10
1 Yayewe imwaꞌbatwi beꞌmaaja! Si bali mu kizi biika imaaja ízitakwaniini,
zinali za kulibuzania naaho.
2 Bali mu kizi yima abakeni íbibakwaniini.
Yabo bandu, kundu bali beꞌmwani, si bakiri mu balyalyania.
Bali mu hanguula abandu kwo bakizi nyaga ibindu bya banamufwiri, neꞌfuuvi.
3 Aahago! Ulusiku Nahano agaahana abandu,
kutagi kwo mwâye ki yibulanire?
Ikyanya ibinyamahanga bigayiji mùteera
kutagi kwo mwâye ki fuuke?
Nyandagi ye mwâye tibitire, mbu amùtabaale?
Ibindu biinyu, hayi ho mwâye gendi bibisha?
4 Si mwâye gendi bunda mu mbohe,
kandi iri muminikwe kuguma na ábali mu yitirwa mwiꞌzibo.
Kundu kwokwo, ubute bwa Nahano bugaaba butazi hooha.
Agaaba aki bangwiri ukuboko kwage, mu kulooza ukuhana abandu baage.
Ikihugo kyeꞌHasuriya kigaahanwa
5 Nahano adetaga kwokuno:
«Yayewe imwinyu, mwe batuulaga beꞌHasuriya!
Zeene, muki fumbiiti ubuhiri mu maboko giinyu.
Kiziga! Yago mahiri galyagagi ga kuyerekana ubute bwani!* 10.5-34 Hisaaya 14.24-27; Nahumu 1.1–3.19; Sefaniya 2.13-15.
6 Balya bandu beꞌHasuriya, nie mu batuma,
kwo bagendi teera abandu baani!
Mukuba, balya bandu baani, keera bambindulira ingoto.
Na bwo bakandakarira bweneene, ngahanguulaga Abahasuriya kwo bagendi bateera,
banabashahule ibindu.
Bagabahinyata-hinyata, nga kwo bali mu hinyata ibidaka mu njira.
7 Yabo Bahasuriya, kiziga batayiji kwo nie gweti ngabakoleesa!
Si inzaliro zaabo, ziri kundi-kundi!
Boohe, baloziizi naaho kwo bagendi shereezania lwoshi,
halinde bagwanwe keera baminika abandu mu mahanga mingi-mingi.
8 Mwami waꞌBahasuriya agweti agayihaya kwokuno:
“Si ibirongoozi byaꞌbasirikaani baani,
byoshi biri nga baami!
9 Akaaya keꞌKalino, keera nꞌgakashereeza,
nga kwo nꞌgashereeza i Karikemishi.
Kiri naꞌkaaya keꞌHamaati, nꞌgakashereeza, nga keꞌHaripaadi.
NaꞌkeꞌSamariya kwakundi, nꞌgakashereeza, nga keꞌDamasiki.
10 Abandu ba yago maami gooshi, si bâli hiiti imigisi ya kahebuuza,
ukuhima imigisi yeꞌYerusaleemu, na yeꞌSamariya!
Kundu kwokwo, keera nꞌgabaminika booshi.
11 Aahago! Ka itali yo haahe, kwo ngagendi hima i Yerusaleemu, kuguma neꞌmigisi yayo,
nga kwo nꞌgahima Abasamariya, neꞌmigisi yabo?”»
12 Mwami weꞌHasuriya agweti agayikangaata, kinatume akola mu gira yaga mabi mingi. Kwokwo, ikyanya Nahano agaaba keera ayusa ukuhana umugazi Sayuni, yaho i Yerusaleemu, uyo mwami waꞌBahasuriya naye, lyo Nahano agamúhana.
13 Si mwami waꞌBahasuriya, agweti agayihaya kwokuno:
«Ngiisi byo ndi mu giraga, ndi mu bikoleesa ku misi yani nienyene.
Na ku bwitegeereze bwani, keera nꞌgahima ibihugo bingi.
Nanayifunda mu bihinda byabo, nanashahula mwaꞌkanyamwala keꞌbindu.
Na bwo ndyagagi kikalage, nanagendi teera abaami baabo nga shuuli.
14 Birya bindu byabo, nꞌgabinyaga,
nga kwoꞌmundu ali mu jalabula ibyananyuni mu ngisha.
Kiri neꞌbihugo byabo, nanabikumbulula,
nga kwoꞌmundu ali mu kumbulula amagi keera ágazirwa.
Ndaanaye úkabangula ukuboko kwage,
kandi iri ayamuula akanwa, mbu ambage.»
Nahano adetaga kwokuno:
15 «Isheenyo, ka yo ihimiri úli mu gibezeesa?
