18
Nahano atuma Yeremiya imwoꞌmubuuvi
1 Nahano anashubi bwira Yeremiya kwokuno: 2 «Ewe! Umanukirage ngiisi ho bali mu bumba inyungu. Mango wahahika, lyo ngakuganuuza.»
3 Kwokwo, nanamanukira ho. Nanagwana umubuuvi agweti agabumbira ikirugu mu kibumbiro kyage kyoꞌkuzungulusa. 4 Yikyo kirugu, âli kizi kikuma naꞌmaboko, imbumbo yakyo yanabiiha. Lirya ibumba, anashubi likaata buhyahya, gira abumbe mweꞌkindi nga kwo aloziizi.
5 Haaho, Nahano anashubi mbwiraga kwokuno: 6 «E Bahisiraheeri, uyu mubuuvi, yuku akahindula ibumba, ka naani ndashobwiri ukumùhindula kwokwo? Si muli mu maboko gaani, nga ngiisi kwiꞌbumba liri mu maboko goꞌmubuuvi! Kwokwo nie Nahano ndesiri.
7 «Hali ikyanya nangadeta hiꞌgulu lyaꞌbandu balebe, kandi iri bwami bulebe, kwo bashikulwe, banahongolwe, halinde banazimiire. 8 Kundu kwokwo, iri bangatwikira ku mabi gaabo, lyoki ndangaki baminika nga kwo nâli mali gwanwa nashungika.
9 «Hali neꞌkyanya nangadeta kwo ngabyala bandu balebe, na mbayubake. 10 Halikago ha nyuma, banalekage ukunzimbaha, banatondeere ukugira amabi. Kwokwo, kundu nꞌgabalagaania ikindu kiija, ndangaki bagirira kyo.
11 «Aahago! Yabo batuulaga beꞌYerusaleemu, kiri naꞌbandi Bayuda, ubabwire kwo Nahano adetaga kwokuno: “Keera namùteganulira ubuhanya. Ee! Ngoli mùshungikiiri ubuhanya. Ku yukwo, mutwikirage ku mabi giinyu! Muhinduke ku ngesho ziinyu mbi, munatondeere ukukizi gira amiija.”
12 «Kundu kwokwo, yabo Bayuda baganaaka, ti: “Aahabi! Yibyo wadeta, ndaabyo! Si tulyagagi mindagabika! Tuganagenderera naaho ukukizi gira nga ngiisi kwo tuloziizi.”»
Abandu balahira Rurema
13 Nahano atubwiraga kwo tugendi buuza ibinyamahanga kwokuno:
«Ibala lyaꞌBahisiraheeri bakagira, ka keera mukaliyuvwa?
Si keera bakagira ibitalaalwe ngana-ngana!
14 Ulugungu lwa ku migazi yeꞌLebanooni, ka lwâye nyote, lunabe lwamala? Aahabi!
Kiri naꞌmiiji ágali mu hinga mwiꞌyo migazi, gatangakama.
15 Halikago abandu baani, boohe, keera bakanyibagira.
Bagweti bagayokera imizimu umubadu.
Injira nyiija yo bâli tuuziri mwo, keera bakagijanda,
banakola mu vujuuka mu mishodoko.
16 Ikihugo kyeꞌBuyuda, keera bakihindula mushaka.
Na ngiisi úli mu kilenga mwo, ali mu zuuza itwe, mu kusoomerwa.
Mango kyashereezibwa, bagasoomerwa ngana-ngana!
17 Ikyanya abagoma bagayiji bateera,
ngaaleka babashaabule, nga kwoꞌlukungu luli mu twalwa neꞌmbuusi.
Ikyanya bagateerwa, ndagaki tami balola kwo, si ngabahindulira ingoto.»
Abandu bagirira Yeremiya igambi lyoꞌkumúyita
18 Iri hakatama, abandu baguma banahanuusania, ti: «Tugirage igambi libi hiꞌgulu lya Yeremiya. Si tuhiiti abagingi, kiri naꞌbitegeereza boꞌkukizi tuhanuula, naꞌbaleevi boꞌkutumenyeesa ngiisi byo Rurema adesiri! Aahago! Galya magambo gaage, tutagatwaziizi. Muyije, tugendi múbangira ibinyoma.»
19 Kwokwo, nanahuuna: «E Nahano, unyuvwirize.
Uyuvwe ngiisi kwaꞌbagoma baani bakola mu nyigambira.
20 Aahago! Umundu, iri angagira amiija, ka akwaniini ukuhembwa amabi?
Si boohe, bagweti bagambumbira ubuhya, gira babunyitire mwo!
E maashi! Ukengeerage ngiisi kwo nâli kizi yimanga imbere lyawe,
mu kubahuunira, gira mbakize noꞌburaakari bwawe.
21 «Ku yukwo, ulekage abaana baabo bafwe niꞌshali.
Nabo boonyene, uleke abagoma baabo babayite neꞌngooti.
Bakaabo bafwirwe naꞌbaana, kiri na bayiba!
Abashaaja bafwe neꞌkiija, neꞌmisore iyitwe ku ngooti mwiꞌzibo.
22 Ikyanya abanyazi bagayiji bateera, bateerere induulu mu nyumba zaabo.
Si bakambumbira ubuhya, mbu lyo bangwasa, banandega neꞌmibashu!
23 «E Nahano! Uyiji kwo keera bakagira igambi, kwo banyite.
Ku yukwo, utabakoge ibyaha byabo.
Si ubanyanyage haashi, iri unabahaniiriza ku buraakari bwawe.»