5
Abandu beꞌYerusaleemu bahuna
1 Nahano adetaga kwokuno:
«Mugende mu njira za mu kaaya keꞌYerusaleemu,
munaloozagye mwoꞌmundu muguma naaho úli mu gira amiija,
anabe afitiirwi ku bikwaniini.
Mulenge hooshi, mu ngiisi mufulege, kiri na mu tuguliro.
Neꞌri mwangamúbona, lyoki kano kaaya, ngakakejeerera.»
2 Yabo bandu bali mu biika ndahiro, ti:
«Nga kwo Nahano ayamiri ho.»
Kundu kwokwo, iyo ndahiro yabo, iri mu ba ya bibeesha.
3 E Nahano, ka utayamiri uli mu looza íbiri byoꞌkuli?
Kundu ukahimbula abandu beꞌBuyuda, si batababiiri.
Na kundu ugweti ugabafuta-futa, mu kubayerekeza,
si batakusimbahiri.
Bakola mindagabika, banakoli yumuusiri ngiꞌbuye.
Keera bakashiikiza lwoshi, kwo batangaki kugalukira.
4 Haaho, nâli toniri kwo íbitumiri balya bandu ba Rurema bagaagira íbitali nga byo,
mbu bwo bali bagunda naaho, banali bizeeze,
batanazi menya íbikwaniini imbere lya Rurema Nahamwabo.
Batanayiji ngiisi byo abaloziizi kwo.
5 Kwokwo, nꞌgatona kwo ngendi ganuuza abakulu baabo.
Mukuba nꞌgatona mbu boohe, ku kasiisa bo bayiji Rurema Nahamwabo.
Banayiji ngiisi byo asiimiri, na ngiisi íbikwaniini.
Yehee! Kiziga yabo booshi nabo, balyagagi babi!
Kundu bâli gweti ingoome na Nahano, halikago keera bakagihongola.
Na kundu bâli nywaniini bo naye, si keera bakamúyitwisa kwo.
6 Kyo kitumiri indare mu kishuka zigakizi yiji bateera.
Kiri neꞌmirunga ikolaga igakizi yiji basimbukira kwo.
Ingwi zikoli bateziri ha nyuma lyaꞌkaaya.
Ikyanya umundu ali mu gira mbu ahuluke, zinayami mújanganula.
Na íbitumiri biryagagi kwokwo, bwaꞌBayuda bâli kizi yifunda mu byaha,
banakizi huna imbere lya Nahano.
7 Nahano adetaga kwokuno: «E batuulaga beꞌYerusaleemu,
kituma kikagi nangaki mùkejeerera?
Si kiri naꞌbaana biinyu keera bakanjanda!
Banakola mu kizi biika indahiro kwiꞌziina lyeꞌmigisi,
itanakwiriiri ukuyikumbwa.
Kundu nâli kizi mùheereza ngiisi íbyâli kizi mùgoora,
halikago mwanakizi yifunda mu bushule.
Mwanâli kizi shiiba mu nyumba zaꞌbashule.
8 Muli nga fwarasi za mu kishuka, ízifiisiri,
zinalungumiirwi.
Ngiisi muguma winyu ali mu yifwija naaho ukugwejera muka uwabo.
9 Aahago! Abandu mwene yabo, ka ndakwiriiri ukubahana?
Ka ndakwiriiri ukubayihoola?»
Kwokwo, kwo Nahano adesiri.
10-11 Nahano adetaga kwokuno: «E bagoma,
Abahisiraheeri naꞌBayuda booshi, mugendi bashooshola,
nga kwo bali mu shooshola amatavi geꞌmizabibu.
Mubasivye, nga kwo bangasivya imigungira yeꞌmizabibu.
Mukuba, Abahisiraheeri naꞌBayuda batakiri bandu baani nie Nahano!
Kundu kwokwo, mutabasivye lwoshi-lwoshi.»
Rurema akejeerera Abayuda
12 Si abaleevi bagweti bagabeesha, mbu Nahano atâye tuhane,
na mbu ndaayo nguuke tugalonga, ndaanalyo izibo, ndaanagwo mwena.
13 Yabo baleevi, si ngiisi byo bagweti bagaadeta,
biri nga kuteerera imbira mu munyaga naaho!
Igambo lya Rurema litabali mwo.
Yizo nguuke zooshi, lekaga zikizi bakoleka kwo!
14 Nahano Rurema woꞌbushobozi bwoshi, adetaga kwokuno:
«Balya bandu, bali mu deta kwo ndagabahana.
Ngahwe! Amagambo go nakutekerera, gagabababula nga muliro.
Bagaaba nga shaali ízikola mu singooka.»
