9
Hayubu ashuvya Biridaadi
1 Haaho, Hayubu anashubi deta kwokuno:
2 «Ewe! Yibi byoshi wadeta, nyiji kwo biri kwokwo.
Aaho! Kutagi kwoꞌmundu angaharuurirwa kwo akoli kwaniini imbere lya Rurema?* 9.2 Hayubu 4.17.
3 Umundu, hali ikyanya angagira mbu ahagane na Rurema.
Kundu kwokwo, iri Rurema angamúbuuza ibibuuzo kihumbi,
uyo mundu atangatami shuvya kiri neꞌkiguma.
4 Rurema ali mwitegeereza wa bweneene, anali kikalage.
Aaho! Nyandagi ye bakahagana bo naye, atanakomeresibwa?
5 «Ikyanya Rurema ali mu bungiisa amalambo,
ndaaye úli mu tee kengulwa.
Yago malambo, ali mu gabalandula-balandula ku buraakari bwage.
6 Ali mu shagania ikihugo,
halinde kinashaage ahandu haakyo.
Kiri neꞌnguliro zaakyo, zinakizi juguma.
7 Ali mu bwira izuuba kwo leero litatunduuke.
Kiri neꞌndonde, anazibwikire, zitamoleke.
8 «Rurema yenyene ye katabika igulu,
anakizi fina hiꞌgulu lyeꞌmidunda yeꞌnyaaja.† 9.8 Kandi iri: «anakizi fina umujoka gwa mu nyaaja ku mugongo.»
9 Ye kabumba indonde zooshi kwiꞌgulu:
Idubu, neꞌHoryoni, neꞌKirimiya, neꞌzindi ndonde íziri ikisaka.‡ 9.9 Hayubu 38.31; Hamoosi 5.8.
10 Ikyanya Rurema ali mu kola igambo, ndaaye úwangalisobanukirwa.
Ayamiri ali mu gira ibitangaaza kandaharuurwa.
11 «Ikyanya Rurema ali mu lenga ha butambi lyani,
ndashobwiri ukumúbona. Ndanganamenya ho ayigendera.
12 Byo Rurema anyugutula,
nyandagi úwangaki bigalula?
Nyandi úwangakolwa mbu amúbuuze, ti:
“Ewe! Maki gano ugweti ugaagira?”
13 Si ukuraakara, ali mu raakara ngana!
Kiri neꞌbihuume byeꞌfwi, biri mu goka imbere lyage, iri binajuguma.
14 «Aaho! Niehe, ndyagagi nyandi, halinde mbagane na Rurema?
Si ndaago magambo nangalonga, mbu tukizi paapana!
15 Kundu nangabiiri ngwaniini imbere lyage, ndangamúshuvya.
Bwo yehe ye mu twa imaaja, nangamúhuuna naaho, kwo angoge.
16 Kundu nangamúhamagiiri, ananyitabe,
ndaki yemiiri kwo anganyuvwiriza.
17 Rurema ali mu nyuka-nyuka neꞌkihuhuuta.
Na kundu ngwaniini imbere lyage, ali mu kizi ngomeeresa naaho.
18 Atali mu mbanguula kwo ndee mira amate.
Si ali mu ndibuza ngana-ngana!
19 «Iri twangalola ku misi, yehe ye hiiti imisi bweneene.
Neꞌri twangalola ku bikwaniini imbere lyage,
ndaaye úwangamúlega imbere lyaꞌbatwi beꞌmaaja.
20 Kundu nangabiiri nduuziri buzira buhube,
si amagambo gaani, gangayerekana kwo ndi munabuhube.
Na kundu nangaba ndi woꞌkuli,
haliko, amagambo gaani gangayerekana kwo ndi nangora-mabi.
21 Niehe, ndaabyo bangandega kwo.
Kundu kwokwo, ndakiri mu yitwaza.
Si uburambe bwani, ngoli gweti ngabugayiriza.
22 Ewe! Si byoshi biryagagi byo biguma! Kyo kitumiri nadeta kwokuno:
“Kundu nangabiiri ngwaniini, kandi iri ndi nangora-mabi,
Rurema ali mu shereeza booshi.”
23 Ikyanya ikiija kiri mu yingira, kinayite abandu haaho-haaho,
ali mu yishekera naaho, kundu yabo bandu bashuba bazira buhube.
24 Neꞌkyanya ikihugo kiri mu biikwa mu maboko ga banangora-mabi,
Rurema ali mu ziba amasu gaꞌbatwi beꞌmaaja.
Aaho! Ákibe atali ye mu gira kwokwo, iri nyandagi gundi úli mu kugira?
25 «Isiku zaani, ziri mu tibita bweneene ukuhima umundu úli mu ndangwe.
Ziri mu nyerera duba-duba, ndaanabwo bushambaale bwo mbiiti.
26 Ziri mu suula umulindi, nga mashuba mu nyaaja.
Ziri mu genda nga nyunda úgweti úgayivwima mu buhiivi bwage.
27 «Hali ikyanya nangadesiri, ti: “Yago makuba gaani, ndagatwaziizi.
Ngayikania naaho, ninasheke ku bushambaale.”
28 Kundu kwokwo, yubwo bulyanirwe bwani bwoshi, ngaaba ngi buyobohiri.
Mukuba, ikyanya mugandwira imaaja, mugaadeta kwo ndi munabuhube.
29 Kundu kwangabiiri kuti, ngatwirwa ulubaaja naaho kwo ndi noꞌbuhube,
Aahago! Kituma kiki ngashubi libuukira ubusha?
30 Kundu nangayikaraba neꞌsaabuni,
na nyeruuse amaboko,
31 halikago, ugashubi ndibulira mwiꞌdavwangira.
Kiri neꞌbyambalwa byani, byanganneena.
32 «Bwo Rurema atalyagagi mundu, ndahiiti ubulyo bwoꞌkumúshuvya.
Tutanganabuulana twe naye imbere lyaꞌbatwi beꞌmaaja.
33 Nangaloziizi kwo habe umuhambuuzi ha kati kiitu.
Yeki, angakoli tuhambuula.
34 Mukuba, iyo ngoni yo ali mu njulika mwo, uyo muhambuuzi angaginjaagiza.
Lyoki, ndangaki yoboha kwo agashubi mbana.
35 Nangashobwiri ukumúganuuza buzira kyoba.
Halikago buno, ndaki hiiti ubushobozi bwoꞌkumúganuuza.»