19
ዬሱሲ ኤኮ ጊሺኔ ጌሎ ጊሽ ታማርሲዴስ
(ማር 10፡1-12)
1 ዬሱሲ ዮቲ ዉርሲዳፔ ጉዬ ጋሊላ ኣጊዲ ዮርዳኖሴ ፒንꬃን ዲዛ ዩሁዳ ኣዉራጃ ቢዴስ። 2 ዳሮ ዴሬይ ኢዛ ሄን ካሊን ኢዚካ ሃርጋንቻታ ፓꬂዴስ።
3 ፋርሳዌቲ ኢዛ ፓጫናስ ኢዛኮ ሺቂዲ ኣይ ጋሶንካ “ኣሲ ባ ማቾ ኣንጂ ዬዳና ቤሲዜ?” ጊዲ ኦይቺዳ።
4 ኢዚካ ኢስታስ “ፆሲ ኮይሮፔ ማጫኔ ኣዴ ሜꬊዳይሳ ናባቢቤይኬቲ? ጊዴስ። * ሜꬌ 1፡27፤ 5፡2 5 ቃሴካ ‘ኣሲ ኣዋኔ ኣዮ ኣጊዲ ባ ማቺራ ኢሲፌ ጊዴስ። ናምዓይካ ኢሲ ኣሾ ጊዴቴስ’ ጌቴቲዳይሲ ሃይሳ ጌዶን ጊዴኔ? ጊዴስ። * ሜꬌ 2፡24 6 ናምዓይ ኢሲ ኣሾ ኣቲን ሲንꬃፌ ናምዑ ጊዴቴና። ሄሳ ጊሽ ፆሲ ጋꬂ ዋፂዳይሳ ኣሲ ሻኮፎ” ጊዴስ።
7 ኢስቲካ ኢዛስ “ሂስቲን ሙሴይ ‘ኣሲ ባ ማቾ ኣንጂ ዬዲዳ ኣንጆ ዋራቃታ ኢዚስ ኢሚ ዬዶ’ ጊዲ ኣዛስ ኣዛዚዴ?” ጊዳ። * ዛሬ 24፡1-4፤ ማቶ 5፡31
8 ዬሱሲካ ኢስታስ “ሙሴይ ኢንቴ ዎዝና ሙሜቴꬅ ቤዪዲ ማቼታ ኢንቴ ኣንጃና ማላ ፒቃዴ ኢንቴስ ኢሚዴስ ኣቲን ኮይሮፔ ሄሳ ማላ ጊዴና።
9 “ታ ኢንቴስ ቱሙ ጋይስ፤ ባ ኣዚናፔ ሃራራ ላይማቶንታ ዲሺን ባ ማቾ ኣንጂዲ ሃራ ማቾ ኤኪዛዴይ ዉሪ ላይማቴስ። ኣንጄቲዳሮካ ኤኪዛዴይ ኢዚራ ላይማቴስ” ጊዴስ። * ማቶ 5፡32፤ 1ቆሮ 7፡10-11 10 ዬሱሳ ካሊዛይቲ ኢዛስ “ማቺ ዎጋይኔ ኣዚና ዎጋይ ሃይሳ ማላ ጊዲኮ ማቾ ኤኮንታ ኣጎይ ሎዖ” ጊዳ።
11 ጊዶ ኣቲን ዬሱሲ ኢስታስ “ኢሲ ኢሲ ኢሜቲዳ ኣሳታፔ ኣቲን ሃይሳ ቲሚርቴዛ ኦኒካ ኤካናስ ዳንዳዬና። 12 ጋሶይካ ኢሲ ኢሲ ኣሳይ ባ ኣዪ ኡሎፔ ዬሌቲሼ ሹፋ ጊዲዲ ዬሌቴስ፤ ኢሲ ኢሲ ኣሳይ ኣሳ ኩሼን ቃራቴቲዲ ጉንዱሌስ፤ ኢሲ ኢሲ ኣሳይ ሳሎ ካዎቴꬃስ ጊዲ ባና ባርካ ጉንዱላ ኦꬂዛ ኣሲካ ዴስ። ሃይሳ ኤካናስ ዳንዳዪዛዴይ ኤኮ” ጊዴስ።
ዬሱሲ ጉꬃ ናይታ ኣንጂዴስ
(ማር 10፡13-16፤ ሉቃ 18፡15-17)
13 ሄ ዎዴ ዬሱሲ ኢስታ ቦላ ባ ኩሼ ዎꬂዲ ዎሳና ማላ ጉꬃ ናይታ ኢዛኮ ኤኪ ኤሂዳ፤ ጊዶ ኣቲን ኢዛ ካሊዛይቲ ናይታ ኤሂዳ ኣሳታ ቦላ ሃንቄቲዳ። 14 ዬሱሲ “ናይቲ ሃ ታኮ ዬቶ፤ ዲጎፍቴ፤ ሳሎ ካዎቴꬂ ሃይታንታ ማላሳ!” ጊዴስ።
15 ባ ኩሼ ናይታ ቦላ ዎꬂዲ ኣንጂዳፔ ጉዬ ሄፔ ዴንዲ ቢዴስ።
