85
Rurema ali mu lagaania abeꞌmwage umutuula
1 Imwoꞌmwimangizi waꞌbimbi. Izaburi yaꞌbaana ba Koora.
2 E Nahano, keera wagashaanira ikihugo kyawe bweneene,
keera wanajebereza beene Yakobo.
3-4 Abandu baawe, ikyanya bakakuhubira,
wanatee barakarira.
Haliko, keera ukabakoga, wanabwikira ibyaha byabo byoshi.
Ee! Keera ukahooha,
wanaleka ukubalangamira.
5 E Rurema, Lukiza witu, utugalulage ho tushuba.
Kundu ukatubona buligo, ubuleke, we kongwa!
6 Aahago! Ka ugayamaga uturakariiri, halinde imyaka neꞌmyakuula?
Yubwo buraakari bwawe, ka bugagenderera halinde mu bibusi byoshi?
7 Ka utangatuhanguula tutondeerage buhyahya,
gira lyaꞌbandu baawe bakizi kushambaalira?
8 E Nahano, urukundo lwawe lutali neꞌmbeka.
Aaho! Utuyereke lwo, maashi, unatukize.
9 Nahano Rurema ali mu lagaania abandu baage kwo bagalonga umutuula.
Kwokwo, ngakizi múyuvwiriza.
Aaho! Batakolwe mbu bashubi galukira mu buhwija.
10 Ku kasiisa, ngiisi ábamúsimbahiri, ali ibiringiini ukubakiza,
halinde lyoꞌbulangashane bwage, bukizi boneka mu kihugo kiitu.
11 Abandu ba Rurema bali mu ba noꞌrukundo noꞌkuli.
Ubwija noꞌmutuula bigaaba byeꞌmwabo.
12 Mu kihugo, abandu bagakizi yemeera Rurema.
Neꞌyo munda mwiꞌgulu, agakizi bagashaanira bweneene.
13 Nahano agakizi tugashaanira,
halinde ikihugo kiitu kinayere bweneene.
14 Ngiisi íbikwaniini bigakizi sholera imbere lya Rurema,
binakizi múlingaaniza ngiisi ho agalenga.