12
Vata ovu niftaltolar dawan
1 Ti nata usiꞌik afa isa naꞌa lanit i notu ma tamata ra munuk rtalkaka. Vata isa nala lera al nkuma ia ovu ndiri vulan ratan a. Nara vutu rahin irua rkuma ulun a wean kalulu i raja baꞌi naklulu a. 2 Vata yai nbarlewan ma ni amar kena roak ma nrali ia, ba nfarnuang wawaꞌuk dawan roak. Ia nafwak ma vain a dawan urun.
3 Brian munuk, na usiꞌik afa liak isa naꞌa lanit. Afa yai notu ma tamata ra munuk rtalkaka. Afa i usiꞌik yai, niftaltolar valvulin dawan isa i ulun ifitu ovu ni ungar vutu a. Kalulu i wean raja baꞌi naklulu sasan lokat ulun ra.* 12:3 Niftaltolar yai wean nifa, naꞌuk dawan urun. Vai mala nfalak ne, naga. Naꞌa Wahyu ini, taltolar dawan yai ihin a ne, nitu ra rira raja a. Msiꞌik vali Wahyu 20:2-3. 4 Niftaltolar dawan yai nala kikurn al nfari nara ovi rnaꞌa lanit sepertiga a, ma nasba vatuk ira rsuta lanit ivavan ini. Niftaltolar dawan yai ndiri vata i mane nrali ia yai wahan ralan a, boma wean i vata yai nrali roak ia, na ntelas lahir yanan a. 5 Ti ma vata yai nrali ia, na yanan brana. Yanan brana yai veka nfareta tamata ovi rnaꞌa lanit ivavan a munuk ovu fareta i nangrebat, wean takil tmaꞌan ni ngrebat a. Taltolar yai mane ntelas yanan brana, naꞌuk Ubu Ni sansinir isa ntali lanit ratan ntaha nala kasikoꞌu yai ma novun Ia nti verin Ubu naꞌa wan i ndoku ma nfareta a.† 12:5 Fareta i nangrebat, wean takil tmaꞌan ihin a ne, ia nangrebat ma ti nvisal-nvasil munuk tamata ovi rangal Ia. 6 Ba vata yai nafla nti wan lean vu dawan isa. Wan yai Ubu nfadoku roak verin ia ma nsiꞌik ia, ti naran amar rivun isa ratut irua vutnean.
7 Ti nata, vangoa-vanga dawan naꞌa lanit ratan. Ubu Ni sansinir tali lanit ratan i naran Mikhael a ovu Ubu Ni sansinir liak ra, rotu rihi ovu niftaltolar dawan yai. Niftaltolar dawan yai, ni sansinir ra tali lanit ratan‡ 12:7 Niftaltolar yai ni sansinir ra tali lanit ratan rangal lahir Ubu, ma rorang aꞌuk niftaltolar ovu nitdawan a. rlobang vali ia, ma rangal Mikhael. 8 Naꞌuk Mikhael ovu Ubu Ni sansinir ra rfaleka niftaltolar yai, ba ralaꞌing vatuk ia ovu ni sansinir ra, ma wol warira roak naꞌa lanit ratan. 9 Ira rvatuk roak niftaltolar dawan yai ovu ni sansinir ra ma rsuta rnaꞌa lanit ivavan a. Niftaltolar yai rfanara ia ne, Iblis te nitdawan i nlabir waweang tamata ra, ma rotu aꞌuk salasilan ra.§ 12:9 Nitdawan naꞌa vai Yunani ihin a ne, dawan i nvisal-nvasil tamata ovu sumarn. Nitdawan naꞌa vai Ibrani ihin a ne, dawan i nsiangal sian.
10 Nata urenar vai isa dawan urun ia, ntali lanit ratan nma. Vai yai nfalak ne,
“Amar ini, nitdawan wol ndiri roak Ubu wahan ralan a ma nfalak sian ovu nmangadu lalawatan ita ovu terad a valid ra,
tevek Ubu nvatuk roak ia tali lanit ratan, ma nsuta lanit ivavan ini.
