76
Rurema ye mutwi weꞌmaaja
1 Imwoꞌmwimangizi waꞌbimbi. Izaburi ya Hasafu. Luli mu yimbwa neꞌnanga. Ulwimbo.
2 Rurema ayijikiini bweneene mu Bayuda.
Iziina lyage liri mu kizi huuzibwa mu Bahisiraheeri.
3 Rurema atuuziri i Yerusaleemu, ku mugazi Sayuni.
4 Yeyo munda yo akavungula imyambi yaꞌbagoma baage,
kiri neꞌmiheto yabo, neꞌsiribo zaabo, neꞌngooti zaabo.
5 E Rurema, uyamiri utuuziri mwoꞌbulangashane,
bunahimiri bweꞌmigazi, kundu iyamiri ho.
6 Indwani za mu bagoma biitu, keera bakazishahula ibindu.
Buno, zikoli gwejiiri nga zifwiri, ndaanaye úwangaki yiji tuteera.
7 E Rurema wa Yakobo, ikyanya ukazikanukira,
ifwarasi zaabo zanayami fwa kuguma na ábâli zishoniri kwo.
8 E Rurema, ikyanya uli mu ba urakiiri,
nyandi úwangagira mbu ayimange imbere lyawe?
Ndaaye gundi ye tukwaniini ukuyoboha.
9 Wehe, kwo ulyagagi mwiꞌgulu, ukatwa imaaja zaꞌbagoma.
Haaho, ikihugo kyanayami yoboha, kyanaba munyerere.
10 E Rurema, ukayimuka, wanatwa imaaja za banangora-mabi.
Haliko ngiisi ábali mu libuzibwa, boohe, uli mu bakiza.
11 Na bwo ugweti ugakizi rakarira amabi, kyo kitumiri uli mu yivugwa.
Ngiisi ábakafuuka uburaakari bwawe, batagaki kola amabi.
12 Ikyanya uli mu lagaania Rurema Nahamwinyu igambo,
umúgirire lyo.
Abandu bakwaniini bakizi músimbaha.
Kwokwo, mwe binyamahanga, mukizi múleetera amatuulo.
13 Kundu abatwali bangaba bali mu yidundulika, si Rurema ye mu bashengula imitima.
Kwokwo, abaami beꞌkihugo bamúyobohiri.