1 ቃሴካ ዬሱሲ ዴሬዛሲኔ ባና ካሊዛይታስ፥ 2 “ሙሴ ዎጋ ታማርሲዛይቲኔ ፋርሳዌቲ ሙሴ ዎምባራ ቦላ ኡቲዳ። 3 ሄሳ ጊሽ ኢስቲ ኢንቴስ ዮቲዛይሳ ዉርሲ ኦꬂቴኔ ናጊቴ፤ ጊዶ ኣቲን ኢስቲ ዱናን ሃሳዪዛይሳ ማላ ኦሶን ቤሶንታ ጊሽ ኢንቴ ኢስታ ኦሶ ካሎፍቴ።

4 “ሄሳꬆካ ኣሲ ቶካናስ ዳንዳዮንታ ዴፆ ቶሆ ቃቺዲ ኣሳ ሃሼ ቦላ ዎꬄቴስ ሺን ባሲ ጊዲኮ ቢራꬌ ፄራንካ ቦቼቴና። 5 ኢስታ ኦሶ ዉርሲ ኣሲ ቤያና ማላ ኦꬄቴስ፤ ባ ኣሼንኪታቤ ጌሻ ማፃፋ ጊዶፋ ፃፊ ኤኪዳ ኢሲ ኢሲ ፂቂሴታ ኪታቤ ሲኪዲ ሊጴ ቦላ ዎይኮ ኩሼን ቃቺዛዝ ኦꬄቴስ። ባ ማይዖ ማጫራ ኣዱሴቴስ። 6 ዲጊሳይ ዲዛሶን ቦንቾ ሶ ኣይሁዳ ዎሳ ኬꬃንካ ሲንꬃራ ኡታና ዶሴቴስ። 7 ሄሳꬆካ ጊያ ጊዶን ሳሮ ጌቴታናሲኔ ኣሳይ ኢስታ ‘ኣስታማሬ!’ ጋና ማላ ኮዬቴስ።

8 “ኢንቴ ጊዲኮ ‘ኣስታማሬ’ ጌቴቲ ፄይጌቶፍቴ። ኢንቴ ኣስታማሬይ ኢሳ ፃላላ ጊዲሺን ኢንቴ ዉሪካ ኢሶይ ኢሳስ ኢሻንታ። 9 ሳሎን ኢንቴስ ኢሲ ኣዋይ ፃላላ ዲዛ ጊሽ ቢታ ቦላ ኦናካ ‘ኣዋዉ!’ ጊዲ ፄይጎፒቴ። 10 ኢንቴ ኣስታማሬይ ኢሲ ኪርስቶሳ ፃላ ጊዲዳ ጊሽ ኢንቴ ‘ኣስታማሬቶ!’ ጌቴቶፍቴ። 11 ኢንቴ ጊዶን ኡባፌ ኣꬊዛዴይ ኢንቴስ ኦꬂዛዴ ጊዳና። * ማቶ 20፡26-27፤ ማር 9፡35፤ 10፡43-44፤ ሉቃ 22፡26 12 ባና ꬎቂሲዛዴይ ካዉያና፤ ባና ካዉሺዛዴይ ቦንቼታና። * ሉቃ 14፡11፤ 18፡14

13 “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ኢንቴኖ ፋርሳዌቶ! ኣሳይ ፆሳ ካዎቴꬅ ጌሎንታ ማላ ኣሳ ቦላ ኢንቴ ፔንጌ ጎርዲዛ ጊሽ ኢንቴና ኣዬ-ኣና! ኢንቴ ኢንቴስ ጌሌኬታኔ ጌላናስ ኮዪዛይታካ ጌልꬄኬታ። 14 ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴካ ፋርሳዌቶ! ኢንቴስ ኣዬ-ኣና! ኣዚናይ ባይንዳ ማጫሳታ ኬꬃ ካሎሲሼ ኣሳ ኣይፌ ሲንꬃን ኣዱሳ ዎሳ ኢንቴ ዎሲዛ ጊሽ ኢንቴ ኢታ ፒርዳ ፒርዴታና። * ኢሲ ኢሲ ጌሻ ማፃፋቲ ፓይዶ ታማኔ ኦይዱ ቦላ [14] ዲዛ ቆፋ ጉጄቴስ፤ ቆፋይካ ማርቆሳን ሼምፖ 12፡40 ዲዛይሳ ሚሳቴስ።

15 “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴካ ፋርሳዌቶ! ኢሲ ኣስ ኣይሁዳ ኣማኖን ጌልꬃናስ ኣባ ቦላራኔ ቢታ ቦላራ ዩዪ ዳቡርዲኔ ኣማንꬂዳ ኣሳ ኢንቴፌ ናምዑ ኩሼ ኣꬂዲ ጋናሜ ና ኢንቴ ኬሲዛ ጊሽ ኢንቴና ኣዬ-ኣና!

