20
1 Amaavu gali mu leeta ibityozo. Neꞌndalwe iri mu leeta imilongwe.
Mwene yibyo, ngiisi úli mu biyifunda mwo, atali mwitegeereza.
2 Ikyanya mwami araakara, ali mu ba nga ndare ígweti ígalunduma.
Ngiisi úli mu múraakaza, ali mu teera itwe lyage.
3 Ngiisi úli mu yiyeka imilongwe, ali mu longa ulushaagwa.
Si umuhwija, yehe, ali mu hambanwa-hambanwa.
4 Ikyanya kyoꞌkulima, umwolo atali mu hinga.
Ikyanya kyoꞌmwimbu, ali mu gendi gulooza, atanagubone.
5 Ngiisi byoꞌmundu ashungisiri mu mutima gwage, biri ngiꞌbenga lyaꞌmiiji.
Kundu kwokwo, umwitegeereza ali mu ba noꞌbulyo bwoꞌkubilyosa mwo.
6 Abandu bingi bali mu yihaya kwo bali noꞌrukundo úlutâye male.
Kundu kwokwo, bitavwarusiri ukulonga umundu mwemeera.
7 Abandu ábakwaniini bali mu kizi gira íbitungiini.
Kiri neꞌkyanya bakoli fwiri, abaana baabo bali mu yama bagashaniirwi.
8 Ikyanya umwami ali mu bwatala ku kitumbi kyage kyoꞌkutwira kweꞌmaaja,
ali mu kizi bona amabi gooshi ku bweranyange.
9 Ndaaye úwangadeta: «Umutima gwani, keera naguyeruusa.
Ngoli yerusiibwi lwoshi, ndaabyo byaha byo mbiiti!»
10 Ibigero byoꞌkugungana, neꞌndambo zoꞌkushobeka,
yibyo byombi, biri mu yagaza Nahano.
11 Abaana bali mu menyeekana ku byo bali mu gira.
Abandu bayiji-yiji, iri imikolezi yabo iri miija, inagolosiri.
12 Amatwiri gali mu yuvwa, naꞌmasu gali mu bona.
Yibyo, kwo biri byombi, Nahano ye kabibumba.
13 Iri wangakizi malira ikyanya kyawe mwiꞌro, ubuzinda ugaaba mukeni.
Kwokwo, ukizi ba masu, lyo ukizi longa íbigakuyigusa.
14 Umuguzi ali mu deta: «Kitakwaniini! Kitakwaniini!»
Kundu kwokwo, mango ahika ha mbere, anatondeere ukuyihaya, ti: «Ewe! Nakigula bwija!»
15 Hali inooro, hali naꞌmabuye mingi ágakeyengiini.
Si umundu úli mu deta ku bwitegeereze, yehe, ye riiri neꞌkishingo bweneene!
16 Umundu, iri angayemeera kwo agaaba shinga weꞌkinyamahanga,
uyo shinga atangage ikooti lyage, ibe ngwati.
17 Ikyanya umundu ali mu zimba ibyokulya, biri mu tee nuna.
Si ubuzinda, biri mu hinduka lushegebwe mu kanwa.
18 Ikyanya uli mu shungika, utee gwanwa wahanuusania.
Kiri neꞌkyanya ugaagira izibo, utee looza abahanuuzi.
19 Kishiiriri atabisha mwazi.
Ku yukwo, ukizi múyiyeka.
20 Ngiisi úgadaaka yishe, kandi iri nyina, agayitwa.
Agaaba ngiꞌtara írizimiri, anabe mu kihulu kya namudidi.
21 Ikyanya umundu atangi twa ibindu ku kashuushi,
ubuzinda, bitagaki múgenduukira.
22 Utakizi deta: «Amabi go bakangirira, ngagayihoola!»
Si ukizi lindirira Nahano, abe ye gakutabaala.
23 Ibigero byoꞌkugungana,
biri mu yagaza Nahano.
24 Ishando zoꞌmundu, Nahano ye mu zirongoora.
Aaho! Kuti kwoꞌmundu angaki menya íbimúli imbere?
25 Buli buhanya, ikyanya umundu ali mu yami deta: «Ngatanga kindu kirebe imwa Rurema»,
na ha nyuma anashubi yishuhiza.
26 Umwami mwitegeereza ali mu kizi londoola abandu babi.
Yabo babi, ali mu kizi bahana, buzira kubayuvwirwa indengeerwa.
27 Imitono yoꞌmundu, liri itara lyo Nahano amúhiiri.
Liri mu moleka ku bimúyifundereziizi mwo.
28 Ikyanya mwami ali mwija, anali mwemeera, ali mu langwa bwija.
Ee! Ku njira yoꞌrukundo, ikitumbi kyage kiri mu sikama.
29 Imisore iri mu longa ubulangashane ku njira yeꞌmisi yayo.
Si abashaaja boohe, abandu bali mu bagingika hiꞌgulu lyeꞌnvwi zaabo.
30 Ukukubulana ingoni, guli muti gwoꞌkulyosa amabi.
Yizo ngoni, zo ziri mu yeruusa umutima.