6
Amabone goꞌmunaana: Amagaare giꞌzibo
1 Nanashubi langiiza, nanabonaga amagaare giꞌzibo, gagweti gagatunduuka ha kati keꞌmigazi ibiri yeꞌmiringa. 2 Igaare lya mbere, lyâli kizi kululwa neꞌfwarasi ndukula. Neꞌlya kabiri, lyâli kizi kululwa neꞌfwarasi nyiiru. 3 Neꞌlya kashatu, lyâli kizi kululwa neꞌfwarasi zeꞌkitare. Neꞌlya kana, lyâli kizi kululwa neꞌfwarasi ndobeke mweꞌkivuuzo. 4 Ulya muganda úwâli nganuziizi, nanamúbuuza ti: «E nahamwitu, yaga magaare, gagweti migeeza miki?»
5 Uyo muganda, ti: «Yago, iri imitima ina. Iri mu ba iyimaaziri imbere lya Nahano woꞌbushobozi bwoshi. Na buno, igweti igagendi kola.» 6 Yiryo igaare íriri mu kululwa neꞌfwarasi nyiiru, liloziri imbembe. Neꞌlyabo íriri mu kululwa neꞌfwarasi yeꞌkitare, liloziri imuga. Neꞌlyabo íriri mu kululwa neꞌfwarasi ndobeke, liloziri ikisaka.
7 Yizo fwarasi kwo zâli mbagarusi, zanatunduukaga, zanasara kwo zigende zigatanduula ikihugo. Umuganda, ti: «Bwija! Mugendi kitanduula.» Kwokwo, zanayami genda.
8 Haaho, ulya muganda anambamagala, anambwira kwokuno: «Langiiza! Zirya fwarasi ízikagenda imbembe, keera zikaluhuusa umutima gwani iriira munda.»
Umugingi mukulu Yoshwa ayambikwa ulushembe
9 Igambo lya Nahano lyanashubi nyijira kwokuno: 10 «Abandu ábali mu mbohe i Babeeri bakulungikira ulutengu, ku njira ya Heridayi, na Tobiya, na Yedaya. Aaho! Uyami gendi luyabiira ngiisi ho bahikira, ha mwa Yosiya, mugala Sefaniya. 11 Yizo harija neꞌnooro, uziyabiire, unalingaanie mwoꞌlushembe, unaluyambike umugingi mukulu Yoshwa, mugala Yozadaki. 12 Unamúbwire kwo Nahano woꞌbushobozi bwoshi, adetaga kwokuno:
“Hano, halyagagi umundu, úli mu buuzibwa Ishibwe.
Uyo mundu, halya ho atuuziri, agahagangaala, anayiji yubakulula inyumba yani.
13 Iyo nyumba yani, ye gagiyubakulula,
Agayambala ibyambalwa byeꞌkyami,
anabuli gingikwa ku kitumbi kyabwo, gira atwale abandu.
Ha butambi lyage, hagabwatala noꞌmugingi ku kyeꞌmwage.
Yabo bombi, bagakizi yuvwanwa ngana-ngana.
14 «“Lulya lushembe, lugalangwa mu nyumba yani, mu kukizi kengeera ulushaagwa lwa Heridayi, noꞌlwa Tobiya, noꞌlwa Yedaya, noꞌlwa Yosiya, mugala Sefaniya.”»
15 Abandu bagakizi lyoka i mahanga, gira nabo bayiji tabaala ukuyubakulula irya nyumba ya Nahano. Haaho, lyo niinyu mugaamenya kwo Nahano woꞌbushobozi bwoshi ye kandungika imwinyu. Iri mwangasimbaha Rurema Nahamwinyu, yaga gooshi gagaki yiji koleka.