49
Yakobo agashaanira bagala baage booshi
1 Ha nyuma, Yakobo anatumira bagala baage booshi, anababwira: «Mweshi mukumanage. Ngamùmenyeesa íbigamùkoleka kwo, mu siku ízigayija.
2 E baana baani, mukumanage, mundege amatwiri.
Munyuvwirize, nie yisho Hisiraheeri.
3 E Rubeni, we fula yani.
We na misi yani, bwo we katangi butwa.
Kwokwo, balumuna baawe booshi, we basumbiri ulushaagwa neꞌmisi.
4 Kundu kwokwo, ulyagagi nga migezi mikayu íri mu golomba.
Si mu kushonera ku ngingo yani na muguma mu bakanie, ukambonia ishoni.
Ku yukwo, utagaki kulira abiinyu.
5 «Simyoni bo na Laawi, bali kikulu neꞌkilumuna.
Bakakoleesa ibyugi byabo mu kuyitana.
6 Ku yukwo, ndâye ki yibiike mu magambi gaabo.
Kiri neꞌmihumaanano yabo, ndâye ki giyingire mwo.
Si bakaminika abandu ku buraakari bwabo,
banatema ishuuli ikisi, mu kuyishesa naaho.
7 Yubwo buraakari bwabo, bwâli leeziragi ulugero. Kwokwo, mbudaasiri.
Ee! Ubute bwabo, nabudaaka ngana-ngana, bwo butali mweꞌndengeerwa.
Aba mu bibusi byabo, ngabashabulira mu kihugo kya Hisiraheeri,
babe mijande-mijande.
8 «E Yuda, beene winyu bagakizi kuhuuza, banakizi kufukamira.
Abagoma baawe nabo, ugakizi bakandamira.
9 E mugala wani wa Yuda, ulyagagi nga mwana weꞌndare,
keera úwavwajagira byo alonga i ruhiiviro, anashubi galukira mwiꞌbundo.
Ulyagagi nga ndare íshubi jujamiri, inakoli gwejiiri.
Aahago! Nyandi úwangaki givyula?
10 Abayuda bayamiragi bali neꞌngoni yeꞌkyami.
Itaganalyoka mu magulu ga mwami wabo,
halinde ukuhisa ku kyanya ulya úgikwaniini agaahika.
Yehe, ibinyamahanga byoshi bigakizi músimbaha.
11 Agakizi shwekera punda wage ku mulandira gwoꞌmuzabibu.
Umwana woꞌyo punda, agakizi múshwekera ku kitombo kyagwo.
Aganakizi fula ibyambalwa byage mu divaayi.
Neꞌkooti lyage, agalifuliisa umuko gweꞌmizabibu,
12 halinde amasu gaage ganadukumbuke bweneene.
Amiino gaage nago, gagakizi ba meeru pepeepe ukuhima amata.
13 «Zabulooni, agatuula ku butambi bweꞌnyaaja.
Amashuba, ganakizi yezeka ho.
Ulubibi lweꞌkihugo kyage, lugahekera ku kyeꞌSidooni.
14 «Hisakaari, ali nga kihagange kya punda,
úkoli gwejiiragi ha kati keꞌmiteekerwa ibiri.
15 Abwinagi kwo yaho ho ali mu luhuukira, hali hiija,
na kweꞌkihugo kisimisiizi.
Kyanatuma agaagoka, gira iyo miteekerwa, agiheekage.
Na mu kugiheeka, anabe muja woꞌkukola ku kahaati.
16 «Daani agakizi twala abandu baage,
nga kweꞌgindi milala ituula igira.
17 Uyo Daani, agaaba nga mujoka úguli ku njira,
na nga kihoma íkiteziri ku butambi bweꞌnjira.
Kinakizi komera ifwarasi ku birenge,
halinde úgishoniiri kwo, anadeedeke umugongo haashi.
18 «E Nahano, ndangaliiri kwo we gangiza.
19 «Gaadi, kundu agateerwa naꞌbiitani,
haliko ye gabahima, anabashindibuke kwo.
20 «Hasheeri, ikihugo kyage kigayera bweneene.
Yibyo byokulya byage, bigakizi liibwa naꞌbaami.
21 «Nafutaali, alyagagi nga kasa ákali noꞌbutoge,
kanali mu buta abaana ábanonosiri.
22 «Yusefu alyagagi nga kitombo íkiri ha butambi lyeꞌshyoko, kinajoojesiri bweneene.
Amatavi gaakyo, gali mu yajabuka, halinde ganasooke ikyogo.
23 Abagoma baage, kundu bagweti bagamùlwisa neꞌmiheto,
iri banamúshomboroza mu kumúlasha imyambi,
24 haliko, akayama afumbiiti umuheto gwage.
Naꞌmaboko gaage ganayama gayanguhiri.
Ali mu longa ubushobozi imwa Rurema wa Yakobo.
Mukuba Rurema, ye kikalage kyoꞌmungere, ye na Lwala lwaꞌBahisiraheeri.
25 Rurema wa yisho, ye gakizi kutabaala.
Ye Rurema woꞌbushobozi bwoshi, ye ganakizi kugashaanira.
Kwokwo, ugakizi longa invula ukulyoka mwiꞌgulu.
Noꞌtudota, tunakizi bira mu kuzimu.
Ugakizi buta abaana bingi.
Kiri neꞌbitugwa, binayolole.
26 Imigashani yo wahaabwa na yisho, ihimiri imigashani yeꞌmigazi íyamiri ho.
Inahimiri na byoshi íbigiri kwo.
Iyo migashani yoshi, ikizi beera kwiꞌtwe lya Yusefu, na ku kashanga-mutwe kaage.
Mukuba, akuliiri bakulu baage booshi.
27 «Binyamiini, alyagagi nga mulunga mulangi.
Shesheezi, guli mu zindukiri vwajagira ngiisi byo gwalonga i ruhiiviro.
Naꞌkabigingwe, gunagabure imisigala.»
28 Yabo booshi, yo milala ikumi niꞌbiri yaꞌBahisiraheeri. Neꞌkyanya yishe Yakobo akabagashaanira, gaago go magambo go âli kizi babwira. Akagashaanira ngiisi muguma, nga kwo bimúkwaniini.
Yakobo afwa
29 Ha nyuma, Yakobo anakomeereza yabo bagala baage kwokuno: «E baana baani, ngola ngagwana bashokulu. Aaho! Mukanziikage ngiisi ho bashokulu bakaziikwa, mu shinda íri mu lwala, mu ndalo ya Hefurooni, Umuhiti.
30 «Iyo shinda, iri mu ndalo yeꞌMakepela, hoofi neꞌMamure, mu kihugo kyeꞌKaanani. Hiburahimu ye kahagula imwa Hefurooni, Umuhiti, gira habe ho agakizi ziikira beene wage.
31 «Haaho, ho Hiburahimu na mukaage Saara nabo bakaziikirwa. Kiri na Hisake na mukaage Rebeka, nabo ho bakaziikirwa. Kiri na Leya naye, haaho ho nꞌgamúziikira. 32 Iyo ndalo, neꞌyo shinda íri mwo, akabigula imwaꞌBahiti.»
33 Yakobo, mbu ayusagye ukulaga bagala baage, anashubi yilambika ku ngingo, anayami fwa, anagwana bashokulu.