137
Ikimombo mu kihugo kyeꞌmahanga
1 Ikyanya twâli bwatiiri ku ngombe zeꞌnyiiji zeꞌBabeeri,
twanakengeera akaaya keꞌSayuni, twanatondeera ukulira.
2 Ee! Ku kirya kyanya,
tukatee manika inzeeze ziitu ku biti byazo.
3 Balya ábakatutwala i mahanga,
banakizi looza kwo tubayimbire inyimbo zeꞌYerusaleemu.
Ee! Yabo ábâli kizi tushundeeza, bâli loziizi kwo tubashambaaze, banakizi tuhidika, ti:
«Mu zirya nyimbo zeꞌSayuni, mutee tuyimbiraga luguma.»
4 Aahago! Twe tuhungiiri mu kihugo kyeꞌmahanga,
kutagi kwo twangaki yimba mweꞌnyimbo za Nahano?
5 E kaaya keꞌYerusaleemu, iri nangakuyibagira,
ukuboko kwani kweꞌlulyo kunahangalale.
6 Iri nangaleka ukukizi kukengeera,
na mbe ndaki bwini kwo we tumiri tushambiiri,
ululimi lwani lunagobwe.
7 E Nahano, i Yerusaleemu, ulusiku abagoma bakagigwata imbohe,
ukengeere ngiisi kwaꞌBahedoomu bâli kizi honyoleza, ti:
«Yako kaaya, mukahongole.
Ee! Mukunyule kiri neꞌndaliro zaako.»
8 E maashi, bandu beꞌBabeeri, si mwenyene mukolaga mugaminikwa!
Galya mabi go mwâli kizi tukolera,
bahiriirwi, ngiisi ábagamùgalulira go.
9 Bahiriirwi, ngiisi ábagayiji gwata abaana biinyu,
banakizi bashangula ku maala.