16
1 Kalya Kajumba keꞌKihango, iri bakakaleetaga, banakayingiza mwiꞌheema lyo Dahudi âli mali gwanwa akalingaaniza. Haaho, banatangira Rurema amatuulo goꞌkusiriiza lwoshi, na goꞌkuyerekana ingoome. 2 Yago matuulo, ikyanya Dahudi akayusa ukugatanga, anagashaanira Abahisiraheeri kwiꞌziina lya Nahano. 3 Ngiisi muguma wabo, abashosi naꞌbakazi, anabagabulira umukate, neꞌndongo yeꞌnyama, noꞌmukate gweꞌmizabibu myumu.
4 Dahudi anabiika Abalaawi baguma, kwo bakizi kolera Nahano, Rurema waꞌBahisiraheeri imbere lyaꞌKajumba keꞌKihango kyage. Bakizi múhuuna imigashani, iri banamútangira kongwa, noꞌkukizi múhuuza. 5 Anatoola Hasafu, abe kirongoozi wabo, atabaalwe na Zakariya. Anatoola na Yehiyeri, na Shemiramoti, na Yehyeri, na Matitiya, na Heryabu, na Benaya, na Hobedi-Hedoomu, na Yehyeri, babe bo bagakizi lasa ibinanda neꞌnzeeze. Hasafu ye wâli kizi ziha isembaale. 6 Abagingi Benaya na Yahazyeri, banatoolwa kwo bo bakizi dihiriza ibibuga imbere lyaꞌKajumba keꞌKihango.
Dahudi ayimba izaburi yoꞌkudeta kongwa
(Zaburi 105.1-15; 96.1-13; 106.1, 47-48)
7 Ku lwolwo lusiku, Dahudi anaheereza Hasafu na beene wabo Abalaawi yulu lwimbo lwoꞌkuyivuga Nahano:
8 Mukizi tanga kongwa imwa Nahano, munakizi menyeesania ngiisi kwo ali mukulu.
Ngiisi byo âli kizi kola, mukizi bimenyeesa mu binyamahanga byoshi.
9 Mukizi múyimbira! Mukizi múyimbira inyimbo zoꞌbwivuge.
Ibitangaaza byage, mukizi bimenyeesania.
10 Mukizi huuza iziina lyage, kwo liri lyeru.
Ngiisi ábali mu yikumba Nahano, mukizi shambaala.
11 Mukizi looza Nahano, mulooze neꞌmisi yage.
Mukizi yidula ukumúbona isiku zooshi.
12 Mukizi kengeera ngiisi kwo Nahano âli kizi gira ibisoomeza,
na ngiisi kwo âli kizi twa imaaja.
13 E bandu ba mwiꞌkondo lya Hisiraheeri,
munali beene Yakobo. Mwehe, mwe Rurema atooziri.
14 Nahano, ye Rurema witu.
Kiri na mu mahanga gooshi, ye mu twa mweꞌmaaja.
15 Nahano ayamiri akengiiri ikihango kyage,
agaanaba akisimbahiri, halinde ukuhisa ku bandu beꞌbibusi kihumbi.
16 Yikyo kihango, akatee kinywana bo na Hiburahimu,
anakibiika kweꞌndahiro imwa Hisake.* 16.16 Ndondeko 12.7; 26.3.
17 Kiri neꞌmwa Yakobo, akakisisa.
Anakinywana kiri naꞌBahisiraheeri, kikizi ba kyeꞌmyaka neꞌmyakuula.† 16.17-18 Ndondeko 28.13.
18 Anadeta: «Ngamùheereza ikihugo kyeꞌKaanani,
kikizi ba buhyane bwinyu.»
19 Ikyanya Nahano akabalagaania kwokwo, bâli ki riiri bagerwa naaho.
Banâli nga binyamahanga mu kihugo kyeꞌKaanani.
20 Bâli kizi jeba-jeba mu mahanga,
ukushaaga ku bwami buguma halinde ku bundi.
21 Kundu kwokwo, Rurema atanahanguula kwo hagire umundu úgabalibuza.
Si hiꞌgulu lyabo, anakanukira abaami,‡ 16.21-22 Ndondeko 20.3-7. ti:
22 «Yaba batoolwa baani, mutakolwe mbu mukizi balibuza.
Mutanagirire abaleevi baani ubuligo.»
23 Mwe bandu baꞌmahanga gooshi! Mukizi yimbira Nahano.
Mukizi menyeesa ngiisi lusiku ngiisi kwo agweti agaakiza.