16 “ኢንቴኖ! ኢንቴስ ቆቂ ኡቲዲ ሃራታ ካሌꬂዛይቶ! ኢንቴስ ኣዬ-ኣና! ‘ኦኒካ ፆሳ ኬꬃን ጫቂኮ ኣይኮይ ባ’ ጊዶ ኣቲን ‘ፆሳ ኬꬃ ጊዶን ዲዛ ዎርቃን ጫቂኮ ጫቆ ጎሜይ ጋካና’ ጌታ። 17 ኢንቴኖ ቆቂዳይቶ! ባሌቲዳይቶ፥ ዎርቃፌኔ ዎርቃ ዱማሲዳ ፆሳ ኬꬃፌ ኣዋይሲ ኣꬊዜ? 18 ሄሳꬆካ ‘ኦኒካ ያርሾ ያርሺዛሶ ቦላ ጫቂኮ ኣይኮይ ባዋ፤ ሺን ያርሺዛሶን ዲዛ ያርሾ ቦላ ጫቂኮ ጫቆይ ጎሜስ’ ጌታ። † ያርሾ። ኣሲ ባ ጎዳስ ጊዲ ኦꬂዛ ኦሶይ ዉሪ ያርሾ ጌቴቴስ። 19 ኢንቴኖ ቆቄቶ! ያርሾፔኔ ያርሾ ሺሺዛሶፔ ኣዋይሴ ኣꬊዛይ? 20 ሄሳ ጊሽ ያርሾ ሺሺዛሶ ቦላ ጫቂዛዴይ ያርሾሶዛ ቦላኔ ያርሺዛሶ ቦላ ዲዛ ኡባ ሚሻን ጫቄስ። 21 ሄሳꬆካ ፆሳ ኬꬃዛ ቦላ ጫቂዳይ ፆሳ ኬꬃኒኔ ኢዛ ጊዶን ኣቂዛይሳን ጫቄስ። 22 ሳሎን ጫቂዛዴይካ ፆሳ ኣልጋኒኔ ኣልጋ ቦላ ኡቲዳይሳን ጫቄስ። * ኢሳ 66፡1፤ ማቶ 5፡34

23 “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ፋርሳዌቶ! ኢንቴና ኣዬ ኣና! ኣሱታፔ፥ ኣኑጋፔኔ ካትካልዓፌ ታማፌ ኢሲኖ ኢሜታ ሺን ዎጋታፔ ዋናቲዛይታ ሄይቲካ ቱማ ፒርዳ፥ ማሮቴꬂኔ ኣማኔቴꬅ ጊዲኮ ካꬊዴታ። ሄይታ ኣጎንታ ዲሼ ሃይታንታ ኢንቴ ኦꬃናስ ኢንቴስ ቤሴስ ሺን ኣጊዴታ። * ሌዌ 27፡30 24 ኢንቴኖ ቆቂ ኡቲዲ ካሌꬂዛይቶ! ኡዔ ጋጪዲ ኡዬታ ሺን ጋሜላ ሙሜ ሚቴታ!

25 “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶኔ ፋርሳዌቶ! ኢንቴስ ኣዬ-ኣና! ፁዓሲኔ ኬሬስ ቦላ ባጋ ቁጬታ ሺን ኢዛ ጊዶን ዲዛይሳ ኢንቴ ቦንቃኒኔ ኡዜቴꬃን ሺሺዴታ። 26 ኔኖ ቆቄ ፋርሳዌዞ! ኮይሮታዳ ፁዓሲኔ ኬሬስ ጊዶ ባጋ ጌሻ! ሄሳፌ ጉዬ ካሬ ባጋይ ጌሽ ጊዳና።