ናቴꬃ ዱሬ ኣዴዛ ኦይሻ
(ማር 10፡17-31፤ ሉቃ 18፡18-30)
16 ሄሳፌ ጉዬ ኢሳዴይ ዬሱሳኮ ሺቂዲ “ኣስታማሬ! ሜርና ዴዖ ዴማናስ ታኒ ሎዖ ኦሶ ኣይ ኦꬆ?” ጊዲ ኦይቺዴስ። 17 ዬሱሲካ “ታና ኣዛስ ሎዖ ጊሽ ኦይቻይ? ሎዖይ ኢሲ ፆሳ ፃላላ፤ ጌዴ ዴዖይ ዲዛሶ ኔ ጌላና ኮይኮ ኣዛዞታ ናጋ” ጊዴስ።
18-19 ኣዴዚ “ኣዛዞቲ ኣዋይቴ?” ጊዲ ኦይቺዴስ። ዬሱሲካ ዛሪዲ “ኣስ ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ ኔ ኣዋኔ ኔ ኣዮ ቦንቻ፤ ኔ ሾሮ ኔ ማላ ሲቃ” ጊዴስ። * ኬሳ 20፡13-16፤ ዛሬ 5፡17-20፤ ሌዌ 19፡18 20 ናቴꬃዚ ዛሪዲ “ሃይሳ ዉርሳ ታ ናጋዲስ፤ ሃራይ ኣዚ ታስ ፓጪዴ?” ጊዴስ።
21 ዬሱሲካ ዛሪዲ “ኔ ሙሌ ፂላና ኮይኮ ባዳ ኔ ሃሪዳዝ ዉርሳ ባይዛዳ ሚሻ ዉርሳ ማንቆታስ ኢማ፤ ኔኒ ሳሎን ሚሽ ዴማንዳሳ፤ ሄሳፌ ጉዬ ሲማ ያዳ ታና ካላ” ጊዴስ።
22 ኣዴዚ ሄሳ ሲይዲ ኢዛስ ዳሮ ሚሺ ዲዛ ጊሽ ኬሂፔ ሚሼቲሼ ቢዴስ። 23 ዬሱሲ ባና ካሊዛይታ “ታ ኢንቴስ ቱሙ ጋይስ፤ ዱሬቲ ሳሎ ካዎቴꬅ ጌላናይሲ ዳሮ ሜቶ። 24 ቃሴካ ታኒ ኢንቴስ ጊዛይ ዱሬይ ሳሎ ካዎቴꬅ ጌላናይሳፌ ጋሜላይ ናርፔ ሉኮራ ኣꬌꬂ ካዉያና” ጊዴስ። * ጋሜላይ ጊዛይሳ ኢሲ ኢሲ ባጋ ጋሞꬆ ቃላን ጋሌይ ጌቴስ።
25 ሄሳ ሲዪዳ ኢዛ ካሊዛይቲ ዳሮ ቆፒዲ “ሂስቲን ኦኒ ኣታናስ ዳንዳዪዜ?” ጊዲ ዬሱሳ ኦይቺዳ።
26 ዬሱሲካ ኢስታ ፄሊዲ “ሃይሲ ኣሳ ኣቻን ዳንዳዬቴና፤ ፆሳ ኣቻን ጊዲኮ ዉሪካ ዳንዳዬቴስ” ጊዴስ።
27 ጴፅሮሲ ኢዛስ ዛሪዲ “ኑ ዉርሲካ ኣጊዲ ኔና ካሊዶስ፤ ሂስቲን ሃዒ ኑ ኣይ ዴማኔሻ?” ጊዴስ።
28 ዬሱሲካ ኢስታስ “ታ ኢንቴስ ቱሙ ጋይስ፤ ኣሳ ናይ ቡሮ ያና ኦራꬃ ኣላሜን ባ ቦንቾ ኣልጋ ቦላ ኡቲዛ ዎዴ ኢንቴ ታና ካሊዳይቲ ታማኔ ናምዑ ኣልጋ ቦላ ኡቲዲ ታማኔ ናምዑ ኢስራዔሌ ናይታ ቦላ ፒርዳና። * ማቶ 25፡31፤ ሉቃ 22፡30 29 ታ ሱንꬃ ጊሽ ጊዲ ባ ኬꬄ፥ ባ ኢሻታ፥ ባ ሚቼታ፥ ባ ኣዋ፥ ባ ኣዮኔ ባ ናይታ፥ ዎይኮ ባ ቢታ ኣጊዛ ኣሲ ዉሪ ፄቱ ኩሼ ዳኮ ኤካና፤ ሜꬊና ዴዖካ ላታና። 30 ጊዶ ኣቲን ዳሮ ሲንꬄ ጊዲዳ ኣሳቲ ጉዬ ጊዳና፤ ዳሮ ጉዬን ዲዛ ኣሳቲ ሲንꬃታና። * ማቶ 20፡16፤ ሉቃ 13፡30