46
Nahano, tuyamiinwi
1 Imwoꞌmwimangizi waꞌbimbi. Izaburi yaꞌbaana ba Koora. Luli mu yimbwa kwiꞌzu lihanike.
2 Rurema ye mu kizi tulanga, ye na misi yitu.
Ku kyanya tuli mu ba mu makuba, ali mu kizi tutabaala.
3-4 Kwokwo tutangayoboha, kundu ikihugo kyangabereka,
neꞌmigazi inajugumbane, inagendi yihongoleka mu nyaaja.
Ee! Tutangayoboha, kundu inyaaja yangakundula,
inabirindule, halinde inabe ikola bitwange.
5 Mu kaaya ka Rurema, muli ulwiji.
Amiiji gaalwo, gali mu shagalusania.
Yako kaaya, kali keeru bweneene,
hanali ho Rurema yenyene atuuziri, ulya úli hiꞌgulu lya byoshi.
6 Na bwo Rurema ali mwo, katâye shaganibwe.
Si agayiji katabaala ku lukula.
7 Amahanga gakola mwaꞌkavulengo.
Amaami ganagweti gagashaabuka.
Ee ma! Rurema agweti agayiberekania kwiꞌzu,
ikihugo kinayami jongoloka.
8 Nahano woꞌbushobozi bwoshi ali kuguma na nyiitu.
Ee! Rurema wa Yakobo, ye tuli mu sikama mwo.
9 Muyiji bona ngiisi byo Nahano keera akagira,
mulole ngiisi kwo akaleeta akahumbwe mu kihugo.
10 Agweti agaamala izibo,
halinde ukuhisa haꞌmahanga gooshi gahekiiri.
Agweti agavuna imiheto, wa koto! Naꞌmatumu, ali mu gajajagula.
Kiri neꞌsiribo, ali mu zisiriiza.
11 Agweti agaadeta: «Muhulikage! Mumenye kwo nie Rurema.
Ngakizi huuzibwa mu mahanga gooshi.
Ee! Ngahuuzibwa hooshi mu kihugo.»
12 Nahano woꞌbushobozi bwoshi ali kuguma na nyiitu.
Rurema wa Yakobo, ye tuli mu sikama mwo.