2
Abahisiraheeri bakajanda Nahano
1 Nahano anashubi nduma, 2 kwo ngendi menyeesa abatuulaga beꞌYerusaleemu, ti:
«Ngi kengiiri kweꞌkyanya mwâli ki riiri nga muhya-kazi wani,
mwâli nvitiirwi kwo bweneene.
Mwâli njagalukiiri. Neꞌkyanya nꞌgamùleeza mwiꞌshamba, mwanakizi ngulikira,
kundu ndaazo mbuto ízimeziri mwo.
3 Ku yikyo kyanya, mwe Bahisiraheeri mwâli talwirwi imwani,
mwanaba ngiꞌtomola lyeꞌmimbu.
Ngiisi ábâli kizi kolwa mbu bamùhume kwo, banayami hanwa.»
Kwokwo, kwo Nahano adesiri.
4 Mwe milala yoshi yaꞌBahisiraheeri! Mwe beene Yakobo!
Muyuvwe igambo lya Nahano.
5 Mukuba adetaga kwokuno:
«Bashokuluza biinyu, biki byo bakangayira, halinde bahabuke,
banakizi gendi yikumba imigisi?
Iyo migisi yabo, si ndaako kamaro ibahitiiri!
Kiri na boonyene, si ndaako bahiiti!
6 Bakaleka ukutee yisaliza, ti: “E balya! Kituma kiki tutakiri mu kulikira Nahano?
Si ye katulyosa mu kihugo kyeꞌMiisiri,
anaturongoora mwiꞌshamba, áhâli yumagusiri,
hanâli yijwiri ibihomogolo!
Iyo munda mwiꞌshamba, yâli yidisiri ikihulu,
ndaanaye úwâli kizi gilenga, kandi iri agituula.”
7 Nꞌgabaleeta mu kihugo íkiyeziri,
gira bakizi lya mweꞌbitumbwe, kiri neꞌbije-bije byamwo.
Halikago, yikyo kihugo kyani, iri bakakihikaga mwo,
banakiyulubaza, halinde kyanakizi neenwa.
8 Mu bagingi nabo, ndaaye úkayisaliza, ti: “Kituma kiki tutakiri mu kulikira Nahano?”
Kiri naꞌbigiriza beꞌmaaja, batâli nyiji.
Abimangizi baꞌbandu, keera bakambindulira ingoto.
Abaleevi baabo banakizi tanga ubuleevi kwiꞌziina lyoꞌmuzimu Baali,
iri banayikumba imigisi, kundu ndaako kamaro ibahitiiri.»
9 Nahano adetaga kwokuno: «Ngola ngamùlega.
Kiri naꞌbandu beꞌbibusi biinyu, nabo ngabalega.
10 Mutee jabukaga inyaaja, halinde mu kihugo kyeꞌKipuro,
kandi iri mulungike abandu mu kyeꞌKedaari, balangiize.
Mugendi sisa, iri igambo mwene yiri keera likaba.
11 Aahago! Ka hali abandu ábakagomboola imigisi yabo,
mbu bayabiirage igindi? Aahabi!
Iyo migisi, abandu batangagigomboola kundu yoshi iri ya busha-busha!
Halikago abandu baani boohe, keera bakanjanda,
na ndi nie mwene ubulangashane.
Bagweti bagakizi yikumba imigisi,
kundu ndaako kamaro ihiiti.
12 E igulu, yago mabi gooshi, bwo keera gakoleka,
ukizi huumirwa, unajugume neꞌkyoba!»
Kwokwo, kwo Nahano adesiri.
13 «Abandu baani, ibyaha byo bâli kizi gira, biri bibiri.
Ubwa mbere, bakanjanda, na ndi nie shyoko yaꞌmagoloovi ágali mu leeta ubulamu.
Noꞌbwa kabiri, banayihumbira ibishimo byoꞌkubiika mwaꞌmiiji.
Haliko yibyo bishimo, keera byatulika-tulika, bitanakiri mu yijula mwaꞌmiiji.»
