80
E Rurema, ukizi tubiika mwoꞌbugumaana!
1 Izaburi ya Hasafu, imwoꞌmwimangizi waꞌbimbi. Luli mu yimbwa neꞌnanga.
2 E Mungere waꞌBahisiraheeri, ututegage amatwiri.
We mu rongoora beene Yusefu nga bibuzi,
we na tuuziri ha kati ka bamakerubi.
Aaho! Uyerekane ubulangashane bwawe
3 mu beene Hifurahimu, na mu beene Binyamiini, na mu beene Manaasi.
Ee! Uyerekane ubushobozi bwawe, unayiji tukiza.
4 E Rurema, utuyerekage ubwija bwawe.
Unatugalulire imwawe, halinde lyo tukizibwa.
5 E Nahano, Rurema woꞌbushobozi bwoshi!
Si twe bandu baawe!
Si tugweti tugakutabaaza!
Aaho! Ugaki yagalwa halinde mangoki?
6 Ibyokulya byo ukatuheereza, si gukola mwizingeerwe naaho.
Naꞌmagoloovi goꞌkunywa, ikolaga migenge mingi-mingi.
7 We tumiri abagoma biitu bagakizi tugayiriza.
Ábatusokaniini, bagweti bagatuyamiriza.
8 E Rurema woꞌbushobozi bwoshi, utugalulire imwawe.
Utuyerekage ubwija bwawe, halinde lyo tukizibwa.
9 Ikyanya ukatulyosa i Miisiri, twâli riiri nga mulandira gwawe gweꞌmizabibu.
Neꞌkyanya ukatuhisa mu kihugo kyawe, wanayimula mwaꞌbandu beꞌgindi milala,
wanatubyala mwo.
10 Wanatuyufirira, halinde twanakula.
Imizi yitu yanashashaata, halinde mu kihugo kyoshi.
11 Ikimbehwa kiitu kyanabwika imigazi.
Amatavi giitu ganabwika kiri neꞌbiti byeꞌmyerezi.
12 Twanatavika, halinde twanahikaga ku nyaaja mbamu Mediterane.
Ibitombo biitu byanahika ku ngombe yoꞌlwiji Hefuraati.
13 Aahago! Kituma kiki ukahongola inzitiro ziitu ízâli tusokaniini?
Buno, ngiisi mulenga-njira agweti agayiji zimba ibitumbwe biitu.
14 Kiri neꞌngulube zeꞌrubako, zigweti zigatulibata-libata.
Ee! Inyamiishwa zikoli gweti zigaatulya.
15 E Rurema woꞌbushobozi bwoshi, ushubi tugalukira maashi!
Bwo we tuuziri mwiꞌgulu, ulangiize ngiisi kwo tukola mu makuba.
Gulya muzabibu, ukizi gutanduula, maashi!
16 Gulya mulandira gwo ukabyala naꞌmaboko gaawe wenyene, ukizi gulanga, we kongwa!
Si ali mwana ye ukayitoolera mwenyene!
17 Kundu twe tuli mulandira gwawe,
si abandu keera bakatutema-tema, banatuyokya.
Kwokwo, ugire ubakanukire, halinde baminikwe.
18 Ulya mundu ye ukuuziri, umúkanie, maashi!
Si ali mwana ye ukayitoolera wenyene!
19 Iri wangagira kwokwo, tutâye ki kujande.
Ukizi tubiika mwoꞌbugumaana,
halinde nyiitu tukizi kuyivuga.
20 E Nahano Rurema woꞌbushobozi bwoshi! Utugalulire imwawe.
Utuyerekage ubwija bwawe,
halinde lyo tukizibwa.