53
Rurema agweti agalangiiza ábakwaniini
1 Imwoꞌmwimangizi waꞌbimbi. Luli mu yimbwa ngoꞌlwimbo lwoꞌmwizingeerwe. Amigirizo ga Dahudi.
2 Abahwija bali mu yidesa, ti: Si Rurema, ndaaye!
Yabo bandu, bakoli sherebiiri.
Ngiisi byo bagweti bagaagira, bikoli bihuusiri.
Mu kati kaabo, ndaaye úli mu gira amiija.
3 Rurema, kwo ali mwiꞌgulu, agweti agalangiiza abandu booshi,
gira alonge ukumenya iri hangaba hali umundu mwenge,
kandi iri úgweti úgamúlooza.
4 Si booshi keera bakahabuka, banakoli sherebiiri!
Ndaaye úli mu gira amiija, kiri noꞌmuguma.
5 Rurema adetaga: «Aaho! Balya banangora-mabi, ka batâye sobanukirwe?
Si batali mu ndabaaza, banali mu janganula abandu baani,
nga bagweti bagavwajagira ibyokulya.»
6 Yabo banangora-mabi, bagaki shenguka neꞌkyoba,
kundu byoꞌkubayoboheesa, ndaabyo.
Abagoma baawe, Rurema agashaabula amavuha gaabo,
gabe mijande-mijande.
Yabo bagoma, si keera akabalahira.
Kwokwo, ugabatetereza ngana.
7 Bwangabiiri bwija Abahisiraheeri balonge ubukize ukulyoka i Sayuni.
Ikyanya Rurema agagalula abandu baage ukulyoka mu mahanga,
beene Yakobo bagakizi shambaala.
Ee ma! Beene Hisiraheeri, bagashagaluka ngana-ngana.