Kandi iri umusumeeni, ka gwo guhimiri úli mu gukoleesa?
Si ingoni itali mu shagania ukuboko kwoꞌmundu úgibangwiri.
Noꞌbuhiri, si butangalengeza umundu úbufumbiiti!»
16 Aahago! Nahano woꞌbushobozi bwoshi agatumira abasirikaani beꞌHasuriya ikiija kyoꞌkubajaavya.
Kwokwo, ubukalage bwabo, bugamalira mu muliro.
17 Rurema, ulya Mulengeerwe gwaꞌBahisiraheeri, agaaba nga muliro.
Ulya Mutaluule wabo agakoleesa umuliro mu kushereeza Abahasuriya.
Guli mu boyola imigenge neꞌmihanda-njovu ku lusiku luguma.
18 Gunaboyole noꞌlubako, kiri neꞌndalo zoꞌkuyera bwija.
Yibyo byoshi, Nahano agabishereeza,
nga mulwazi úwaharurwa neꞌkiija.
19 Ibiti bihamu bya mu lubako, bigasigala bigerwa naaho.
Kiri noꞌmwana waꞌkalenge, angashobola ukubiharuura.
Abahisiraheeri batumburukwa
20 Ku yikyo kyanya, hagasigala Abahisiraheeri bagerwa naaho.
Yabo, batagaki yegamira abandu beꞌHasuriya,
banali bo bakabahima.
Si leero umulangaaliro gwabo, bagagubiika imwa Nahano, Umutaluule waꞌBahisiraheeri.
21 Ee! Bagagalukira Rurema woꞌBushobozi.
22 Abahisiraheeri, kundu bangaluguuka nga mushenyu kwiꞌbuga,
halikago, ikikembere naaho kyo kyâye galuke!
Rurema keera ashungika kwo agashereeza abandu baage,
kugaanaba ku njira íkwaniini.† 10.22 Barumi 9.27.
23 Ee! Nahano woꞌbushobozi bwoshi, agabaminika,
nga kwo keera akagwanwa abamenyeesa.
Nahano agashereeza ikihugo kyeꞌHasuriya
24 Nahano woꞌbushobozi bwoshi, adetaga kwokuno:
«E bandu baani, mwe mutuuziri i Sayuni! Mutayobohe Abahasuriya.
Ee! Mutabayobohage, kundu bâli kizi mùshulika ingoni,
banakizi mùbangulira amahiri, nga kwaꞌBamiisiri nabo bâli kizi gira kare.
25 Mukuba, buzira kutindirira, ndagaki mùrakarira.
Haaho, lyo ngaleeza ubute bwani mu Bahasuriya, halinde mbaminike.»
26 Nahano woꞌbushobozi bwoshi agakubula Abahasuriya neꞌngoni yage.
Agabaminika, nga kwo akaminika Abamidyani kwiꞌbuye lyeꞌHorebu.
Ee! Anagolole ingoni yage ku nyaaja, nga kwo akagirira Abamiisiri.
27 Kundu Abahasuriya bagweti bagamùlibuza, haliko yago malibu gagaki mala.
Kundu bakamùbetuza imiteekerwa mizito,
igalyosibwa.
Abasirikaani beꞌHasuriya bagalyoka i Rimooni,
28 banazamuuke halinde mu kaaya keꞌHayati.
Banalenge iyo munda i Migorooni,
banasingule imiteekerwa yabo mu kaaya keꞌMikimasi.
29 Yabo basirikaani bagataluka ikyambu, babuli deta:
«Tugendi shumbika i Geba.»
Haaho, abandu beꞌRama bagajuguma neꞌkyoba.
Abatuulaga beꞌGibeya, imwabo Sahuli, bagatibita.
30 Mwe batuulaga beꞌGaliimu! Mubandage akashiba.
Mwe batuulaga beꞌLahisha, muyame muteziri amatwiri.
Yayewe imwinyu, mwe batuulaga beꞌHanatooti!
31 Abatuulaga beꞌMadimena, booshi bagweti bagapuumuka.
Naꞌbatuulaga beꞌGebimu bakiri mu bishama.
32 Zeene buno, abagoma bagashumbika iyo munda i Noobu.
Bagweti bagashagania ukuboko ku mugazi Sayuni,
yaho i Yerusaleemu.
33 Kundu kwokwo, abakulu baabo,
Rurema Nahamwitu woꞌbushobozi bwoshi, agabanyanyaga haashi.
Kundu bangabiiri bali bagangambale,
bagaakubwa haashi, nga kiti kihamu.
34 Rurema woꞌbushobozi bwoshi, ye gabakuba haashi,
nga kwoꞌmundu ali mu kizi kuba imyerezi yeꞌLebanooni neꞌsheenyo.