15 Nahano adetaga kwokuno: «E Bahisiraheeri, munyuvwirize.
Ngola ngaleeta ibinyamahanga, gira biyiji mùteera.
Yabo bandu, ikihugo kyabo kyâli yamiri ho ukulyokera kare.
Neꞌndeto yabo, mutangagimenya.
Ngiisi byo bali mu ganuula, mutagakizi biyuvwa.
16 Yabo booshi bali bikalage byaꞌbasirikaani.
Ikyanya bali mu lasha imyambi, abandu bingi bali mu yami fwa.
17 Balya bagoma, ngiisi byo muli mu yimbula, bo bagakizi birya.
Bagakizi lya ibibuzi biinyu, neꞌngaavu ziinyu.
Bagakizi lya neꞌmizabibu yinyu, neꞌmitiini.
Bagakizi lya kiri na bagala biinyu, na banyere biinyu.
Utwaya twinyu tuzitire, muli mu tuyegamira.
Kundu kwokwo, yabo bagoma bagatushereeza ngana.»
18 Nahano adetaga kwokuno: «Ikyanya ngamùzimiiza, kutagaaba kwa lwoshi-lwoshi. 19 E Yeremiya, abandu bagakizi kubuuza: “Kituma kiki Rurema Nahamwitu agweti agatuyogogoza mwene yuku?” Naawe, unabashuvye: “Si keera mukamújanda! Na kundu mukoli tuuziri mu kihugo kiinyu, halikago mugweti mugayikumba imigisi yeꞌmahanga. Kyo kitumiri yibyo binyamahanga, mukola mugagendi kizi bikolera mu kihugo kyabo.”»
Rurema akambira abandu baage
20 «Gano magambo, mugamenyeese Abayuda, beene Yakobo:
21 Si mulyagagi bahwija, munali bizeeze!
Aaho! Mundegage amatwiri.
Kundu muhiiti amasu, si mutabwini!
Na kundu muhiiti amatwiri, si mutayuvwiti.»
22 Nahano adetaga kwokuno: «Ku kasiisa, mukwaniini mukizi nzimbaha,
munakizi juguma imbere lyani.
Si nie nꞌgabiikira inyaaja umushenyu, lube lubibi lwayo!
Yulwo lubibi, lunayamiri ho imyaka neꞌmyakuula. Neꞌnyaaja itangalutaluka.
Kundu imidunda yangalupukula-pukula, itangalubalala.
Na kundu yangakundula, itangalusooka.
23 Halikago mwehe, imitima yinyu keera mukagiyumya,
mwanahuna imbere lyani.
Mukakuuduka imbere lyani, mwanayigendera handi-handi.
24 Si mutali mu deta, ti: “Rurema Nahamwitu
ye mu tuniekeza invula ku kyanya íkikwaniini,
iba ya mbere kandi iri yaꞌmakamuuka.
Neꞌkyanya kyoꞌkuyimbula, ye gweti úgakizi tuheereza imimbu.
Ku yukwo, bitukwiriiri tukizi múyoboha.”
25 Kundu kwokwo, yago miija gooshi, ibyaha biinyu keera bikagahangirira.
Byo binatumiri ndaabyo mugweti mugalonga.
26 Yoho wee! Si mu bandu baani, muli mwo banangora-mabi!
Yabo babi bagweti bagatega abaabo,
nga kwoꞌmuhiivi ali mu tega utunyuni.
27 Inyumba zaabo ziyijwiri ibibeesha,
nga kitiri íkiyijwiri utunyuni útwagwatwa.
Yabo babi, keera bakagala ngana-ngana, banakola banamisi bweneene.
28 Bakoli jeziri, naꞌmagala gakoli shogahiri.
Ibitalaalwe byabo, bitahiiti ho byangahekera.
Batali mu bulanira ifuuvi ku njira yoꞌkuli.
Naꞌbakeni, bali mu bayima ukuli kwabo.»
29 Nahano adetaga kwokuno:
«Aaho! BwaꞌBayuda bagweti bagaagira amabi,
ka bitangwiriiri kwo mbahane hiꞌgulu lyago?
Abandu mwene yabo, ka bitangwiriiri kwo mbayihoole?
30 «Yabo Bayuda, ikihugo kyabo kiyijwiri ibitalaalwe, binali bya kuyagazania.
31 Abaleevi bagweti bagatanga ubuleevi bweꞌkinyoma.
Kiri naꞌbagingi bakola mu kizi yihahalira boonyene naaho.
Aahabi! Amabi mwene yago, abandu baani bakoli bwini kwo go gakwaniini.
Halikago, ku kyanya kyeꞌmberuuka, kutagi bâye gire?»