Ba fiang ini Ubu notu lingaꞌan ma nsikat tamata ra tali rira salasilan ra, ma rira vavaꞌat kakiwal. Ubu nfaturu Ni ngrebat a ma neluk raja ma nfareta!
Raja i ntevut dida salasilan ra nfaturu vali Ni fareta a naꞌa lanit ivavan a!
11 Terad-valid ra rfaleka roak nitdawan a,
tevek Domba Yanan nmata roak, ma laran a nvoat al ntevut rira salasilan ra, ovu vali wol rbobar ma rmata,
naꞌuk rtafal ma rfamalik Ubu Ni vaivatul ra naꞌa Yesus.
Velik ne tamata rwi-rwa te rfedan ira, na ira rorang lalawatan Ubu.
12 Ba ovi mnyaꞌa lanit ratan munuk myotu inabira lolin.
Naꞌuk sian urun i lahir verin tamata ovi mnyaꞌa lanit ivavan ini, ovu ovi mnyaꞌa tahat ralan veka mtyuan susa dawan ilaꞌa,
tevek nitdawan nanaꞌa roak wahabira ralan a.
Ia wol ntahang nal ralan roak, tevek nkaꞌa roak ne, ni amar mamahin roak ma nwi-nwa tamata ra.”
13 Ti ma niftaltolar dawan yai nkaꞌa ne, rvatuk roak ia nsuta lanit ivavan ini, na nlabas lahir vata i nrali kasikoꞌu brana yai. 14 Ubu nala kyabilaꞌa manin dawan irua verin vata yai, ma noru lahir ma nti wan lean vu dawan. Ba Ia nwanar ia, ti naran varat itelu vulan inean.* 12:14 Varat itelu vulan inean wean lahir vulun vutfaꞌat rahin irua, amar rivun isa ratut irua vutnean, te wean terjemahan boku naꞌa vai Mala rfalak ne, satu masa dan dua masa dan setengah masa. Ba niftaltolar dawan yai veka wol nwi-nwa nala ia.
15 Naꞌuk niftaltolar dawan yai nasburing wear dawan, ma wean oar tali vavan nti vata yai, boma notu ma nfafofa ia.
16 Lanit ivavan a nlobang vata yai, ba nngal vavan a ma ntelas wear i ntali niftaltolar yai vavan nma. 17 Niftaltolar yai nangrova urun vata yai, ba ti notu ma vangoa-vanga dawan verin vata yai yanan ra ovu ubun-nusin ra. Vata yai yanan ra ovu ubun-nusin ra rot-orang afa ovi Ubu nfareta a, ovu rfamalik afa ovi Yesus nfalak ra ovu Ni ngrebat a.
18 Ba niftaltolar yai ndiri watan ngur tavun.
*12:3 12:3 Niftaltolar yai wean nifa, naꞌuk dawan urun. Vai mala nfalak ne, naga. Naꞌa Wahyu ini, taltolar dawan yai ihin a ne, nitu ra rira raja a. Msiꞌik vali Wahyu 20:2-3.
†12:5 12:5 Fareta i nangrebat, wean takil tmaꞌan ihin a ne, ia nangrebat ma ti nvisal-nvasil munuk tamata ovi rangal Ia.
‡12:7 12:7 Niftaltolar yai ni sansinir ra tali lanit ratan rangal lahir Ubu, ma rorang aꞌuk niftaltolar ovu nitdawan a.
§12:9 12:9 Nitdawan naꞌa vai Yunani ihin a ne, dawan i nvisal-nvasil tamata ovu sumarn. Nitdawan naꞌa vai Ibrani ihin a ne, dawan i nsiangal sian.
*12:14 12:14 Varat itelu vulan inean wean lahir vulun vutfaꞌat rahin irua, amar rivun isa ratut irua vutnean, te wean terjemahan boku naꞌa vai Mala rfalak ne, satu masa dan dua masa dan setengah masa.