ? 8 ዎይኮ ኣይ ቤያናስ ኬዚዴቲ? ሎዖ ማይዖ ማይዒዲ ሎዒ ኡቲዳዴ ቤያና ዪዴቲ? ሎዖ ማይዖ ማይዒዲ ሎዒዛይቲ ካዎታ ኬꬃን ዴቴስ። 9 ሂስቲን ኣይ ቤያና ኬዚዴቲ? ናቤ ቤያና ኬዚዴቲ? ኤ፥ ታ ኢንቴስ ጋይስ ናቤፔ ኣꬊዛይሳ ቤያናሳ።
10 ‘ኔ ባና ኦጌ ኔስ ጊጊሳናዴ ኔፔ ካሴታ ታ ኔስ ኪታና
ጌቴቲዲ ኢዛ ጊሽ ካሴ ፃፌቲዳዴይ ኢዛኮ!’
ጊዴስ። 11 ታ ኢንቴስ ቱሙ ጋይስ፤ ማጫሳፔ ዬሌቲዳ ኣሳፔ ፃማቂዛ ዮሃኒሳ ሚሳቲዛ ኣሲ ቢታ ቦላ ዴንዲቤና። ጊዲኮካ ፆሳ ካዎቴꬃን ኣስ ኡባፌ ላፋ ኣሲ ዮሃኒሳፔ ኣꬋና።
12 “ፃማቂዛ ዮሃኒሳ ዎዴፔ ሃ ሲሚን ሃዒ ጋካናስ ሳሎ ካዎቴꬃያ ዳሮ ባፄታ ቦላ ዳዉስ። ሚኖ ኣሳቲ ፃላ ኢዞ ዴማና። 13 ናቤቲካ ሙሴ ዎጋይካ ዉሪ ዮሃኒሳ ዎዴ ጋካናስ ቡሮፔ ሃናናይሳ ዮቲዳ። 14 ሂስቲኮ ኢንቴ ኤካና ኮይኮ ኢዚ ያና ጌቴቲዳ ኤላሲ ኢዛኮ! * ማቶ 17፡10-13፤ ማር 9፡11-13 15 ሲዪዛ ሃይꬂ ዲዛ ኣስ ሲዮ!
16-17 “ሃይሳ ሃ ዎዴ ኣሳ ኣዛን ሌሚሶ? ጊያን ኡቲዲ ባ ላጌታ ‘ኑ ኢንቴስ ዲꬂ ዲፂን ኢንቴ ዱርቤኬታ! ዬሆ ዚላልꬅ ዚላሊን ዬኪቤኬታ!’ ጊዛ ናይታ ሚሳቴቴስ። 18 ዮሃኒሲ ሙሳፌኔ ኡሻፌ ናጌቲዲ ዪዳ ጊሽ ‘ኢዚ ዳይዳንꬃራ ዴስ’ ጊዳ። 19 ታ ኣሳ ናይ ማሼኔ ኡያሼ ዪን ‘ሃይሲ ሚዲ ካሎንታ ኣሳ፥ ኡሻንቻ፥ ቃራፃ ሺሺዛይታሲኔ ናጋራንቻታስ ላጌኮ!’ ጊዳ። ጊዶ ኣቲን ፆሳ ኤራቴꬂ ባ ኦሶን ፂላዱስ” ጊዴስ።
ኣማኖንታ ኢፂዳ ጊሽ ዋላሴቲዳ ካታማታ
(ሉቃ 10፡13-15)
20-21 ሄሳፌ ጉዬ ዬሱሲ ኢዚ ማላታታ ኦꬂዳ ካታማ ኣሳይ ማሮቴꬃን ጌሎንታ ኣጊዳ ጊሽ “ኩራዚኔኔ ቤቴሳይዳ! ኢንቴና ኣዬ ኣና! ኢንቴ ቦላ ኦሴቲዳ ማላታይ ፂሮሴ ቦላኔ ሲዶና ቦላ ኦሴቲዳኮ ኢስቲ ማቃ ማይዒዲኔ ቢዲንꬃን ኡቲዲ ቤኒ ቤኒ ማሮቴꬃን ጌላናኮሺን። * ማቃ ጊዛይሲ ኢሲ ኢሲ ባጋ ጋሞꬆ ቃላን ዋሮ ጌቴቴስ። 22 ሄሳ ጊሽ ታኒ ኢንቴስ ጊዛይ ፒርዳ ጋላስ ኢንቴፌ ኣꬊ ፂሮሴሲኔ ሲዶናስ ቂፃቴይ ካዉያና።
23 “ሃኔ ቂፊርናሆሜ ፑዴ ሳሎ ꬎቁ ꬎቁ ጋናስ ኮያዲ? ጊዶ ኣቲን ኔኒ ዱጌ ሲዖሌ ዎꬋንዳሳ፤ ኔ ቦላ ኦሴቲዳ ማላታይ ሶዶሜን ኦሴቲዳኮ ሶዶሜይ ሃቺ ጋካናስ ዳናኮሺን። 24 ሄሳ ጊሽ ታ ኔና ጊዛይ ፒርዳ ጋላስ ቂፃቴይ ኔፔ ሶዶሜስ ካዉያና” ጊዴስ። * ማቶ 10፡15፤ ሉቃ 10፡12
ኪርስቶሲ ኢሚዛ ሼምፖ
(ሉቃ 10፡21-22)
25 ሄ ዎዴ ዬሱሲ “ሳሎኔ ሳዓ ጎዶ! ታ ኣዋዉ! ሃይሳ ዳሮ ኤራንቻታፔኔ ጪንጫታፔ ቆታዳ ቄሪ ናይታስ ኔ ቆንጪሲዳ ጊሽ ታ ኔና ጋላታይስ። 26 ታ ኣዋዉ! ኤ ሃይሲ ኔ ሲንꬃን ሎዖ ኔ ሼኔ ጊዲዲ ቤቲዴስ።
27 “ዉሪካ ታ ኣዋፔ ታስ ኢሜቲዴስ፤ ኣዋፔ ኣቲን ናዛ ጊሽ ኤሪዛ ኣስ ባዋ፤ ቃሴ ናዛፔኔ ናዚ ባ ሼኔን ቆንጪሲዳ ኣሳፔ ሃራይ ኣዋ ኤሪዛ ኣስ ባዋ። * ዮሃ 3፡35፤ 1፡18፤ 10፡15
28 “ቶሆይ ዴፂዳይቶ፥ ዳቡሪዳይቶ ኢንቴ ዉሪካ ታኮ ሃ ዪቴ፤ ታካ ኢንቴስ ሼምፖ ኢማና። 29 ታ ቃምባራ ቶኪቴ፤ ታፔካ ታማሪቴ፤ ታኒ ታ ዎዝናን ኣዳኔ ኣሽኬ፤ ኢንቴ ሼምፖስ ኢንቴ ሼምፖ ዴማና። 30 ታ ቃምባራይ ሻይኮኔ ታ ቶሆይ ካዉሻ” ጊዴስ።