30
1 «Halikago buno, imisore ikoli gweti igakizi njekeereza.
Iyo misore, ndâli hangwiri bayishe,
kwo bangabwatala kiri ha butambi lyoꞌtubwa twani twoꞌkurongoora ibibuzi.
2 Iyo misore, bunguke buki nâli ngagilongera kwo?
Si imisi yayo ikola-kola ndaayo, inakola tufwa-busha!
3 «Iyo misore yâli koli shalisiri, yanâli koli jambiri bweneene.
Yanâli kizi genda igajeba-jeba mwiꞌshamba kabigingwe,
kundu liyumagusiri, linali mu luhania.
4 Iyo misore yâli mu sobeera ibyasi mwiꞌshamba,
binabe byo igakizi lya.
Yâli kizi humba kiri neꞌmizi yeꞌbiti,
mbu ikizi lya.
5 «Keera ikayimulwa mu bandi bandu.
Neꞌkyanya abandu bali mu gibona,
banakizi gifuka akahoogo, mbu iri mizimba.
6 Kwokwo buno, ikoli tuuziri mu misima na mu shalalo,
ikola mu jeba-jeba mu nyaala, ha kati kaꞌmabuye.
7 Ikola mu lunduma, nga nyamiishwa mu bishokoololo,
iri inakuumana mwiꞌdako lyeꞌbishungu-shungu.
8 Si iri mihwija, ndaalyo iziina ihiiti!
Keera ikayimulwa mu yabo.
9 «Buno, iyo misore igweti iganjekeereza mu nyimbo za kwingi-kwingi,
iri inambonyoleza ngana-ngana.
10 Ikola mu ngeneka, kyo kitumiri iri mu nyisunga hala.
Emwe! Ikyanya iri mu mbona, inayami ndwira amate ha malanga.
11 Rurema keera anjaagiza imisi, anakola mu nyogogoza.
Kyo kitumiri iyo misore igweti igandeera buzira kuyihangirira.
12 «Balya banakuhambwa, bali mu yimanga, gira bandeere.
Bali mu ndega imibashu, gira bangwase.
13 Yabo bagoma, bali mu mbangirira, mbu ndalenge,
gira balonge ukunjeereza.
Ndaanaye mundu woꞌkundabaala.
14 Bali mu ndeera nga bandu ábali mu tula inyumba.
Ikyanya ndi mu ba ndambamiri, banayiji nzimbira kwo.
15 «Kwokwo, keera nazingwa neꞌkyoba kingi.
Na kundu njuba mu simbahwa,
si ulushaagwa lwani keera baluyehuula nga mbuusi.
Kiri noꞌbugale bwani, keera babutwala hala, nga kibungu.
16 Amalibu gaani, keera galenga ulugero.
Na buno, ngola bu fwa.
17 «Mu bushigi, amavuha gaani gali mu lyana.
Yubwo bulyanirwe, buli mu tetemba, butanali mu yoyerera.
18 Rurema keera angwatira ku kyambalwa kyani.
Na ku misi yage mingi, ali mu nvyetereza mwiꞌgosi ngiꞌkanju lyani.
19 Keera anandasha mu bidaka.
Buno, ngoli sigiiri nga munyota-kiiko naaho, kandi iri nga lukungu.
20 «E Rurema, kundu ngweti ngakutakira, si utali mu njuvya.
Na kundu nyimaaziri imbere lyawe,
si ugweti ugambenekera naaho.
21 Keera wanyihindulira, utanakiri mu ngejeerera.
Si ugweti ugakoleesa ubushobozi bwawe, mu kukizi ndibuza!
22 «Keera wanyabiira, wananvugumula mu kihuhuuta.
Ugweti ugangabula-ngabula mu nvula ngayu.
23 Nyiji bwija kwo ugweti ugammanulira i kuzimu, mu bafwiri.
Yeyo munda, yaꞌbandu booshi bagayiji humaanana.
24 Umundu, iri angaba akoli goozirwi, anatabaaze,
koꞌwabo atangamútabaala?
25 «Na naani, ikyanya abiitu bâli hiiti amakuba, nâli kizi bataaniza.
Ikyanya bâli keniri, nâli kizi jengeerwa hiꞌgulu lyabo.
26 Aahago! Ikyanya naani nâli langaliiri kwo ngagirirwa amiija,
si bakangalulira ubuligo naaho!
Kundu nâli lindiriiri umulengeerwe,
ikihulu kyanaba kyo kigangwata.
27 «Kwokwo, umutima gwani gukoli libuusiri,
gutanaki yisiri mu nda.
Ngoli shungikiirwi ukulibuuka naaho.
28 Ndi mu mamaata mu kihulu, buzira kumolekerwa niꞌzuuba.
Nyimaaziri mu kaguliro, ngweti ngayamiza mu kutabaaza.
29 Kundu kwokwo, bagweti bagambwira kwo ngoli komberiinwi na banyambwe,
na kwo ngomeriini naꞌkanyuni hotiriishe.
30 «Amagala gaani, gakoli yulubiiri.
Ikikoba kyaꞌmagala gaani kikoli kulubusiri.
Amagala gaani, gakola niꞌshuushira bweneene.
31 Ululanga lwani, ngweti ngalulasa naaho kweꞌnyimbo zoꞌkuyiganyira.
Neꞌfirimbi yani, ndi mu gilasa kweꞌnyimbo zoꞌkugongeera.»