17
Indumwa hiꞌgulu lyeꞌDamasiki neꞌHisiraheeri
1 Ino ndumwa ya Rurema, iri hiꞌgulu lyaꞌkaaya keꞌDamasiki.
Lolagi! Akaaya keꞌDamasiki kâye sibe,
kanasigale biguuka naaho.* 17.1 Yeremiya 49.23-27; Hamoosi 1.3-5; Zakariya 9.1.
2 Kiri noꞌtwaya twa mu mbande zeꞌHaroweri tugaashaka.
Ha nyuma, ibibuzi binakizi ragirira mu njira zaatwo.
Ndaanaye mundu úwâye bikakaze.
3 Ee! Iyo munda i Damasiki, ubutwali bukolaga bugaamala.
Utwaya twaꞌBahifurahimu, kundu twâli zitiirwi,
halikago, natwo tugashereezibwa ngana.
Kiri na mu Baharaamu, ngiisi ábagasigala, bagaaba tufwa-busha, ngaꞌBahisiraheeri.
Kwokwo, kwo Nahano woꞌbushobozi bwoshi adesiri.
4 Ku yikyo kyanya, ubugale bwaꞌBahisiraheeri bugaaba bukoli maziri.
Na kundu bashuba mu genda bajeziri,
halikago, leero bakola mu genda, jabati-jabati!
5 Yabo Bahisiraheeri bagajandwa ngana,
nga kweꞌndalo mu ndekeera yeꞌRefahimu, iri mu jandwa inyuma liꞌyimbula.
6 Ábagasigala bagaaba bagerwa nga muhumbuuka gweꞌbitumbwe byeꞌmizehituuni.
Kwiꞌtavi lyeꞌlugulu, kugasigala ibitumbwe bibiri, kandi iri bishatu.
Na ku matavi ágajojesiri,
kugasigala naaho ibitumbwe bina, kandi iri bitaanu.
Kwokwo, kwo Nahano Rurema waꞌBahisiraheeri adesiri.
7 Ku yulwo lusiku, Abahisiraheeri bagashubi lola ku Mulemi wabo. Ee! Amasu gaabo gagakizi lola, kuꞌlya Mutaluule wabo. 8 Batagaki shubi lola ku tutanda two bakayigirira bongwa ku maboko gaabo. Batâye ki langaalire inguliro zoꞌmuzimu Hasheera, kandi iri akatanda ko bakaguyubakira.
9 Ku lwolwo lusiku, kundu utwaya twaꞌBahisiraheeri twâli tuzitire, si tugasigala mushaka. Tugaaba biguuka, nga kwaꞌBahivi naꞌBahamoori bakasiga utwaya twabo yaho keera, ikyanya Abahisiraheeri bâli bayimwiri.
10 E Bahisiraheeri, keera mukahinduliraga Rurema ingoto,
anali ye gweti úgamùkiza.
Mutaki kengiiri kwo Rurema yiꞌbuye lyo mwâli bishamiri mwo.
Si muli mu gendi leeta imbuto nyiija mu binyamahanga,
munayiji zibyala.
11 Yizo mbuto, muli mu zibyala lusiku luguma, zinayami mera. Na úbugaakya, zinaleete akaaso.
Halikago, ikyanya muli mu gira mbu muyimbule, ehee! Zinayami nyerera.
Mukuba, yizo mbuto zooshi, ubulwazi buli mu yami ziyita.
12 Yuvwagwi! Nayuvwa umulundumo gweꞌbinyamahanga bingi!
Bagweti bagalunduma nga nyaaja,
ku kyanya iri mu ba neꞌmidunda mikayu.
13 Yibyo binyamahanga, kundu bigweti bigalunduma kwokwo,
haliko, Rurema agaki bikanukira, halinde binatibitire hala.
Ee! Bagayimulwa duba, nga biguhulu íbiri mu yehuulwa neꞌmbuusi ku mugazi,
kandi iri nga lukungu úluli mu tumuulwa noꞌmubangami.
14 Kabigingwe, Abahisiraheeri bagakizi yoboha bweneene.
Haliko, ikyanya butazi tejuukana, banagwane abagoma bakoli fwiri.
Kundu abagoma bagayiji tuteera,
ndaabyo bagaagira!