24 Mukizi menyeesa ubulangashane bwage mu binyamahanga.
Mumenyeese abandu booshi imikolezi yage ya kahebuuza.
25 Nahano ye mukulu. Ye na kwaniini ukuyivugwa.
Ee! Ye kwaniini ukugingikwa, ukuhima abandi ábali mu yikumbwa booshi.
26 Birya abandu beꞌmahanga bali mu yikumba, si iri migisi naaho!
Haliko Nahano ye kabumba igulu,
27 anayamiri ali mwoꞌlushaagwa noꞌbulangashane.
Ngiisi ho atuuziri, ayamiri ali noꞌbushobozi noꞌbushambaale.
28 E bandu baꞌmahanga gooshi!
Bwo Nahano ye mwene ubulangashane noꞌbushobozi, mukizi múhuuza.
29 Mukizi huuza ubulangashane bwage, bwo ye mwene bwo.
Munakizi múleetera ituulo mu nyumba yage ndaluule.
Mukizi múyikumba mu bulangashane bweru.
30 Mwe bandu beꞌbihugo byoshi, mukizi juguma imbere lyage.
Ikihugo kidediiri, kitanâye jugumbane.
31 Igulu, likizi shagaluka. Neꞌkihugo, kikizi shambaala.
Mubwire ibinyamahanga, ti: «Nahano ye mwami.»
32 Inyaaja ibindule, na byoshi íbiri mwo.
Imbingiro na ngiisi íbiziri mwo, nazo zikizi shambaala.
33 Kiri neꞌbiti byeꞌrubako bikizi yimba,
ku bushambaale imbere lya Nahano.
Mukuba, ye gayiji twa imaaja zaꞌbandu booshi mu kihugo.
34 Mukizi deta kongwa imwa Nahano, bwo ali mwija.
Ayamiri ali mu kundana, halinde imyaka neꞌmyakuula.§ 16.34 2 Kutondobola 5.13; 7.3; Hizira 3.11; Zaburi 100.5; 106.1; 107.1; 118.1; 136.1; Yeremiya 33.11.
35 Muyiberekanie, ti: «E Rurema, Lukiza witu! Utukizagye maashi!
Utukuumanie, unatukize mu binyamahanga,
gira lyo tukizi huuza iziina lyawe, kwo liri lyeru.
Ee! Tugakizi yiyuvwa, mu kukuyivuga.»
36 Nahano Rurema waꞌBahisiraheeri, akizi huuzibwa,
halinde imyaka neꞌmyakuula.
Yulwo lwimbo, ikyanya bakayusa ukuluyimba, banayiberekania kwiꞌzu, ti: «Bikizi ba kwokwo.» Banayivuga Nahano.
Bayikumbira Rurema i Yerusaleemu, kiri neꞌGibyoni
37 Mwami Dahudi anasiga Hasafu na beene wabo Abalaawi, bakizi kolera Nahano imbere lyaꞌKajumba keꞌKihango kyage, bakizi gira ngiisi íbikwaniini ngiisi lusiku. 38 Mu kati kaabo, mwâli Hobedi-Hedoomu mugala Yedutuni, kuguma naꞌbaabo makumi galindatu na munaana, bali mu kolera kuguma. Hobedi-Hedoomu na Hosha bo bâli kizi langa inyiivi.
39 Mwami Dahudi anabiika umugingi Saadoki naꞌbaabo bagingi, gira bakizi kola imbere liꞌheema lya Nahano iyo munda Gibyoni. 40 Bâli kwaniini ukukizi tangira Nahano amatuulo goꞌkusiriiza ku katanda, ngiisi shesheezi na ngiisi kabigingwe, nga kwo biri biyandike mu maaja zo Nahano akasikiiriza Abahisiraheeri.
41 Hâli na Hemani, na Yedutuni, na balya booshi ábakatoolwa, ngiisi muguma kwiꞌziina lyage. Yabo, bâli kwaniini bakizi yivuga Nahano. Mukuba, urukundo lwage luli lweꞌmyaka neꞌmyakuula.
42 Hemani na Yedutuni, bo bâli kizi yivuga Nahano, mu kudihiriza ibibuga, neꞌsembaale, neꞌbindi íbigaalaka. Bagala Yedutuni, bo bakabiikwa, mbu bakizi langa inyiivi.
43 Iri hakatama, yabo bandu booshi banataaha. Dahudi naye anagenda imwage, gira agendi gashaanira imbaga yage.