35
Ngiisi ábali mu shambaalira amakuba gaani, bagalonga ishoni
1 Izaburi ya Dahudi.
E Nahano, ikyanya abandu bali mu mbangirira, naawe, ubahangirire.
Ikyanya bagweti bagandwisa, naawe, ubalwise.
2 Uyimukage, maashi! Uyabiire isiribo zaawe, neꞌbihazo byawe,
gira uyiji ndabaala.
3 Ikyanya abandu bali mu yija bagambiiva,
ubahangirire, mu kukoleesa itumu neꞌngooti.
Umbwirage kwokuno: «Ngakukiza.»
4 Ikyanya bali mu looza ukunyita,
ubateezagye ishoni, unabatetereze.
Ikyanya bagweti bagashungika igambi libi hiꞌgulu lyani,
ubagalule kifudeete, halinde banashenguke.
5 Umuganda wa Nahano, abe ye gabayimula,
banabe nga bifuma íbiri mu yehuulwa neꞌmbuusi.
6 Ikyanya bagalengaga mu njira, bakizi ba nga bali mu tyerera mu kihulu.
Umuganda wa Nahano, abe ye gakizi bayimula.
7 Yabo bagoma, kundu ndaakwo nabagira,
haliko bandega umubashu ku bumbishwa,
banambumbira ubuhya.
8 Kwokwo, bayami shereezibwa.
Yugwo mubashu gwo bakabisha, gubahukane boonyene.
Ubuhya bwo bakambumbira, boonyene babutibukire mwo, banashereere.
9 Ikyanya Nahano agangiza,
umutima gwani gugamúshambaalira bweneene.
10 Ngayiberekaania kwiꞌzu kwokuno: «E Nahano, nyandi uli nga we?
Si we mu kiza umukeni mu banamisi.
Uyo mukeni, kundu angaba atashobwiri,
haliko, uli mu múlyosa mu banyazi.»
11 Utumasi tweꞌbibeesha, tugweti tuganyijira,
banandegere ku magambo go ndayiji.
12 Ku kyanya ndi mu bagirira amiija,
boohe, bali mu gambemba kwaꞌmabi.
Kwokwo, umutima gwani gukola mwaꞌkahumbwe.
13 Si ku luhande lwani, ikyanya bâli lwaziri,
nâli kizi yambala ubusuuzu, iri ninayishalisa,
mu kuyerekana kwo najengeerwa.
Kundu kwokwo, amahuuno gaani gatanalonga ishuvyo.
14 Nâli riiri nga nꞌgagenda ku mushiibo gwa mwira wani,
kandi iri gwa mwene witu.
Nꞌgayinika itwe lyani
nga ngweti ngalirira maawe.
15 Haliko ikyanya nꞌgalonga amakuba,
banangumanira mu kumbonyoleza, iri bananyamiriza, yuu!
Ehee! Kundu ndâli bayiji, si bakayami yiji ndeera,
banakizi ngamba ulundatwika.
16 Balya bagoma bagweti baganjekeereza, iri banandangamira,
noꞌkukizi ngaajira imihondo.
17 E Nahano, ugandoleeraga, halinde mangoki?
Bwo bagweti bagandeera, ungizagye, maashi!
Bwo bakola nga ndare, ungize mu kati kaabo.
18 Ngakizi kutangira kongwa imbere lyaꞌbandu baawe.
Na ngizi kuyivuga imbere lya booshi.
19 Yaba bagoma bagweti baganjombera ubusha.* 35.19 Zaburi 69.4; Yohana 15.25.
E maashi! Utabalekeerere kwo bakizi njekeereza.
Na kundu ndaabyo nabagira, si baki njombiri.
Utabalekeerere kwo bakizi ndima ibisuure.
20 Amagambo gaabo, gatalyagagi ga kuyerekana ingoome.
Na kundu abandu batuuziri ku butuudu mu kihugo,
halikago, baki gweti bagabalegeereza ku bibeesha.
21 Bagweti bagakizi ndoleera, iri banandega kwokuno:
Ehee! Yago mahube gaage, tukagayibonera twenyene.
22 E Nahano, yibyo byo bagiraga, si ukoli bibwini.
Aaho! Utakizi beera munyerere, utananyisunge.
23 E Rurema Nahamwitu, uvyukage maashi!
Uyimukage, gira unjuutire. Unakizi ndwira.
24 E Rurema Nahamwitu, ukizi mbulanira mu kuli kwawe.
Utaleke yabo bagoma, kwo bakizi mbonyoleza.
25 Utanabaleke kwo bakizi yihaya kwokuno:
«E balya, leero twamúmira lwoshi, nga kwo twâli loziizi.»
26 Ngiisi ábali mu shambaalira amakuba gaani,
ubabonie ishoni, halinde bateteerwe.
Na ábagweti baganyikangaatira, nabo balonge ishoni, kibe nga kyambalwa,
halinde banatibaalirwe.
27 Abiira baani ábayiji kwo ndahiiti ubuhube,
bakizi shambaala, iri banakizi banda utubuuli.
Bakizi deta: «Nahano ayivugwe,
bwo asiimiri ukukizi heereza umukozi wage amiija.»
28 Bwo uli mu gira íbikwaniini, ngakizi bideta,
na nyame ngweti ngakuyivuga isiku zooshi.