6
Ungejeerere, unangize
1 Imwoꞌmwimangizi waꞌbimbi. Izaburi ya Dahudi. Luli mu yimbwa neꞌnanga.
2 E Nahano, ikyanya uganyerekeza, kutabe ku bute.
Neꞌkyanya ugambana, kutabe ku buraakari.
3 Si indege zaani, keera zatera!
Aaho! Ungejeerere, unangize.
Amavuha gaani gakola mu lyanirwa.
4 Noꞌmutima gwani, gugweti gugatulagula.
E Nahano, ugaahisa halinde mangoki, ugweti ugandekeerera?
5 E Nahano, wehe uyamiri ukuuziri abandu bweneene.
Aaho! Ungebagane, unangizagye.
6 Mu bakoli fwiri, si ndaaye úkukengiiri!
Bwo bakola i kuzimu, ndaaye úshobwiri ukukuyivuga.
7 Yuku kuliruuka kwani, keera kwanduhya bweneene.
Imigenge yani, iri mu hinga nga lwiji.
Na ndi mu laala ubushigi bwoshi ngweti ngaalira,
iri ninalovya ingingo.
8 Na íbitumiri ndi mu lira kwoku, bwaꞌbagoma baani bakola katundu.
Guno mwizingeerwe, gugweti gugafwifwitiza amasu gaani,
gatanakiri mu bona bwija.
9 Mwe banangora-mabi mweshi, munjaagage ha butambi.
Si Nahano keera ayuvwa ngiisi kwo ngola mu lira.
10 Ee ma! Keera anyuvwa,
anakola aganjuvya.
11 Abagoma baani, bagaki teteerwa, banagwatwe neꞌshoni,
banagalukire inyuma bakoli jojobiiri.