71
Kutabaaza Rurema
1 E Nahano, keera nakutibitira.
Aaho! Utandekage mbu ndeezibwe ishoni.
2 Bwo uli Rurema woꞌkuli, ungizagye, unambishe.
Undege amatwiri, unayiji nguluula.
3 Si we lwala lwani, we na Luzitiro lwani.
Aaho! Ube lwala lwo nangakizi tibitira mwo,
unakyulage kwo ngizibwe.
4 E Rurema wani, ungize mu maboko ga banakuhambwa.
Si bakoli bihuusiri, banagweti bagayitana!
Kwokwo, unjaazagye mu maboko gaabo.
5-6 E Nahano, we kandyosa mu nda ya maawe.
Kyo kitumiri ngakizi kubiika kwoꞌmulangaaliro.
Ukulyokera ubusore bwani, we ngweti ngayegamira, iri na nguyivuga.
7 We kambeereza ubushobozi, we nali mu njuutira.
Kwokwo, abandu bingi bakola mu nyigira kwoꞌmugani.
8 Kyo kitumiri ngakizi kuyivuga.
Na ndi mu shiiba ngweti ngakuhuuza.
9 Ikyanya ngaaba ngolaga mushaaja,
neꞌmisi inabaagage ndaakiyo, utanjandirire.
10 Si abagoma bali mu shungika igambi libi hiꞌgulu lyani,
banakoli kuumaniri kuguma, gira balonge ukunyita!
11 Bali mu deta: «Si Rurema keera akamújanda,
ndaaye úwangaki múkiza!
Aaho! Mugirage tumúhoove, halinde tunamúgwate.»
12-13 E Rurema wani, we kongwa! Si baloziizi ukungomeeresa!
Aaho! Utakizi nyisunga hala.
Haliko, unyijirage duba, gira undabaale.
Ikyanya bali mu ndega, leka boonyene bagwatwe neꞌshoni, banashereezibwe.
Ee! Ishoni zibagwatage, banateteerwe.
14 Haliko niehe, ngagenderera ukukulangaalira,
iri na ngizi kuyivuga.
15 Kundu ndayiji ngiisi kwo nangasobaanura ukuli kwawe,
haliko, ngakizi shiiba ngweti ngakuhuuza,
bwo we mu gira íbikwaniini.
16 E Rurema Nahamwitu, ngakizi menyeesa abandu ngiisi kwo uli mu gira ibya kahebuuza.
Ngakizi bakengeeza kwo wehe naaho we kwaniini.
17 E Rurema, wâli kizi nyigiriza ukulyokera ubusore bwani.
Halinde na zeene, ngakizi menyeesa imikolezi yawe ya kahebuuza.
18 Buno, ngola mushaaja, na ngolaga neꞌnvwi.
Aaho! Utanjandirire!
Uleke ngizi menyeesa ubushobozi bwawe
imwa booshi ábagaki yija inyuma lyani.
19 E Rurema, ndaaye úkusumbiri!
Ukuli kwawe, kuhisiri halinde mwiꞌgulu.
Keera ukanagira ibitangaaza bihamu.
20 Kundu ukanyingiza mu makuba mingi-mingi,
haliko, ugaki shubi nvyula, na njubi ba mugumaana.
Ee ma! Ikyanya nâli kola bu fwa, wanashubi nyinamula.
21 Ugashubi mboleeza,
iri unangingika.
22 E Rurema wani, we Mutaluule waꞌBahisiraheeri,
unayamiri uli mwemeera bweneene.
Kwokwo, ngakizi kuyivuga mu kukulakiza ululanga.
Ngakizi kuyivuga ku nyimbo zeꞌnzeeze.
23 Mukuba, keera wanguluula.
Kwokwo, ikyanya ngakizi kuyivuga, ngakizi kubandira utubuuli.
24 Ngakizi shiiba ndi mu menyeesa abandu ngiisi kwo uli woꞌkuli.
Haliko, ngiisi ábâli loziizi ukungomeeresa boohe,
bagagwatwa neꞌshoni, banateteerwe.