7
Abanyere beꞌYerusaleemu
1 «E munyere weꞌShulaami! Ugalukage!
Ee! Ugaluke, maashi, gira tushubi kulola kwo.
Aaho! Kituma kiki mugweti mugaloleera Umushulaami-kazi,
ku kyanya ali mu kina bwija ha kati kaꞌbandu ba mu miziizi ibiri?»
Umushosi
2 «E muluzi-nyere, lola kweꞌshando zaawe zinonosiri bweneene.
Kiri neꞌbibero byawe, biri mu simiisa ngana-ngana.
Biri nga bungeni-ngeni úbukatulwa na naluganda nirizina.
3 Hiꞌkondo lyawe hali umutanga mubumbirize.
Mu kati kaagwo, muyijwiri idivaayi nunu.
Ibunda lyawe liri nga kilundo kyeꞌngano.
Yikyo kilundo kizungulusirwi noꞌtwaso tweꞌyungiyungi.
4 Amabeere gaawe gombi, gali nga tusa twiꞌhasha,
na nga nzobe zibiri.
5 Igosi lyawe libuyahiri nga lwingo lwaꞌmahembe geꞌnjovu.
Amasu gaawe gakeyengiini, nga birigo bya mu kaaya keꞌHeshibooni,
hoofi noꞌlwivi lweꞌBati-Rabimu.
Izuulu lyawe lishogonosiri, nga lwingo lweꞌLebanooni,
ho bali mu langiiriza akaaya keꞌDamasiki.
6 Itwe lyawe likunangusiri nga mugazi Karimeeri.
Ibishungi byoꞌmushaku gwawe, biri byeꞌkituku-tuku.
Ubwija bwagwo, bwangalungumiza kiri na mwami.
7 E mukundwa wani, unonosiri ngana-ngana.
Usimisiizi bweneene, unali mu hemurana.
8 Ibumbo lyawe, lishogonosiri nga kiti kyeꞌkigazi.
Amabeere gaawe, gali nga mihuli yeꞌbitumbwe.
9 Kyo kitumiri nꞌgadetaga: “Bingwiriiri njonere ku kiti kyeꞌkigazi,
gira ndootole kweꞌbitumbwe!”
Imwani, amabeere gaawe gali nga mihuli yeꞌmizabibu.
Umuuka gwawe guli mu huumura nga muhongolo gwaꞌmapera!
10 Akanwa kaawe kali mu ndalusa nga divaayi nunu!»
Umunyere
«Aahago! Iyo divaayi, ijalabande mu nda yoꞌmukundwa wani.
Ee! Ishunguluke ku mishushu yage, inalenge ha kati ka miino!
11 Niehe, ndi mundu woꞌmukundwa wani.
Naye, nie ali mu kizi yidula naaho.
12 «E mukundwa, yijaga, tugende mu mbingiro,
tugendi gwejera mu bishoola.
13 Tunashubi vyukira kare-kare, mu ndalo zeꞌmizabibu,
gira tulolage iri keera yatanga utufundo,
kandi iri utufundo tukola mu yasa.
Na kwakundi, tulolage iri amakomamanga keera gayasa.
Yeyo munda, yo ngakuyerekera urukundo lwani.
14 Imbuumuro nyiija yoꞌruvuto, ishabukiiri mu kyanyaanya.
Ngiisi mulala gweꞌbitumbwe biija, keera gwatuyegeera.
Halyagagi ibitumbwe bihyahya, neꞌbya keera.
E mukundwa wani! Byebyo byo nꞌgagwanwa nakusingulira.»