27 “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴ ፋርሳዌቶ! ቦላ ባጋይ ኖራራ ሜሼቲዲ ሎዒዛይቲ ጊዶይ ጊዲኮ ሃይቂዳይታ ሜቄꬂኔ ዳሮ ቱናኔቴꬃን ኩሚዳ ዱፎታ ሚሳቲዛ ጊሽ ኢንቴና ኣዬ-ኣና! * ሃዋ 23፡3 28 ኢንቴካ ቦላ ባጋራ ኣሳስ ፂሎ ኣሳታ ሚሳቴታ፤ ኢንቴ ጊዶይ ጊዲኮ ጪሞኒኔ ኢታቴꬃን ኩሚዴስ።

29 “ኢንቴኖ ዱናን ጪሚዛይቶ! ሙሴ ዎጋ ኣስታማሬቶ፥ ቃሴካ ፋርሳዌቶ! ኢንቴስ ኣዬ-ኣና! ናቤታ ዱፎ ሎዔꬂዛይቶ፥ ፂሎ ኣሳታ ዱፎ ሃዉልቴራ ጊጊሲዛይቶ! 30 ኑ ኣዋቲ ናቤታ ዎꬊዛ ዎዴ ኑ ዲዛኮ ኢስታራ ዙፔቶኮኮ ሺን፥ 31 ኢንቴ ናቤታ ዎꬊዳ ኣሳታ ናይታ ጊዲዳይሳ ኢንቴ ዱናራ ኢንቴርካ ኢንቴ ኢንቴ ቦላ ማርካቴታ። 32 ሂስቲኮ ኦሴቲዲ ፖሌቶንታ ኦጌ ቦላ ዲዛ ኢንቴ ኣዋታ ኦሶ ፖሊቴ። ‡ ቦኔ፥ ኢስታ ዴሬን ሚꬃቲ ሃይꬅ ኬሲዛይኔ ጪሊሊዛይ ቦኔይ ማቲሺን ጊዶይሳ ቤሴስ።

33 “ኢንቴኖ ዱኪዛ ኢታ ሾሻ ናይቶ! ጋናሜ ታማ ፒርዳፌ ኢንቴ ዋኒ ኣታኔ? * ማቶ 3፡7፤ 12፡34፤ ሉቃ 3፡7 34 ሄሳ ጊሽ ናቤታኔ ኤራንቻታ ኣስታማሬታካ ታ ኢንቴስ ዬዳና። ኢንቴ ኢስታ ጊዶፌ ኢሲ ኢሲ ኣሳታ ዎꬋና። ባጋይታ ኢንቴ ካቃና፤ ባጋይታ ኢንቴ ኣይሁዳ ዎሳ ኬꬃን ጋራፋናኔ ሃ ካታማፔ ሃራ ኢንቴ ጎዳና። 35 ሄሳ ጊሽ ፂሎ ኣቤሌ ሱꬃፌ ሃ ሲሚን ፆሳ ኬꬃኒኔ ያርሾ ያርሺዛሶ ጊዶን ኢንቴ ዎꬊዳ ባራኪዮ ና ዛካራሳ ሱꬃ ጋካናስ ቢታ ቦላ ጉኪዳ ፂሎታ ሱꬃ ኡባስ ኢንቴ ኦይሼታና። * ሜꬌ 4፡8፤ 2ታር 24፡20-21 36 ታ ኢንቴስ ቱሙ ጋይስ፤ ካሴ ኣꬊዳ ዮዖ ኡባስ ሃይሲ ሃ ዬሌታይ ኦይሼታና።

37 “ሃኔ ዬሩሳላሜ! ናቤታ ዎꬊዛሬ! ኔኮ ኪቴቲዳይታ ሹቻራ ጫዲዛሬ! ሃኔ ዬሩሳሌሜ ኩቶ ኣያ ባ ጪዬታ ባ ቄፌ ጊዶ ሺሺዛ ማላ ታ ኔ ናይታ ሺሻናስ ኣፑን ዎዴ ኮያዲናሺን ኔ ጊዲኮ ኮያባካ። 38 ሄኮ ኢንቴ ኬꬂ ካይስ ጊዲ ኣታና። * ኤር 22፡5 39 ታ ኢንቴስ ቱሙ ጋይስ፤ ኢንቴ ጎዳ ሱንꬃን ዪዛዴይ ኣንጄቲዳዴ ጋና ዎዴይ ጋካናስ ናምዓንꬆ ታና ቤዬኬታ” ጊዴስ። * ማዛ 118፡26