86
Undege amatwiri, unanjuvye
1 Amahuuno ga Dahudi.
E Nahano, ngolaga mukeni nakahuku.
Aaho! Undegage amatwiri, we kongwa, unanjuvye.
2 Ndi mukozi wawe, maashi! We ndi mu yihega kwo, na ngubiisiri kwoꞌmulangaaliro.
Kwokwo, ukizi njuutira, unangize.
3 E Nahano, ndi mu shiiba ngweti ngakutakira.
Kwokwo, ukizi nyuvwirwa indengeerwa.
4 Ndi mukozi wawe, we na ngweti ngayihega kwo.
Aaho! Ukizi njambaaza.
5 E Nahano, uli mwija, unali mu kogana.
Ngiisi ábagweti bagakutabaaza, ubakuuziri bweneene.
6 Ikyanya ndi mu kutabaaza, iri na ngulirira,
ukizi nyuvwiriza.
7 Mu siku zaꞌmalibu, ikyanya ndi mu kuberangira,
uli mu nyitaba.
8 E Nahano, mu biri mu yikumbwa byoshi, si ndaaye úkushushiri!
Na mu byoshi byo uli mu kizi gira, ndaaye úwangabihasha.
9 Si we kabumba abandu baꞌmahanga gooshi!
Booshi bagakizi yiji kuyikumba,
banakizi menyeesania ubulangashane bwiꞌziina lyawe.
10 Si wehe naaho, we Rurema!
We sumbiri booshi, we nali mu gira ibisoomeza.
11 E Nahano, unyigirize ngiisi byo ngwaniini ukugira,
halinde ngizi kulikira ukuli kwawe.
Umbiike mwoꞌmutima mwija,
halinde ngizi kusimbaha lwoshi-lwoshi.
12 Ngakizi kuhuuza ku mutima gwani gwoshi,
na ngizi yivuga iziina lyawe imyaka neꞌmyakuula.
13 Mukuba unguuziri bweneene.
Keera wanangiza mu maboko ga Nakuzimu.
14 E Rurema, buno abanabwikangaate bagweti bagandeera.
Banakoli loziizi ukunyita.
Balya bagoma, batakutwaziizi, batanahiiti kimino.
15 Kundu kwokwo, e Nahano, uli mu kizi kejererana, unali woꞌlukogo.
Utali mu yami yagalwa duba,
si uyamiri uli mu kundana, unali woꞌkuli.
16 Kwokwo, ungebagane, unangejeerere.
Bwo ndi mukozi wawe, umbiikage mweꞌmisi.
Ungize, nie mwana woꞌmuja wawe.
17 E Nahano, keera ukandabaala, wanakizi mboleeza.
Aahago! Ushubi yerekana kwo unguuziri.
Kwokwo, lyo balya bagoma bagaabona,
banagwatwe neꞌshoni.