Abahisiraheeri bayikululira ubuhanya
14 «Balya Bahisiraheeri, ka bakabutirwa mu buja, halinde banakiri baja? Nanga, maashi!
Aahago! Kituma kiki bakatwalwa imbohe?
15 Si abagoma baabo bagweti bagabalundumira nga ndare!
Emwe! Bakola mu balangamira.
Yabo bagoma, keera bakashereeza ikihugo kyoshi kyaꞌBahisiraheeri,
banasiga utwaya twabo biguuka, bizira bandu.
16 Kiri naꞌBamiisiri beꞌMefiisi, naꞌbeꞌTapaneshi,
nabo keera bakamùteezagya ishoni, mu kumùnguula imishaku ku matwe.
17 E Bahisiraheeri, yubwo buhanya bwoshi,
ka mutali mwe mukabuyikululira, mu kunjanda?
Keera mukanjanda, na ndi nie Rurema Nahamwinyu.
Nie wâli kizi mùrongoora mu njira íkwaniini.
18 Si keera mukagendi nywana naꞌBamiisiri!
Aahago! Ikyanya mukagendi nywa ku magoloovi goꞌlwiji Niire,
ka hali byo mukayunguka?
Na kwakundi, ikyanya mukagendi nywana naꞌBahasuriya,
mbu mugendi nywa ku magoloovi goꞌlwiji Hefuraati, biki byo mukayunguka?
19 Aahago! Keera mukabihuuka, munakoli ba banangora-mabi.
Kwokwo, mukolaga mugaahanwa, gira mulonge ukuyiga.
Kundu nie Rurema Nahamwinyu,
si keera mukanjanda, mutanaki nzimbahiri.
Kyo kitumiri mukayikululira ubuhanya, mwanayingira mu makuba.
Kwokwo, kwo nie Rurema Nahamwinyu woꞌbushobozi bwoshi ndesiri.
20 «Ukulyokera kare, muyamiri muli mu huna imbere lyani.
Kundu mwâli riiri bakozi baani, haliko mukanyihandula kwo.
Mwâli riiri nga shuuli íri mu twisa imigozi.
Mwanambwiraga, ti: “Twalahira, kwo tutagakizi kukolera!”
Mwanakizi gwejeraga lugali nga mushule, ku ngiisi higangazi,
na mwiꞌdako lya ngiisi biti íbidoohiri.
21 Ikyanya nꞌgamùbyala, nâli yiji kwo muli muzabibu nirizina, na kwo mukwaniini.
Aaho! Kutagi buno, keera mwahinduka milandira íkola mu landa-landa bwalaafwe?
Kiri neꞌmizabibu íri mu mùtongeka kwo, si iryagagi mizabibu mibi ya mu kishuka?
22 Ibyaha biinyu, kundu mwangagira mbu mubishukiirize neꞌsaabuni,
haliko, biyamiri-yamiri biri imbere lyani.»
Kwokwo, kwo Rurema Nahamwitu adesiri.
23 «Kutagi mwangadeta, mbu: “Twehe tutali mu yikumba Baali.
Ku yukwo, ndaakyo ikyaha tuhiiti.”
Mutee genda mu ndekeera,
lyo mubona ibyaha byo mwâli kizi girira mwo.
Mulyagagi ngiꞌbuguma lyeꞌngamiya, írigweti ligahura-hura.
24 Munali ngiꞌbuguma lya punda wa mu kishuka,
írikoli liiziri, linabe keera lyaleha imbuusi, mu kulooza ifiizi.
Aahago! Yiryo ibuguma, nyandagi úwangaki lihangirira?
Inviizi zitakiri mu yiluhya. Si ikyanya kyoꞌmulindo,
lyo ziri mu yami gendi yimya buzira igoorwa.
25 E Bahisiraheeri, muyitondage.
Si mu kulooza byo mugayikumba, mugweti mugatibita buzira biraato!
Kiri neꞌmimiro yinyu, ikola mu hangalala.
Yoho wee! Si muli mu naaka, mbu:
“Ndaakwo kundi! Iyo migisi, tugisimiiri, tunakwaniini tukizi giyikumba.”
26 Umuzimba, iri bangamùbirigisha, ali mu teteerwa.
Kwo na kwokwo niinyu mwe Bahisiraheeri, mwâye teteerwe.
Kiri naꞌbaami biinyu, bagateteerwa ngana, kuguma naꞌbatwali baabo,
naꞌbagingi baabo, naꞌbaleevi baabo.
27 «Yehee! Mugweti mugakizi baaja imigisi mu biti,
munagibwire: “E waliha! We daata!”
Neꞌmigisi yiꞌbuye kwakundi, munagibwire: “Ewe! We kambuta”.
Aahabi! Ho mwangandoziri kwo, mukambindulira ingoto.
Halikago, ikyanya muli mu longa amakuba, lyoki munayami ndakira, ti:
“E maashi! Uyiji tukiza!”
28 Aahago! Iyo migisi yo mukayibaajira, hayagi iri?
Ngahwe! Ikyanya mugakizi goorwa, leka ibe yo igakizi mùkiza.
E Bayuda, imigisi yinyu iluguusiri bweneene,
nga kwoꞌtwaya twinyu tuli.
29 «Aaho! Bikagi kandi muki gweti mugakizi ndakira kwo,
keera mukanahuna?»
Kwokwo, kwo Nahano adesiri.
30 «Kundu nꞌgamùhaniiriza, ndaabyo bikamùgirira.
Si ikyanya mukahanwa, mutanangalukira.
Mwâli kizi minika abaleevi biinyu ku ngooti.
Mwehe, mulyagagi nga ndare ndangi íshalisiri, inakola mu janganulana.
31 Yemwe bandu ba zeene! Nie Nahano, nie wakyula.
Aaho! Mundegage amatwiri.
Ka ndi mu teera abandu ikyoba, nga úli mu lenga mwiꞌshamba,
kandi iri ngeꞌkihugo íkiyidisiri mweꞌkihulu namudidi?
Si muli baana baani!
Aahago! Kituma kiki mugweti mugaadeta:
“Leero buno, tugagenda ngiisi ho tuloziizi.
Tutagaki kugalukira!”
32 Umunyere, si atangayibagira ukuyilimbiisa noꞌbungeni-ngeni bwage!
Noꞌmuhya-kazi atangayibagira ukuyambala ikanju lyage lyoꞌbuhya!
Halikago abandu baani boohe, bakoli hisiizi isiku kandaharuurwa banyibagiiri.
33 «Emwe! Muli beeshu bweneene mu kuyerura.
Neꞌkyanya muli mu giraga amabi mwene yago, kiri naꞌbabulambe baꞌbakazi, muli mu baheta.
34 Na kwakundi, ibyambalwa biinyu bikoli yulubiiri noꞌmuko,
bwo mugweti mugayita abakeni,
ndaanabwo buhube bwo bahiiti.
Yabo bandu, mutakagwana kwo bali mu mùzimba.
Neꞌngingwe ya yibyo, 35 mugweti mugayihaya, ti:
“Twehe, ndaabwo buhube tuhiiti! Nahano atangaki turakarira.”
Si mwabeeshaga mu kudeta, mbu: “Twehe, ndaakyo kyaha tuhiiti!”
Kwokwo, ngamùhaniiriza ngana-ngana!
36 «Kutagi muli mu hindula-hindula imitono?
Aahago! Kiri naꞌBamiisiri bagamùteeza ishoni,
nga kwaꞌBahasuriya keera bakamùteeza zo.
37 Mugayiji lyoka mu kihugo kiinyu,
mukoli jojobiiri nga mbohe.
Abandu beꞌMiisiri, kundu mukola mu babiika kwoꞌmulangaaliro,
haliko nie Nahano keera nꞌgabajanda. Mutanâye longe ubutabaazi imwabo.»